ភ្នំពេញ ៖ កម្ពុជា ត្រូវបានគេចាត់ទុកថាជាអ្នកនាំមុខគេក្នុងក្របខណ្ឌធុរកិច្ចបរិយាបន្ន ឬ Inclusive Business (IB)​ ទោះបីជាបច្ចុប្បន្នបញ្ជីអាជីវកម្មប្រភេទនេះចំនួនត្រឹមតែជិត២០នៅឡើយ ប៉ុន្តែពួកគេកំពុងបានជួយដល់កិច្ចខិតខំរបស់រដ្ឋាភិបាលកម្ពជាក្នុងការផ្តល់ការងារជូនពលរដ្ឋដែលមានជីវភាពក្រីក្ររាប់ពាន់នាក់។

ក្នុងចំណោមអាជីវកម្មទាំងនោះគេសង្កេតឃើញមានអាជីវកម្មមួយដែលមានឈ្មោះថា Khmer Green Charcoal ( KGC) មានប្រវត្តិអាជីវកម្មយ៉ាងហោចណាស់ជាង១០ឆ្នាំមកហើយ និងប្រកបរបររកស៊ីលើវិស័យថាមពលស្អាតតាមរយៈការផលិតធ្យូងបរិស្ថាន ឬធ្យូងអនាម័យ។ KGC ត្រូវបានបង្កើតឡើងលើកដំបូងតាំងតែពីឆ្នាំ២០១០មកម្ល៉េះ ក្នុងរូបភាពជាអង្គការមិនស្វែងរកប្រាក់ចំណេញ ប៉ុន្តែបានត្រឹម២ឆ្នាំដោយសារមានគោលដៅច្បាស់ក្នុងការអភិវឌ្ឍ និងរំពឹងស្វែងរកប្រាក់ចំណេញមកវិញខ្លះនោះ KGC បានសម្រេចចិត្ត
ផ្លាស់ប្តូរខ្លួនមកជាធុរកិច្ចបរិយាបន្នវិញ។

ដោយសារការព្យាយាមបំប្លែងខ្លួនតាមរយៈការដាក់បញ្ចូលបច្ចេកវិទ្យាថ្មីៗបន្ថែមឲ្យសមស្របទៅនឹងឧស្សាហកម្មបច្ចុប្បន្នផងនោះ KGC ត្រូវបានគេទទួលស្គាល់ថាជាអ្នកដែលមានជំនាញផ្នែកផលិតធ្យូងអនាម័យដែលមានគុណភាពបំផុតមិនប៉ះពាល់ដល់បរិស្ថាន និងមាននិរន្តភាពបំផុតចំពោះបរិស្ថាន។

តើអ្វីទៅជាគំរូអាជីវកម្ម និងរបៀបប្រកបអាជីវកម្មរបស់ KGC នៅពេលបច្ចុប្បន្ននេះ ?

ក្រៅតែពីផ្តល់គុណតម្លៃទៅលើទំនិញដែលខ្លួនផលិតតាមរយៈការលក់ទៅលើទីផ្សារ និងមានពលរដ្ឋមានជីវភាពខ្សត់ខ្សោយប្រើប្រាស់ហើយនោះ​ គេក៏បានដឹងថា KGC ក៏តែងតែផ្តល់ឳកាសទៅដល់ពលរដ្ឋក្រីក្រ ជាពិសេសស្ត្រី ដោយក្នុងនោះប្រមាណជា៤០ភាគរយនៃបុគ្គលិកនៅ KGC គឺជាស្ត្រី ខណៈដែលសហគ្រាសមួយនេះបានផ្តោតលើការយកប្រាក់ចំណូលក្នុងចំនួនតិចប៉ុណ្ណោះ។

អ្វីដែលយើងមើលឃើញបន្ថែមលើសពីនេះ បច្ចុប្បន្ន KGC ក៏កំពុងធ្វើការងារយ៉ាងជិតស្និទ្ធជាមួយនឹងអង្គការគាំពារកុមារ PSE ​ដែលក្រុមការងារភាគច្រើនត្រូវបានជ្រើសរើសចេញពីទីនេះ ហើយពួកគេសុទ្ធតែជាក្រុមគ្រួសារដែលមានជីវភាពទីទាល់ក្រខ្លាំងនៅក្នុងរាជធានីភ្នំពេញ។ KGC អនុវត្តខ្ជាប់ខ្ជួនតាមស្តង់ការងាររបស់សហភាពអឺរ៉ុបដោយក្រុមបុគ្គលិកទាំងអស់អាចបញ្ចូនកូនៗរបស់ពួកគេទៅទទួលយកការសិក្សាក្រោមជំនួយហិរញ្ញវត្ថុពីសំណាក់ KGC ។

អ្វីដែលជាកត្តាជះឥទ្ធិពលជាវិជ្ជមានជូនសង្គម គឺ KGC បានបំពេញការងារបានយ៉ាងល្អតាមរយៈការលក់ធ្យូងអនាម័យរបស់ខ្លួនទៅកាន់អតិថនដែលមានបែងចែកជា២គឺអតិថិជនមានជីវភាពក្រីក្រខ្លាំង២០ភាគរយ និងអតិថិជនមានជីវភាពក្រីក្រ២០ភាគរយ ព្រមទាំងកម្រិតមធ្យម៥០ភាគរយ ហើយ១០ភាគរយទៀតជាប្រភេទអតិថិជនមានជីវភាពមធ្យមកម្រិតខ្ពស់១០ភាគរយផ្សេងទៀត ដែលពួកគេភាគច្រើនអាចមានលទ្ធភាពចំណាយសម្រាប់ហ្គាស ខណៈដែល៩០ភាគរយផ្សេងនោះអាចទិញត្រឹមអុសដុតប៉ុណ្ណោះ។

បច្ចុប្បន្ន ធ្យូងអនាម័យរបស់ KGC មានតម្លៃប្រមាណជា១៧០០រៀលក្នុងមួយគីឡូក្រាម ហើយបើទោះបីជាតម្លៃធ្យូងអនាម័យនេះខ្ពស់ជាងបន្តិចធៀបទៅនឹងតម្លៃអុសមួយបាច់ត្រឹម៩០០ និងធ្យូងធម្មតាលក់លើទីផ្សារ ១៥០០រៀលក្តី ប៉ុន្តែវាជាធ្យូងដែលមិនប៉ះពាល់ដល់សុខភាពអ្នកប្រើប្រាស់ និងជួយដល់បរិស្ថាន។ បន្ថែមពីនេះ វាក៏អាចប្រើប្រាស់បានយូរជាងធ្យូងធម្មតា ជួយសន្សំសំចៃថាមពលរហូតដល់ទៅ៤០០ភាគរយ ឬគិតជាលុយប្រមាណជា១៩ ទៅ ២៣ដុល្លារក្នុងមួយខែ៕