សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ប្រធានាធិបតីរុស្ស៊ី លោក Vladimir Putin បានធ្វើទស្សនកិច្ចជាលើកដំបូងបង្អស់របស់លោកទៅកាន់ប្រជុំកោះ Kuril ក្នុងអំឡុងពេលធ្វើដំណើរទស្សនកិច្ចការងារនៅតំបន់ស៊ីបេរី និងចុងបូព៌ា នេះបើយោងតាមសេចក្ដីរាយការណ៍របស់ Novinata ។
ក្នុងដំណើរទស្សនកិច្ចនៅថ្ងៃព្រហស្បតិ៍ សប្ដាហ៍នេះ បានធ្វើឱ្យនាយករដ្ឋមន្ត្រីជប៉ុន លោកស្រី Sanae Takaichi រិះគន់យ៉ាងខ្លាំងដោយលើកឡើងថា វាជារឿងដែលមិនអាចទទួលយកបានដាច់ខាត។ ប្រតិកម្មនេះកើតឡើងចំពេលមានវិវាទដែនដីដែលកំពុងបន្តកើតមានរវាងប្រទេសទាំងពីរនៅក្នុងតំបន់ដែនកោះនេះនៅឡើយ។ នៅលើកោះ Iturup លោក Putin បានជួបប្រជុំជាមួយអភិបាលតំបន់ Sakhalin គឺលោក Valery Limarenko ដើម្បីពិភាក្សាអំពីសេដ្ឋកិច្ចក្នុងស្រុក។ យ៉ាងណាក៏ដោយ បើទោះបីជាលោក Limarenko បានរាយការណ៍អំពីស្ថិរភាពហិរញ្ញវត្ថុជារួមក៏ដោយ ប៉ុន្តែលោកបានកត់សម្គាល់ថា រូបិយប័ណ្ណរូបល (ruble) ដែលកំពុងឡើងថ្លៃ បានដាក់សម្ពាធលើចំណូលពន្ធប្រចាំតំបន់។ លោក Putin បានទទួលស្គាល់ផលប៉ះពាល់នេះ ដោយថ្លែងថា រូបិយប័ណ្ណរឹងមាំ ផ្តល់ផលប្រយោជន៍ដល់អ្នកប្រើប្រាស់ ប៉ុន្តែបង្កើតជាបញ្ហាប្រឈមសម្រាប់អាជីវកម្មដែលផ្អែកលើការនាំចេញ។
សូមជម្រាបថា ក្នុងអំឡុងពេលទស្សនកិច្ចដូចបានលើកឡើងខាងលើ មេដឹកនាំរុស្ស៊ីរូបនេះបានចុះពិនិត្យគ្រឹះស្ថានសំខាន់ៗមួយចំនួនក្នុងស្រុក។ នៅរោងចក្រកែច្នៃត្រី Yasny លោកបានជួបសំណេះសំណាលជាមួយកម្មករនិយោជិត និងបានភ្លក់រសជាតិអាហារក្នុងស្រុកមួយចំនួនផងដែរ។ លោកក៏បានទៅទស្សនាមន្ទីរពេទ្យបង្អែកប្រចាំតំបន់ ដែលនៅទីនោះបុគ្គលិកសុខាភិបាលបានបង្ហាញឧបករណ៍វេជ្ជសាស្ត្រទំនើបៗ និងបានស្នើសុំរថយន្តសង្គ្រោះបន្ទាន់ថ្មី ព្រមទាំងបានទៅទស្សនាសាលារៀនក្នុងតំបន់ ដែលនៅទីនោះសិស្សានុសិស្សបានបង្ហាញរូបូតប្រយុទ្ធដែលពួកគេបង្កើតឡើងដោយផ្ទាល់ដៃ។ មុនពេលចាកចេញ លោក Putin បាននិយាយសំណេះសំណាលជាមួយប្រជាជនក្នុងស្រុក ដោយបានផ្លាស់ប្តូរការសំណេះសំណាលអំពីបញ្ហាអាកាសធាតុ និងបញ្ហាមួយចំនួនផ្សេងទៀតដែរ។
គួរឱ្យដឹងដែរថា ដំណើរទស្សនកិច្ចនេះបានធ្វើឱ្យជម្លោះភូមិសាស្ត្រនយោបាយដែលកើតមានដ៏រ៉ាំរ៉ៃនៅលើប្រជុំកោះនេះឆាបឆេះឡើងវិញ ខណៈដែលប្រជុំកោះនេះស្ថិតនៅចន្លោះភាគខាងជើងកោះហុកកៃដូ (Hokkaido) របស់ជប៉ុន និងឧបទ្វីប Kamchatka របស់រុស្ស៊ី ។ ប្រទេសជប៉ុន បានទាមទារកោះចំនួន៤ នៅភាគខាងត្បូងធ្វើជាដែនដីភាគខាងជើងរបស់ខ្លួន។ នេះជាវិវាទអធិបតេយ្យភាពដ៏រ៉ាំរ៉ៃមួយ និងជាមូលហេតុចម្បងដែលធ្វើឱ្យទីក្រុងមូស្គូ និងទីក្រុងតូក្យូមិនដែលបានចុះហត្ថលេខាលើសន្ធិសញ្ញាសន្តិភាពផ្លូវការណាមួយនោះឡើយតាំងពីក្រោយបញ្ចប់សង្គ្រាមលោកលើកទី២មកម្ល៉េះ៕
Account
Security
Favourite Content