ភ្នំពេញ ៖ នៅក្នុងចក្ខុវិស័យរបស់សហគមន៍ប្រជាជាតិអាស៊ី-អាគ្នេយ៍ ហៅកាត់ អាស៊ាន បានដាក់គោលដៅនៅត្រឹមឆ្នាំ២០៤៥ ខាងមុខនេះសម្រេចឱ្យបានកំណើនសេដ្ឋកិច្ចខ្ពស់ និងធំជាងគេលំដាប់ទី៤នៅលើពិភពលោក ខណៈនៅពេលបច្ចុប្បន្ននេះ អាស៊ាន កំពុងធ្វើដំណើរឆ្ពោះទៅមុខលើសពីសេណារីយ៉ូនៃទម្លាប់ធម្មតា (Business as Usual)។ នេះជាការលើកឡើងរបស់ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់នៃពិធីបើកកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ កាលពីព្រឹកថ្ងៃទី០៤ ខែមីនា ឆ្នាំ២០២៦ នៅសណ្ឋាគារសូហ្វីតែល រាជធានីភ្នំពេញ។

ភ្ជាប់ទៅនឹងមហិច្ឆតា និងគោលដៅ ដែលបានដាក់ចេញ បច្ចុប្បន្ន អាស៊ាន បាន និងកំពុងប្រែក្លាយខ្លួនជាក្បាលម៉ាស៊ីននៃតម្រូវការសកលដោយតំបន់អាស៊ានបូក៣ ហើយបានព្យាករណ៍ថា អាចសម្រេចក្នុងអត្រាកំណើនប្រមាណ៤% លើសពីអត្រាកំណើនសកលក្នុងរង្វង់ ៣.៣%ក្នុងឆ្នាំ២០២៦។ ដោយឡែក នៅក្នុងផែនការយុទ្ធសាស្ត្រសហគមន៍សេដ្ឋកិច្ចអាស៊ាន ឆ្នាំ២០២៦-២០៣០ ត្រូវបានរៀបចំឡើងជាក្របខ័ណ្ឌឆ្លើយតបរួមគ្នាក្នុងកម្រិតប្រតិបត្តិការ ដោយមានការសម្លឹងមើលទៅមុខ និងផ្តោតលើការសម្រេចបានលទ្ធផលជាក់ស្ដែង ដើម្បីឱ្យធន់ទៅនឹងការបន្ទច់បង្អាក់ទីផ្សារ និងបម្រើជាប្រភពនៃកម្លាំងប្រកួតប្រជែង។

សម្ដេចធិបតី ហ៊ុន ម៉ាណែត ប្រមុខនៃរាជរដ្ឋាភិបាលកម្ពុជា បានមានប្រសាសន៍ថា នៅក្នុងក្របខ័ណ្ឌតំបន់នេះ កម្ពុជាបានរៀបចំខ្លួនរួចជាស្រេចក្នុងនាមជាដៃគូយុទ្ធសាស្ត្រក្នុងចំណោមបណ្តាប្រទេសជាសមាជិកអាស៊ាន។ កម្ពុជា ក៏បានផ្ដល់អត្ថប្រយោជន៍ជាយុទ្ធសាស្ត្រសម្រាប់វិនិយោគិន ដែលមានកំណើន៥,២% ក្នុងឆ្នាំ២០២៥ ជាមួយនឹងការព្យាករណ៍ថា នឹងបន្តសម្រេចបានអត្រាកំណើនរឹងមាំក្នុងរយៈពេលមធ្យម ដែលការណ៍នេះបង្កើតឱ្យមានកាលានុវត្តភាពសម្រាប់ធុរកិច្ច និងការវិនិយោគ។​

សម្ដេចធិបតី បានបញ្ជាក់ដូច្នេះថា ៖

«ដើម្បីឱ្យប្រតិបត្តិការធុរកិច្ចអាចមានប្រសិទ្ធភាពទៅនឹងការចំណាយ និងភាពធន់យ៉ាងពិតប្រាកដបាន ទាមទារឱ្យមានការធ្វើពិពិកម្មមូលដ្ឋានធុរកិច្ច ដោយកម្ពុជាបានបំពេញបន្ថែមដល់មូលដ្ឋានឧស្សាហកម្មក្នុងនាមប្រទេសជាសមាជិកអាស៊ាន ជាមួយនឹងការពង្រីកខ្សែច្រវាក់ផ្គត់ផ្គង់ក្នុងតំបន់យ៉ាងរលូនភ្ជាប់ជាមួយការប្រើប្រាស់បច្ចេកវិទ្យា»។

ជាការកត់សម្គាល់ ក្នុងនាមជាប្រទេសសមាជិកអាស៊ាន កម្ពុជា បានខិតខំយ៉ាងសកម្មក្នុងការកាត់បន្ថយរបាំងពាណិជ្ជកម្ម និងការធ្វើទំនើបកម្មក្របខ័ណ្ឌគយ និងឡូជីស្ទីក។ ក្រៅពីនេះ រាជរដ្ឋាភិបាលកម្ពុជា ក៏ផ្ដល់ជូននូវភាពជាម្ចាស់កម្មសិទ្ធិ១០០% ដល់វិនិយោគិនបរទេស និងបានធ្វើឌីជីថលូបនីយកម្មពេញលេញនូវបរិយាកាសគតិយុត្ត និងនីតិវិធី ជាមួយការប្តេជ្ញាចិត្តចំពោះរបៀបវារៈគាំទ្រធុរកិច្ច ដែលកាត់បន្ថយឧបសគ្គ និងបង្កើនល្បឿនទៅកាន់ទីផ្សារឱ្យបានជាអតិបរមា។

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានទទួលស្គាល់ពីសក្តានុពលនៃការវិនិយោគនៅក្នុងតំបន់អាស៊ាន ដែលនៅមិនទាន់បានប្រើប្រាស់ពេញលេញ និងបានលើកទឹកចិត្តដល់វិស័យឯកជនអាស៊ានតភ្ជាប់បណ្តាញធុរកិច្ច និងវិនិយោគក្នុងគោលដៅជំរុញសមាហរណកម្មសេដ្ឋកិច្ចតំបន់ឱ្យកាន់តែស៊ីជម្រៅបន្ថែមទៀត។

លោកជំទាវបានបញ្ជាក់ថា ៖ «ដើម្បីអាចសម្រេចគោលដៅខាងលើ អាស៊ាន បាននិងកំពុងបន្តពង្រឹងរចនាសម្ព័ន្ធស្ថាប័ន និងក្របខ័ណ្ឌគោលនយោបាយរបស់ខ្លួនឱ្យកាន់តែរឹងមាំ និងមានប្រសិទ្ធភាពតាមរយៈការធ្វើវិសោធនកម្មកិច្ចព្រមព្រៀងមួយចំនួន រួមមាន កិច្ចព្រមព្រៀងពាណិជ្ជកម្មទំនិញអាស៊ាន និងកិច្ចព្រមព្រៀងវិនិយោគគ្រប់ជ្រុងជ្រាយមួយរបស់អាស៊ានជាដើម»។

ជាមួយគ្នានេះ លោកជំទាវក៏បានថ្លែងអំណរគុណដល់សភាពាណិជ្ជកម្មកម្ពុជា ចំពោះការប្តេជ្ញាចិត្តពង្រឹងការតភ្ជាប់វិស័យឯកជនអាស៊ាន និងធ្វើឱ្យកិច្ចសហប្រតិបត្តិការវិនិយោគក្នុងតំបន់កាន់តែស៊ីជម្រៅ ដែលបង្ហាញពីបំណងប្រាថ្នារួមស្របតាមចក្ខុវិស័យសហគមន៍អាស៊ាននៅឆ្នាំ២០៤៥។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ផងដែរថា ជាការពិតកិច្ចប្រជុំកំពូលធុរកិច្ចអាស៊ាននៅកម្ពុជា ជាកិច្ចការសំខាន់ ដែលផ្ដោតទៅផ្នែកនវានុវត្តន៍ សំដៅទៅលើឧស្សាហកម្ម ហើយនឹងការតភ្ជាប់រវាងសមាជិកនៅក្នុងសហគមន៍សេដ្ឋកិច្ចអាស៊ាន។

អ្នកឧកញ៉ាបញ្ជាក់ថា ៖

«ដូចគ្នានូវអ្វី ដែលយើងកំពុងធ្វើពីពិពិធកម្ម និងធ្វើការកំណែទម្រង់នូវអ្វីដែលជាពាក់ព័ន្ធបច្ចេកវិទ្យាថ្មីៗដើម្បីទាក់ទាញការវិនិយោគមកកាន់ប្រទេសកម្ពុជារបស់យើង។ កិច្ចការនេះទាមទារនូវវឌ្ឍនភាព នវានុវត្តន៍ ឱ្យទាន់សភាពការណ៍នៃបរិបទឧស្សាហកម្មទំនើបសម្រាប់កម្ពុជាយើងផងដែរ»​។ ​

អ្នកឧកញ៉ា បានបន្ថែមថា ៖

«ក្នុងរបត់​នៃ​សេដ្ឋកិច្ចសកលដែលពុំទាន់ទៀងទាត់ ខ្ញុំគិតថា នៅក្នុងនាមអាស៊ាន សភាពាណិជ្ជកម្មយើង​ដែលបានរៀបចំកិច្ចប្រជុំកំពូលធុរកិច្ចអាស៊ាននេះឡើង គឺដើម្បីចាប់ដៃគ្នា សហការគ្នាក្នុងតំបន់ឱ្យកាន់រឹងមាំ ហើយមានគោលដៅតែមួយ អាស៊ាននៃវាសនាតែមួយ ដែលយើងបានដាក់ចេញនៅពេលដែលយើងធ្វើជាប្រធានអាស៊ានកន្លងមក»។

សូមបញ្ជាក់ថា កាលពីឆ្នាំ២០២៥ ពាណិជ្ជកម្មរវាងកម្ពុជា និងបណ្តាប្រទេសជាសមាជិកអាស៊ាន មានទំហំប្រមាណជាង ១៥,៧៨ពាន់លានដុល្លារអាម៉េរិក កើនឡើង ៣,៧២ភាគរយ ធៀបនឹងឆ្នាំ២០២៤ ខណៈដែលការនាំចូលមកកម្ពុជាមានទំហំ១០,៧ ពាន់លានដុល្លារ ​កើន ០,៧៥% ហើយការនាំចេញពីកម្ពុជា មានទំហំ ៥,៦៧ ពាន់លានដុល្លារ កើនឡើង ៩,៨៣% ឆ្ពោះទៅកាន់ប្រទេស ​ម៉ាឡេស៊ី ឥណ្ឌូនេស៊ី ហ្វីលីពីន ថៃ វៀតណាម ឡាវ មីយ៉ាន់ម៉ា ព្រុយណេ និងសឹង្ហបុរី ៕