សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
វិស័យទេសចរណ៍របស់កម្ពុជា កំពុងទទួលរងផលប៉ះពាល់យ៉ាងខ្លាំងដោយសារវិបត្តិមជ្ឈិមបូព៌ា ដោយមានការរំខានដល់ផ្លូវអាកាស និងថ្លៃដើមកើនឡើង ដែលបង្ខំឱ្យប្រតិបត្តិករទេសចរ ត្រូវគិតគូពីយុទ្ធសាស្ត្រឡើងវិញ។ ប៉ុន្តែ អ្នកជំនាញមើលឃើញថា បញ្ហានេះ ហាក់មិនសូវប៉ះពាល់ខ្លាំងទេសម្រាប់វិស័យទេសចរណ៍របស់កម្ពុជាឡើយ។
សារព័ត៌មាន TTG ASIA បានចេញផ្សាយនៅថ្ងៃទី ២៨ ខែមេសា ឆ្នាំ ២០២៦ ឱ្យដឹងថា អ្នកធ្វើដំណើរអឺរ៉ុបដែលជាប្រពៃណីគ្របដណ្ដប់តំបន់ទេសចរណ៍វប្បធម៌របស់ប្រទេសកម្ពុជា កំពុងរងផលប៉ះពាល់ខ្លាំងបំផុត ដោយសារបណ្តាញហោះហើរត្រង់របស់កម្ពុជា តិចជាងប្រទេសជិតខាង។
សារព័ត៌មានដដែល ពន្យល់ថា ជាធម្មតាអ្នកធ្វើដំណើរអ៊ឺរ៉ុប ត្រូវឆ្លងកាត់រដ្ឋឈូងសមុទ្រ ជាពិសេស ទីក្រុងដូហា ឌូបៃ ឬអាប៊ូដាប៊ី។ ដូច្នេះ សង្គ្រាមនៅមជ្ឈិមបូព៌ា បានដាក់សម្ពាធដល់វិស័យទេសចរណ៍នៅកម្ពុជា។
អ្នកស្រី Ho Shyn Yee សមាជិកក្រុមប្រឹក្សាភិបាលនៃ Smiling Gecko Singapore ដែលមានរមណីយដ្ឋានកសិដ្ឋានមួយក្នុងខេត្តកំពង់ឆ្នាំង របស់ប្រទេសកម្ពុជា អះអាងថា មានការធ្លាក់ចុះនៃចំនួនភ្ញៀវដែលបានកក់សម្រាប់ការស្នាក់នៅ ព្រោះតែជម្លោះនៅមជ្ឈិមបូព៌ា។ ជាក់ស្តែង ដូចជា តម្លៃសំបុត្រយន្តហោះខ្ពស់ជាងមុន និងផ្លូវកាន់តែឆ្ងាយព្រោះត្រូវប្ដូរផ្លូវហោះហើរ និងបញ្ហាមិនសូវមានទំនុកចិត្ត ជាដើម។ កត្តាទាំងនេះ ធ្វើឱ្យភ្ញៀវអឺរ៉ុបចំណាយច្រើនជាងមុន។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក ទទួលស្គាល់ថា សង្គ្រាមរវាងអ៊ីស្រាអែល អាម៉េរិក ទល់នឹងអ៊ីរ៉ង់ ពិតជាបានដាក់សម្ពាធដល់វិស័យទេសចរណ៍របស់កម្ពុជាមែន ប៉ុន្តែផលប៉ះពាល់មិនមានទំហំធំនោះទេ។
លោក ធួន ស៊ីណាន បានថ្លែងថា៖
“វាពិតជាមានការប៉ះទង្គិចមែននៅដំណាក់ដំបូង។ ចឹងរហូតមកដល់ពេលនេះ ខ្ញុំឃើញនៅមានការប៉ះពាល់ទង្គិចវានៅមានតិចតួចទេ។”
ដោយឡែក លោក លី សែ ប្រធានគ្រឹះស្ថានអង្គរ បានប្រាប់បណ្ដាញសារព័ត៌មាន AMS កាលពីថ្ងៃពុធនេះថា ភ្ញៀវមួយចំនួនសម្រេចផ្អាកការធ្វើដំណើរកម្សាន្ត អំឡុងពេលសង្គ្រាមនេះ។
លោក លី សែ បានឱ្យដឹងថា៖
“សង្រ្គាមនៅមជ្ឈិមបូព៌ានេះធ្វើឲ្យតម្លៃឥន្ធនៈឡើងថ្លៃគុណ២ តម្លៃសំបុត្រយន្តហោះក៏ឡើងថ្លៃហើយ។ ចឹងវាធ្វើឲ្យចំនួនទេសចរធ្លាក់ចុះបន្តិច។”
របាយការណ៍ពីគ្រឹះស្ថានអង្គរ ដែលបានផ្ដល់ឱ្យបណ្ដាញ AMS នៅថ្ងៃទី ២៩ ខែមេសា បានកត់ត្រាពីការធ្លាក់ចុះ ៣២ ភាគរយ ក្នុងត្រីមាសទី ១ ឆ្នាំ ២០២៦ នេះ ធៀបនឹងឆ្នាំមុន។ ជាមួយគ្នានេះ ចំណូលពីការលក់សំបុត្រចូលទស្សនារមណីយដ្ឋានអង្គរមានចំនួនជាង ១៣ លានដុល្លារ ធ្លាក់ចុះ ៣០ ភាគរយ៕
អត្ថបទ៖ ខន ណារី AMS
Account
Security
Favourite Content