សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ របាយការណ៍ដែលចេញផ្សាយដោយអគ្គនាយកដ្ឋានកៅស៊ូបានឱ្យដឹងថា ក្នុងឆមាសទីមួយនៃឆ្នាំ ២០២៤ ទំហំការនាំចេញកៅស៊ូស្ងួតរបស់កម្ពុជាបានទទួលទឹកប្រាក់ប្រមាណ ២១៣.៣ លានដុល្លារ កើនឡើង ៨.៦ភាគរយ បើធៀបនឹងរយៈពេលដូចគ្នាកាលពីឆ្នាំ២០២៣ ដែលមានត្រឹម១៩៦,៣ លានដុល្លារប៉ុណ្ណោះ។
របាយការណ៍ដដែលបានគូសបញ្ជាក់ថា កម្ពុជាបាននាំចេញផលិតផលកៅស៊ូស្ងួតចំនួនប្រមាណ ១៤០,៦៥៣ តោនចាប់ពីខែមករា ដល់ខែមិថុនាឆ្នាំ២០២៤នេះ ដែលឆ្លុះបញ្ចាំងពីការកើនឡើង ១% ពីចំនួន ១៣៩,២២០ តោនដែលបាននាំចេញក្នុងរយៈពេលដូចគ្នាកាលពីឆ្នាំ២០២៣។ ក្រៅពីជ័រកៅស៊ូ កម្ពុជា ក៏បាននាំចេញឈើកៅស៊ូប្រមាណ ៨,៣៤៨ ម៉ែត្រគូបផងដែរ។ នេះបើយោងតាមរបាយការណ៍របស់អគ្គនាយកដ្ឋានកៅស៊ូ។
បច្ចុប្បន្ន ជ័រកៅស៊ូ មានតម្លៃមធ្យមចន្លោះពី ២,៦០០រៀល ទៅ ៦,០០០រៀល ក្នុងមួយគីឡូក្រាម ដែលតម្លៃនេះខុសគ្នាពីតំបន់មួយទៅតំបន់មួយ។ ខេត្តដែលមានការដាំដុះដំណាំកៅស៊ូ រួមមានខេត្តកំពង់ចាម ត្បូងឃ្មុំ ក្រចេះ ស្ទឹងត្រែង រតនគិរី មណ្ឌលគិរី ព្រះវិហារ បាត់ដំបង ប៉ៃលិន ឧត្តរមានជ័យ និងកំពត ខណៈដែលផ្ទៃដីសរុបដាំដើមកៅស៊ូមានចំនួន ៤០៧,១៧២ ហិកតា ហើយក្នុងនោះ ៣២០,១៨៤ ហិកតា ស្មើនឹង ៧៨,.៦% ជាដើមកៅស៊ូចាស់គ្រប់គ្រាន់សម្រាប់ការចៀរជ័រ និងទទួលផលបាន។ នេះបើតាមទិន្នន័យ របស់ក្រសួងកសិកម្ម រុក្ខាប្រមាញ់ និងនេសាទ។
របាយការណ៍ដែលបង្ហាញ ដោយលោក ឃុន កក្កដា អគ្គនាយកស្តីទីនៃអគ្គនាយកដ្ឋានកៅស៊ូបាន បញ្ជាក់ថា ៖ កៅស៊ូស្ងួតមួយតោនមានតម្លៃជាមធ្យម ១,៥១៧ ដុល្លារក្នុងឆមាសទីមួយនៃឆ្នាំនេះ ដែលតម្លៃនេះលើសតម្លៃជាមធ្យមកាលពីឆ្នាំមុនប្រមាណ ១០៧ ដុល្លារ។
គួរឱ្យដឹងផងដែរថា ទីផ្សារដែលកម្ពុជានាំចេញកៅស៊ូស្ងួតជាចម្បងរួមមាន ប្រទេសម៉ាឡេស៊ី វៀតណាម សិង្ហបុរី និងចិន ដោយកម្ពុជាកំពុងពង្រឹងជំហររបស់ខ្លួនក្នុងនាមជាតួអង្គសំខាន់នៅលើទីផ្សារកៅស៊ូក្នុងតំបន់។
Account
Security
Favourite Content