សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការដាំដំណាំស្វាយចន្ទី អ្នកដាំត្រូវយកចិត្តទុកដាក់ខ្ពស់ទៅលើបច្ចេកទេស គិតចាប់តាំងពីការដាំ ការថែទាំ ពិសេសត្រូវយល់ដឹងច្បាស់ពីប្រភេទ ក៏ដូចជាបរិមាណជីដើម្បីបំប៉នដល់ដំណាំឱ្យឆាប់ធំធាត់ និងបានផលល្អ។ ក្នុងនោះ ប្រភេទជីធម្មជាតិ ២ប្រភេទ ដែលមានសារធាតុបំប៉នខ្ពស់សម្រាប់ដំណាំស្វាយចន្ទី ងាយផលិត ចំណាយតិច និងមិនធ្វើឱ្យខូចដី។
សម្រាប់ដំណាំស្វាយចន្ទី ជីត្រី និងជីផ្លែឈើ ជាប្រភេទជីដែលកសិករគួរតែយល់ដឹង និងអាចយកទៅអនុវត្តបាន ព្រោះវាងាយផលិត ចំណាយតិច និងប្រើតែធនធានជុំវិញខ្លួនមកកែច្នៃ ដាក់ផ្អាប់ឱ្យក្លាយជាប្រភេទជីទឹក អាចប្រើប្រាស់លាយចូលគ្នាកាន់តែមានសមត្ថភាពខ្ពស់។
ចំពោះប្រភេទជីត្រី គេប្រើវត្ថុធាតុដើមរួមមាន ត្រី ២៥គីឡូក្រាម កន្ទក់ ៤គីឡូក្រាម ម្នាស់ ៤គីឡូក្រាម កាកស្កររងូ ៨គីឡូក្រាម និងមេជី SMB មួយកញ្ចប់ លាយជាមួយទឹក ១៥០លីត្រ ផ្អាប់ទុក ២៤ថ្ងៃ គឺអាចប្រើការបានហើយ។ ដោយឡែកប្រភេទត្រី គេអាចប្រើត្រីទឹកសាបក៏បាន ទឹកប្រៃក៏បាន តែសម្រាប់ត្រីទឹកប្រៃគឺមានឆ្អឹងរឹង និងផ្ទុកកាល់ស្យូមច្រើនជាង ហើយបរិមាណទឹក ១៥០លីត្រនេះ ក៏ត្រូវយកទឹកដែលគ្មានសារធាតុក្លរ បើប្រើជាទឹកដូងគឺកាន់តែមានប្រសិទ្ធភាពខ្ពស់។ ជាមួយគ្នានេះដែរ ប្រភេទជីផ្លែឈើ គេអាចប្រើផ្លែឈើមានពណ៌លឿង ដូចជា ល្ពៅ ល្ហុង ម្នាស់ ចេក និងស្វាយ មួយមុខ ១០គីឡូក្រាម ទឹក ១៥០លីត្រ និងអរម៉ូនជីផ្លែឈើ។
ពាក់ព័ន្ធនឹងការប្រើប្រាស់ កសិករអាចប្រើជីត្រីសម្រាប់បាញ់គល់ និងបាញ់ដើមស្វាយចន្ទីបាន តែកំឡុងពេលរុក្ខជាតិបែកផ្កា កសិករហាមប្រើប្រាស់។ បន្ថែមពីលើនេះ គេក៏អាចប្រើជីត្រី និងជីផ្លែឈើលាយជាមួយគ្នាដើម្បីស្រោចគល់ ដោយចំណុះទឹក ១០០០លីត្រ អាចប្រើជីត្រី ៥លីត្រ ជីផ្លែឈើ ៥លីត្រ កូរឱ្យសព្វយកស្រោចគល់ស្វាយចន្ទីក្នុងមួយដើមចន្លោះពី ១០-១៥លីត្រ។ ការស្រោចនេះដែរ គេអាចស្រោចបានសូម្បីតែចន្លោះដីកណ្ដាលរង មិនចាំបាច់តែគល់នោះទេ។ ករណីដីស្ងួត គេអាចស្រោច ១៥ថ្ងៃម្ដង និងមួយឆ្នាំអាចស្រោចពី ៤-៦ដង ឬអាចច្រើនជាងនេះអាស្រ័យលទ្ធភាព ព្រោះវាជាប្រភេទជីធម្មជាតិ ជីបំប៉ន កាន់តែស្រោចដីកាន់តែល្អ ពីមួយឆ្នាំទីមួយឆ្នាំ និងពុំមានផ្ដល់ផលប៉ះពាល់អ្វីនោះទេ។
បើធៀបនឹងប្រភេទជីគីមី ជីធម្មជាតិខាងលើនេះ អាចផ្ដល់ផលចំណេញច្រើន តួយ៉ាងតម្លៃ ជី១បេ តម្លៃ ១៣ម៉ឺនរៀល តែបើកសិករយកលុយនេះមកទិញត្រី អាចបានដល់ទៅ ២០គីឡូក្រាម ផលិតជីបាន ២៥០លីត្រ និងអាចប្រើបានរយៈពេល ១ឆ្នាំ អាចបង្កើនផលស្វាយចន្ទី មិនខូចដី និងអាចទទួលបានផលកើនរាល់ឆ្នាំ៕
Account
Security
Favourite Content