ភ្នំពេញ ៖ អ្នកជំនាញផ្នែកកសិកម្មបានអះអាងថា ការចេះបែងចែកផ្ទៃដីទំនេរនៅជុំវិញផ្ទះបង្កើតជាកន្លែងដាំដំណាំជាលក្ខណៈគ្រួសារ គឺជាសកម្មភាពមួយដ៏ត្រឹមត្រូវ និងគួរតែអនុវត្ត ត្បិតថា ទោះជាមិនអាចផ្តល់នូវកម្រៃជាដុំកំភួន ប៉ុន្តែយ៉ាងហោចណាស់ក៏អាចផ្គត់ផ្គង់ជាបន្លែម្ហូបអាហារប្រចាំថ្ងៃ កាត់បន្ថយចំណាយលើការទិញបន្លែនៅផ្សារដែលមានប្រើជីគីមី និងអាចប៉ះពាល់ដល់សុខភាព។

នៅក្នុងអំឡុងពេលដែលមានភាពគំរាមកំហែងពីជំងឺឆ្លងកូវីដ-១៩អស់រយៈពេលជាង២ឆ្នាំកន្លងមកនេះ គេសង្កេតឃើញថា អ្នកដែលរស់នៅក្នុងតំបន់ទីប្រជុំជន និងទីក្រុងចាប់ផ្តើមចេះកែច្នៃផ្ទៃដីដែលនៅទំនេរ ឬទីធ្លានៅជុំវិញផ្ទះ ឬផ្ទៃទំនេរចោលលើដំបូលផ្ទះ (ផ្ទះដំបូលពិដាន) ឱ្យក្លាយជាកន្លែងដាំដំណាំងាយៗ ផ្ដល់នូវទិន្នផលបន្លែល្អៗសម្រាប់ទទួលទានជាលក្ខណៈគ្រួសារ។ 

លោក ទេព​ ចាន់ដារ៉ា ជាសាស្ត្រាចារ្យនៅ​វិទ្យាស្ថានជាតិ កសិកម្មព្រែកលៀប បានមានប្រសាសន៍ថា សម្រាប់ការចំណាយពេលដំណាំនៅលើដីទំនេរនៅជុំវិញផ្ទះ ដូចជា ដើមជី ម្ទេស ខ្ទឹម ស្លឹកគ្រៃ ត្រប់ ក៏ដូចជាបន្លែងាយៗផ្សេងទៀតសព្វបែបយ៉ាងគឺជាទង្វើដ៏ល្អបំផុត។

លោកបន្តថា ៖

“មួយរយៈកន្លងមកនេះ តាមបទពិសោធន៍ផ្ទាល់ខ្លួនរបស់ខ្ញុំ និងគ្រួសារ បានធ្វើការដាំដុះក្នុងទ្រង់ទ្រាយតូចមួយនៅលើដំបូលផ្ទះ រួមមានបន្លែ និងដំណាំមួយចំនួនទៀត ហើយជាលទ្ធផលគឺអាចទទួលបានផលជាបន្តបន្ទាប់ បើទោះជាមិនអាចយកទៅលក់ទទួលបានចំណូលសម្រាប់ផ្គត់ផ្គង់ជីវភាពគ្រួសារ ប៉ុន្តែយ៉ាងណាស់ក៏អាចជួយកាត់បន្ថយចំណាយបានមួយចំនួនទៅលើការទិញបន្លែបង្ការនៃមុខម្ហូបប្រចាំថ្ងៃផងដែរ ហើយវាក៏មានភាពល្អប្រសើរចំពោះសុខភាពដោយសារតែដំណាំរបស់យើងមិនមានប្រើថ្នាំគីមី ដើម្បីជំរុញការលូតលាស់នោះដែរ”

ជាទូទៅ ចំពោះការដាំដំណាំងាយៗទាំងនោះរួមមានដូចជា ជី ម្ទេស ស្លឹកគ្រៃ ខ្ទឹម ជាដើមគឺគេអាចដាំបាននៅទីកន្លែងតូចចង្អៀត ឬផើងបាន។ និយាយជារួម បើទោះជាអ្នកដែលរស់នៅផ្ទះថ្ម ក៏អាចដាំបានដូចគ្នាដោយការប្រើធុងជ័រ ឬប្រើឡាំងស្នោរធ្វើជាផើងសម្រាប់ដាក់ដី ដោយលៃយ៉ាងណាឱ្យមានទឹកស្រោចតិចតួច និងពន្លឺថ្ងៃជាការស្រេច។  ក្រៅពីនេះ គេក៏អាចដាំបន្លែផ្សេងទៀតដូចជា ត្រកួន ស្ពៃ ប៉េងប៉ោះ ត្រប់ជាដើម ដែលអាចឱ្យផលលឿន ផ្ដល់ប្រយោជន៍ដល់សុខភាព និងអាចចម្អិនជាអាហារក្នុងគ្រួសារយ៉ាងឆ្ងាញ់ពិសា។

លោក ទេព​ ចាន់ដារ៉ា បញ្ជាក់ទៀតថា​ ៖

“ដំណាំដែលងាយស្រួលដាំជាងគេ គឺត្រកួន សាឡាដ ពោតបារាំង ប៉េងប៉ោះ ដែលយើងអាចទិញគ្រាប់ពីទីផ្សារយកមកបណ្ដុះបាន។ សម្រាប់វិធីសាស្ត្រនៃការបណ្ដុះ ដំបូងឡើយ យើងត្រូវត្រាំគ្រាប់ទាំងនោះដោយរើសយកគ្រាប់ណាដែលអណ្ដែតចេញ ចំណែកឯគ្រាប់ល្អ យើងត្រាំប្រមាណមួយម៉ោង រួចស្រង់មកដាក់ក្នុងស្បៃ ហើយទុកមួយថ្ងៃ។ ថ្ងៃបន្ទាប់ យើងយកគ្រាប់ដែលបានស្រង់ចេញដាក់នៅក្នុងស្បៃទាំងនោះទៅកប់លើដីជម្រៅរាក់ៗជាការស្រេច ហើយរង់ចាំរយៈពេលដាំដុះប្រមាណ ៣-៤ ថ្ងៃ វានឹងដុះចេញជាស្លឹកតូចៗ ហើយបន្តរង់ចាំរយៈពេលប្រមាណ៣សប្ដាហ៍ យើងអាចកាត់បានត្រឹម ១៤ថ្ងៃក៏បាន (សម្រាប់ប្រភេទដំណាំត្រកួន)”

យ៉ាងណាក៏ដោយ លោកសាស្ត្រាចារ្យ ទេព​ ចាន់ដារ៉ា ក៏បានលើកទឹកចិត្តឱ្យបងប្អូនចំណាយពេលវេលាបន្តិចបន្តួចងាកមកដាំដំណាប៉ុន្មានមុខខាងលើនេះ ដោយសារតែវាស្រួលដាំ បានផលលឿន និងអាចច្នៃដីកន្លែងទំនេរនៅជុំវិញផ្ទះឱ្យក្លាយជាមានប្រយោជន៍៕