សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា ឥណ្ឌា និងចិន បានព្រមព្រៀងគ្នាបើកការហោះហើរត្រង់ឡើងវិញ និងបង្កើនលំហូរពាណិជ្ជកម្ម ដើម្បីស្តារទំនាក់ទំនងដែលមានភាពតានតឹងដោយសារការប៉ះទង្គិចនៅតាមព្រំដែនកាលពីឆ្នាំ២០២០។
ក្រសួងការបរទេសឥណ្ឌាបានបញ្ជាក់ថា ប្រទេសទាំងពីរនឹងបន្តការហោះហើរត្រង់ឡើងវិញជាមួយនឹងការជំរុញពាណិជ្ជកម្ម និងការវិនិយោគ រួមទាំងការបើកពាណិជ្ជកម្មតាមព្រំដែនឡើងវិញនៅចំណុច ៣កន្លែងដែលបានកំណត់ រួមជាមួយនឹងការសម្រួលដល់ទិដ្ឋាការ។ សូមជម្រាបដែរថា ជើងហោះហើរត្រង់រវាងចិន និងឥណ្ឌា ត្រូវបានផ្អាកចាប់តាំងពីឆ្នាំ២០២០។ សេចក្តីថ្លែងការណ៍ចុងក្រោយនេះបានកើតឡើងបន្ទាប់ពីរដ្ឋមន្ត្រីការបរទេសចិនលោក Wang Yi បញ្ចប់ដំណើរទស្សនកិច្ចរយៈពេលពីរថ្ងៃនៅទីក្រុងញូដេលី សម្រាប់កិច្ចពិភាក្សាជុំទី ២៤ ជាមួយទីប្រឹក្សាសន្តិសុខជាតិឥណ្ឌា (NSA) ដើម្បីដោះស្រាយជម្លោះព្រំដែនរាប់ទសវត្សរ៍របស់ពួកគេ។ លើសពីនេះ ការចរចាព្រំដែនបានគ្របដណ្តប់លើបញ្ហាដែលទាក់ទងនឹងការដកទ័ពដែលប្រទេសទាំងពីរបានដាក់ព្រំដែនហិម៉ាឡៃយ៉ាន, ការកំណត់ព្រំដែន, និងកិច្ចការព្រំដែនជាដើម។
កាលពីថ្ងៃពុធ សេចក្តីថ្លែងការណ៍របស់ក្រសួងការបរទេសចិនបានចេញផ្សាយថា ចិន និងឥណ្ឌា បានព្រមព្រៀងគ្នាបង្កើតក្រុមការងារមួយដើម្បីពិគ្រោះយោបល់ និងសម្របសម្រួលលើកិច្ចការព្រំដែនសម្រាប់ជំរុញការចរចាបោះបង្គោលព្រំដែន។ យន្តការនេះនឹងពង្រីកកិច្ចពិភាក្សាលើព្រំដែនផ្នែកខាងកើត និងកណ្តាល ហើយការចរចាមួយទៀតស្តីពីព្រំដែនផ្នែកខាងលិចនឹងត្រូវធ្វើឡើងឱ្យបានឆាប់តាមដែលអាចធ្វើបាន។ មិនត្រឹមតែប៉ុណ្ណោះ ប្រទេសទាំងពីរយល់ព្រមជួបប្រជុំគ្នាម្តងទៀតនៅក្នុងប្រទេសចិននៅឆ្នាំ២០២៦ ។
រដ្ឋមន្ត្រីការបរទេសចិនលោក Wang Yi បានលើកឡើងថា ការអភិវឌ្ឍន៍ប្រកបដោយស្ថិរភាព និងពង្រឹងទំនាក់ទំនងចិន-ឥណ្ឌាឲ្យកាន់តែប្រសើរឡើង មានផលប្រយោជន៍ជាមូលដ្ឋានរបស់ប្រជាជននៃប្រទេសទាំងពីរ។ ភាគីទាំងពីរគួរតែបង្កើនការជឿទុកចិត្តគ្នាទៅវិញទៅមកតាមរយៈការសន្ទនា និងពង្រីកកិច្ចសហប្រតិបត្តិការ ហើយឆ្ពោះទៅរកការឯកភាពគ្នាក្នុងវិស័យដូចជា ការគ្រប់គ្រងព្រំដែន និងការចរចាបោះបង្គោលព្រំដែនជាដើម។
បន្ទាប់ពីបានជួបនឹងរដ្ឋមន្ត្រីការបរទេសចិន លោក Wang Yi នាយករដ្ឋមន្ត្រីឥណ្ឌា លោក Narendra Modi បានបង្ហោះនៅលើ X ថា “រីករាយដែលបានជួបលោក Wang Yi រដ្ឋមន្ត្រីការបរទេស។ ចាប់តាំងពីជំនួបរបស់ខ្ញុំជាមួយប្រធានាធិបតី Xi នៅទីក្រុង Kazan កាលពីឆ្នាំមុន ទំនាក់ទំនងឥណ្ឌា-ចិនមានការរីកចម្រើនជាលំដាប់ ដែលត្រូវបានជំរុញដោយការគោរពផលប្រយោជន៍ និងភាពរសើបរបស់គ្នាទៅវិញទៅមក។ ខ្ញុំទន្ទឹងរង់ចាំការជួបគ្នាបន្ទាប់របស់ពួកយើងនៅទីក្រុង Tianjin នៅខាងក្រៅកិច្ចប្រជុំកំពូល SCO ។ ស្ថិរភាព និងការស្ថាបនានៃទំនាក់ទំនងរវាងឥណ្ឌា និងចិននឹងរួមចំណែកយ៉ាងសំខាន់ដល់សន្តិភាព និងវិបុលភាពក្នុងតំបន់ ក៏ដូចជាពិភពលោក”។
សូមបញ្ជាក់ថា លោក Modi គ្រោងនឹងធ្វើដំណើរទៅកាន់ប្រទេសចិននៅចុងខែនេះ ដើម្បីចូលរួមក្នុងកិច្ចប្រជុំកំពូលនៃអង្គការសហប្រតិបត្តិការសៀងហៃ (SCO) ដែលជាដំណើរទស្សនកិច្ចលើកដំបូងរបស់លោកទៅកាន់ប្រទេសនេះក្នុងរយៈពេលជាង ៧ឆ្នាំចុងក្រោយ៕
Account
Security
Favourite Content