បរទេស ៖ យោងតាមប្រភពពី The Travel បានលើកឡើងថា អាស៊ីជាទ្វីបដែលមានវប្បធម៌ចម្រុះច្រើនបំផុត និងជាតំបន់ដែលមានសេដ្ឋកិច្ចរីកចម្រើនខ្លាំងក្នុងរយៈពេលជាច្រើនឆ្នាំមកនេះ ហើយបានទទួលស្វាគមន៍ជនបរទេសមកពីគ្រប់មជ្ឈដ្ឋាន។

បើ​និយាយ​ពី​វិស័យ​ទេសចរណ៍ ទ្វីបនេះពោរពេញទៅដោយកន្លែងទេសចរណ៍ល្បីៗជាច្រើន និងមាន​រឿង​ជា​ច្រើន​ដែល​ត្រូវ​​ធ្វើ។ មិនត្រឹមតែប៉ុណ្ណោះ អាស៊ីក៏ជាទ្វីបដែលមានប្រជាជនច្រើនបំផុត និងសម្បូរទីក្រុងមានតម្លៃថ្លៃៗនៅលើពិភពលោកផងដែរ។ ខាងក្រោមនេះគឺជាទីក្រុងថ្លៃបំផុតទាំង ១០ នៅអាស៊ី ដែលជាប់ចំណាត់ថ្នាក់ផ្អែកលើតម្លៃនៃការរស់នៅ។

១. សិង្ហបុរី៖ តម្លៃរស់នៅ ឬការចំណាយក្នុងជីវភាពជាមធ្យម ៣ ២៨៥ ដុល្លារក្នុងម្នាក់។ ទីក្រុងនេះមានទំហំផ្ទៃដីតូចជាមួយនឹងកំណើនចំនួនប្រជាជនដែលកំពុងកើនឡើង ទាំងប្រជាជនស្រុក និងជនបរទេស ដែលពួកគេគឺជាអ្នករួមចំណែកដ៏សំខាន់មួយចំពោះការចំណាយខ្ពស់ក្នុងការរស់នៅរបស់ខ្លួន។ ប្រជាជនពឹង​ផ្អែក​លើ​អាហារ​ដែល​នាំ​ចូល ដោយសារសិង្ហបុរី​ខ្វះ​ធនធាន​ធម្មជាតិ ដែលជាលទ្ធផលពួកគេប្រឈមនឹងតម្លៃម្ហូបអាហារ និងភេសជ្ជៈថ្លៃជាងទីក្រុងដទៃទៀតនៅទូទាំងទ្វីប។ លើសពីនេះ តម្លៃផ្ទះប្រែប្រួលអាស្រ័យលើទីតាំង ហើយតម្លៃជួលជាមធ្យម ២ ១០០ ដុល្លារក្នុងមួយខែ។ ប្រសិនបើភ្ញៀវទេសចរណ៍គ្រោងនឹងស្នាក់នៅក្នុងអាផាតមិនប្រណិតលំដាប់ខ្ពស់នឹងត្រូវចំណាយចន្លោះពី ៨៣០០ ទៅ ១៣ ០០០ ដុល្លារក្នុងមួយខែសម្រាប់ជួល។ នេះគឺជាលើកទី ៩ ហើយ ដែលសិង្ហបុរីនៅតែជាទីក្រុងដែលថ្លៃជាងគេបំផុតនៅលើពិភពលោកក្នុងរយៈពេល ១១ ឆ្នាំកន្លងមកនេះ។

២. ហុងកុង​៖ តម្លៃរស់នៅជាមធ្យម ២ ៧៣៣ ដុល្លារក្នុងម្នាក់ ក្នុង​ទីក្រុង​ថ្លៃ​បំផុត​ទី​ពីរនៅក្នុង​ពិភពលោក និង​តំបន់អាស៊ី។ ការជួលផ្ទះ គឺជាមូលហេតុចំបងដែលប្រជាជនត្រូវចំណាយខ្ពស់។ លើសពីនេះ ការហូរចូលនៃភ្ញៀទេសចរបានបង្កើនតម្លៃកន្លែងស្នាក់នៅ និងតម្លៃអាហារមួយចំនួន។ បន្ថែមពីនេះ ការ​នាំ​ចូល​អាហារ និង​ទំនិញ​ផ្សេង​ៗ​បាន​រួម​ចំណែក​ធ្វើ​ឱ្យ​ហុងកុងមានតម្លៃ​រស់នៅ​ថ្លៃ ។ យ៉ាងណាមិញ ជនបរទេសត្រូវបានផ្តល់ប្រាក់ខែខ្ពស់ ដែលធ្វើឲ្យគុណភាពនៃជីវិតមានស្តង់ដារល្អនៅក្នុងទីក្រុង។

៣. ទីក្រុងសេអ៊ូល៖ តម្លៃរស់នៅជាមធ្យម ១ ៤៨៦ ដុល្លារក្នុងម្នាក់។ ទីក្រុងសេអ៊ូលជាប់ចំណាត់ថ្នាក់ទី ៣ ក្នុងចំណោមទីក្រុងដែលថ្លៃបំផុតនៅអាស៊ី។ មូលហេតុចំបងនៃតម្លៃរស់នៅថ្លៃក្នុងទីក្រុងសេអ៊ូល គឺដោយសារតម្លៃផ្ទះ និងប្រាក់បញ្ញើសុវត្ថិភាព។ លើសពីនេះ អាហារឆ្ងាញ់ៗ បទពិសោធន៍ជីវិតពេលរាត្រី និងការដើរទិញឥវ៉ាន់មានតម្លៃថ្លៃនៅក្នុងទីក្រុងនេះ។ ដូច្នោះហើយ សម្រាប់អ្នកធ្វើដំណើរដែលចូលចិត្តរបៀបរស់នៅបែបប្រណីតនឹងត្រូវចំណាយប្រាក់យ៉ាងច្រើន។

៤. ទីក្រុងយូកូហាម៉ា៖ តម្លៃរស់នៅជាមធ្យម ១ ៤១១ ដុល្លារក្នុងម្នាក់។ ទីក្រុងយូកូហាម៉ា គឺជាទីក្រុងមានតម្លៃថ្លៃមួយនៅអាស៊ី ដោយភ្ជាប់មកជាមួយនូវគុណសម្បត្តិ និងគុណវិបត្តិពិសេសនៃការរស់នៅទីនោះ។ វាមានន័យថា ទីតាំងលំនៅដ្ឋាននៅទីក្រុងនេះមានតម្លៃថ្លៃ ហើយជនបរទេសអាចនឹងបង់ថ្លៃជួលផ្ទះ ៦៦៩ ដុល្លារក្នុងមួយខែសម្រាប់មនុស្សតែម្នាក់ និងប្រហែល ១ ៣០៥ ដុល្លារសម្រាប់គ្រួសារដែលមានសមាជិក ៤ នាក់។ ទីក្រុងនេះអំណោយផលសម្រាប់ការរស់នៅជាក្ខណៈគ្រួសារ ដែលមានសួនកម្សាន្ត សាលារៀន និងសកម្មភាពកម្សាន្តជាច្រើនទៀត។

៥. ទីក្រុងតូក្យូ៖ តម្លៃរស់នៅជាមធ្យម ១ ៣៦៣ ដុល្លារក្នុងម្នាក់។ តូក្យូមានភាពល្បីល្បាញដោយសារជាច្រកទ្វារសំខាន់ទៅកាន់ប្រទេសជប៉ុន ជាមជ្ឈមណ្ឌលហិរញ្ញវត្ថុ និងពាណិជ្ជកម្មអន្តរជាតិ។ អ្វី​ដែល​ធ្វើ​ឱ្យ​វា​ក្លាយ​ជា​ទីក្រុង​ថ្លៃ​បំផុត​មួយ​នៅ​អាស៊ី​ គឺដោយសារចំនួនមនុស្សដ៏សន្ធឹកសន្ធាប់។ ទីក្រុងនេះមានសេវាដឹកជញ្ជូនសាធារណៈយ៉ាងរហ័ស ដែលមានន័យថាទាំងប្រជាជនក្នុងស្រុក និងអ្នកធ្វើដំណើរអាចធ្វើដំណើរបានយ៉ាងងាយស្រួល ប៉ុន្តែការរស់នៅទីនោះនឹងនៅតែមានតម្លៃថ្លៃ។ ការជួលផ្ទះ គឺជាហេតុផលចម្បងនៃការចំណាយខ្ពស់។

៦. សៀងហៃ៖ តម្លៃរស់នៅជាមធ្យម ១ ១៦៥ ដុល្លារក្នុងម្នាក់ ។ សៀងហៃ គឺទីក្រុងដ៏ធំបំផុតមួយរបស់ប្រទេសចិន ព្រមទាំងជាទីក្រុងដែលមានតម្លៃថ្លៃបំផុតមួយទាំងនៅក្នុងតំបន់អាស៊ី និងពិភពលោកផងដែរ។ ទីក្រុងសៀងហៃ ត្រូវបានគេហៅថាជា ‘Paris of the East’ ដោយសារវាសម្បូរទៅដោយអាផាតមិនប្រណិតលំដាប់ខ្ពស់ និងផ្ទះល្វែង ប៉ុន្តែជាមធ្យម ជនបរទេសអាចនឹងបង់ជាមធ្យម ៦១៣ ដុល្លារសម្រាប់ការជួល។ ទីក្រុងនេះមានជីវិតពេលរាត្រីដ៏រស់រវើកជាមួយនឹងក្លឹប និងបារជាច្រើនផងដែរ។

៧. តៃប៉ិ ៖ តម្លៃរស់នៅជាមធ្យម ១ ១៣៦ ដុល្លារក្នុងម្នាក់។ តៃប៉ិត្រូវបានជាប់ឈ្មោះជាគោលដៅសុវត្ថិភាព និងស្រស់ស្អាតបំផុតមួយនៅអាស៊ីបូព៌ា និងម្ហូបអាហារទាក់ទាញ ភាពរួសរាយរាក់ទាក់ស្វាគមន៍របស់អ្នកស្រុក ប្រព័ន្ធថែទាំសុខភាពលំដាប់ពិភពលោក និងអ្វីៗជាច្រើន។ តៃប៉ិ ជារាជធានីរបស់តៃវ៉ាន់ និងជាទីក្រុងដែលមានតម្លៃថ្លៃបំផុតនៅអាស៊ីសម្រាប់ឆ្នាំនេះផងដែរ ដោយតម្លៃនៃការស្នាក់នៅក្នុងទីក្រុងមានភាពខុសប្លែកគ្នាអាស្រ័យលើទីតាំង និងទំហំ។ ជាមធ្យម ជនបរទេសអាចបង់ ៥០១ លើថ្លៃជួលផ្ទះ។ ទន្ទឹមនឹងនេះ ភ្ញៀវទេសចរណ៍អ្នកអាចកម្សាន្តជាមួយនឹងសកម្មភាពជាច្រើននៅទីក្រុងតៃប៉ិ ដែលជារាជធានីវប្បធម៌របស់តៃវ៉ាន់។

៨. ទីក្រុងប៉េកាំង៖ តម្លៃរស់នៅជាមធ្យម ១ ១១៦ ដុល្លារក្នុងម្នាក់ ។ ទីក្រុងប៉េកាំងត្រូវបានទទួលស្គាល់ថាជាទីក្រុងដ៏ស្រស់ស្អាតបំផុតមួយរបស់ប្រទេសចិន និងក្នុងចំណោមទីក្រុងដែលមានតម្លៃថ្លៃបំផុតនៅអាស៊ី ជាមួយនឹងលំនៅដ្ឋានមានតម្លៃថ្លៃ។ ដើម្បីបង់ថ្លៃជួល និងឧបករណ៍ប្រើប្រាស់ក្នុងផ្ទះ ជនបរទេសនឹងត្រូវចំណាយប្រហែល ៦៣៨ ដុល្លារក្នុងមួយខែ។ ការចំណាយផ្សេងទៀត ដូចជាអាហារ និងការដឹកជញ្ជូន អាស្រ័យលើរបៀបរស់នៅរបស់មនុស្សម្នាក់ ប៉ុន្តែសេវាកម្មទាំងនេះពិតជាមានតម្លៃថ្លៃសម្រាប់អ្នកចង់បានគុណភាពជីវិតខ្ពស់។

៩. ទីក្រុងបាងកក៖ តម្លៃរស់នៅជាមធ្យម ៩៥៨ ដុល្លារក្នុងម្នាក់ ។ ចំនួនប្រាក់ដែលនឹងត្រូវការនៅទីក្រុងបាងកកនឹងប្រែប្រួលអាស្រ័យលើតម្រូវការ និងថវិការបស់បុគ្គលម្នាក់ៗ ប៉ុន្តែជនបរទេសត្រូវចំណាយជាមធ្យម ៩៥៨ ដុល្លារសម្រាប់មនុស្សម្នាក់ដើម្បីរស់នៅយ៉ាងសុខស្រួលនៅក្នុងទីក្រុងមួយនេះ។ គ្រួសារមានសមាជិកបួននាក់គួរចំណាយ ២ ៧៩៥ ដុល្លារ ហើយជាមធ្យម ៤៤៥ ដុល្លារសម្រាប់ជួលផ្ទះ មានន័យថា លំនៅដ្ឋានគឺជាមូលហេតុចម្បងនៃតម្លៃរស់នៅខ្ពស់។ ទីក្រុងបាងកកត្រូវបានគេស្គាល់ថា មានកម្រិតខ្ពស់នៃការអភិវឌ្ឍន៍ ហើយជាទីក្រុងមួយក្នុងចំណោមទីក្រុងដែលមានតម្លៃថ្លៃបំផុតនៅអាស៊ី។

១០. ស៊ីនឈី៖ តម្លៃរស់នៅជាមធ្យម ៨៤៤ ដុល្លារក្នុងម្នាក់ ។ ទីក្រុងស៊ីនឈី គឺជាគោលដៅដ៏គួរឱ្យភ្ញាក់ផ្អើលបំផុតមួយនៅអាស៊ីបូព៌ា ដែលល្បីល្បាញដោយសារការលាយបញ្ចូលគ្នាដ៏អស្ចារ្យនៃវប្បធម៌ប្រពៃណីតៃវ៉ាន់ និងបរិក្ខារទំនើបៗ។ តម្លៃនៃការរស់នៅក្នុងទីក្រុងស៊ីនឈី ត្រូវបានចាត់ទុកថាជាថ្លៃបំផុតនៅតៃវ៉ាន់ ហើយមនុស្សម្នាក់នឹងចំណាយប្រាក់ ៣១៤ ដុល្លារលើថ្លៃជួលផ្ទះ និងប្រហែល ៨១៤ ដុល្លារសម្រាប់គ្រួសារដែលមានសមាជិក ៤ នាក់៕