ភ្នំពេញ ៖ នៅកម្ពុជាមានតែក្រុមហ៊ុនធានារ៉ាប់រងហ្វតតេ (FORTE) តែមួយគត់ដែលបានទទួលពានរង្វាន់ចំនួនពីរ គឺពានក្នុងស្រុក១ និងពានរង្វាន់ប្រទេសអាស៊ាន​១ ក្នុងនាមជាក្រុមហ៊ុនគំរូអាជីវកម្មបរិយាបន្ននៅកម្ពុជា និងចាត់ទុកថាមោទកភាពរបស់ប្រទេសកម្ពុជា។

សូមជម្រាបថា អាជីវកម្មដែលអាចចាត់ចូលជាគំរូអាជីវកម្មបរិយាបន្ន (Inclusive Business – IB) គឺជាប្រភេទគំរូអាជីវកម្មដែលអាចបង្កើតចំណូលក្នុងកម្រិតមួយដែលអាចស្ថិតស្ថេរបានយូរអង្វែង អាចមានលទ្ធភាពជួយសហគមន៍លើសពីការធ្វើអាជីវកម្មធម្មតា ឬអាជីវកម្មសង្គម ដែលពិភពលោកកំពុងមានទំនោរទៅរក ហើយអាជីវកម្មបរិយាបន្ននេះ បានរួមចំណែកយ៉ាងធំទៅក្នុងការជំរុញសេដ្ឋកិច្ចសង្គមជាតិ។

ជាប្រទេសកំពុងអភិវឌ្ឍន៍ស្រាប់ផងនោះ ការជំរុញអាជីវកម្មទូទៅឱ្យក្លាយទៅជាអាជីវកម្មបរិយាបន្ន គឺពិតជាមានសារៈសំខាន់ណាស់សម្រាប់កម្ពុជា ព្រោះថា អាជីវកម្មបរិយាបន្ន គឺជាអាជីវកម្មឈរលើគោលការណ៍ធុរកិច្ចដែលបង្កើតដំណោះស្រាយជា​ប្រព័ន្ធ មានភាពច្នៃប្រឌិត និងមានទ្រង់ទ្រាយធំ ឆ្លើយតបទៅនឹងបញ្ហាប្រឈមពាក់ព័ន្ធរបស់ប្រជាជនក្រីក្រ និងប្រជាជនមានចំណូលទាប (BoP និង B40)។

លោក យក់ ចំរើនឬទ្ធិ ប្រធានអគ្គនាយកប្រតិបត្តិក្រុមហ៊ុនធានារ៉ាប់រង ហ្វតតេ បានលើកឡើងពីសារៈសំខាន់ដែលបានរង្វាន់នេះដោយលោកបានមានប្រសាសន៍ថា នេះគឺជាព្រឹត្តិការណ៍ដ៏មានមោទនភាព និងជាប្រវត្តិសាស្ត្រសម្រាប់ក្រុមហ៊ុនរ៉ាប់រងអាយុជីវិត និងធានារ៉ាប់ ហ្វតតេ ក្នុងនាមជាក្រុមហ៊ុនធានារ៉ាប់រងក្នុងស្រុកឈានមុខគេរបស់ប្រទេសកម្ពុជា។

លោក យក់ ចំរើនឬទ្ធិ បានគូសបញ្ជាក់ថា ក្រុមហ៊ុនត្រូវបានបង្កើតឡើងតាមរយៈការរួមបញ្ចូលគ្នា ដើម្បីផ្តល់សំណាញ់សុវត្ថិភាពសម្រាប់មនុស្សគ្រប់រូប និងអាជីវកម្មនៅគ្រប់កម្រិតនៃសង្គម ដើម្បីទទួលបានកិច្ចការពារផ្នែកហិរញ្ញវត្ថុនៅក្នុងតំបន់អាស៊ីអាគ្នេយ៍ដែលកំពុងរីកចម្រើនខ្លាំង ។

លោកបានបញ្ជាក់យ៉ាងដូច្នេះថា ៖

«ចក្ខុវិស័យរបស់យើងគឺផ្តល់កិច្ចការពារ និងផ្តល់សិទ្ធិអំណាចដល់មនុស្សគ្រប់រូបនៅក្នុងតំបន់សម្រាប់អនាគតដ៏ល្អប្រសើរ មនុស្សម្នាក់ អាជីវកម្មមួយ ក្នុងពេលតែមួយ ។ បេសកកម្មរបស់យើងគឺផ្តល់ជូននូវផលិតផល និងសេវា​កម្មដែលផ្តោតសំខាន់លើអតិថិជនប្រកបដោយភាពច្នៃប្រឌិត កសាងសមត្ថភាពមនុស្ស និងរួមចំណែកដល់វឌ្ឍ​ន​ភាពនៃឧស្សាហកម្មធានារ៉ាប់រងនៅក្នុងទីផ្សារដែលយើងប្រតិបត្តិ»។

លោកនី លីហួង នាយកផ្នែកធានារ៉ាប់រងខ្នាតតូច និងកសិកម្មនៃក្រុមហ៊ុនធានារ៉ាប់រង ហ្វតតេ បានឱ្យដឹងថា ក្រុមហ៊ុនបានធ្វើការធានារ៉ាប់រងដល់កសិករជាង១០ឆ្នាំមកហើយ។ ជាគោលការណ៍របស់ក្រុមហ៊ុនបានផ្ដល់សេវាដល់កសិករ និងផ្ដល់ការគាំទ្រដល់គោលនយោបាយរដ្ឋាភិបាល ផ្ដល់ការធានារ៉ាប់រងផ្នែកកសិកម្ម ដោយចូលរួមចំណែកកាត់បន្ថយហានិភ័យដែលអាចធានាបានដល់ប្រជាកសិករធ្វើឱ្យការងារកសិកម្មរបស់កសិករកាន់តែមានប្រសិទ្ធភាព ដោយហានិភ័យមួយចំនួនត្រូវបានធានាដោយសេវាធានារ៉ាប់រង។

លោក នី លីហួង បានបញ្ជាក់ថា ៖ 

«សម្រាប់ ហ្វតតេ ក្នុងលក្ខខណ្ឌ ដែលទទួលពានរង្វាន់ចំនួនពីរ គឺយើងមានចំណុចធំៗពីរ គឺ៖ ទីមួយ អតិថិជនគោលដៅរបស់យើងជាក្រុមហ៊ុនធានារ៉ាប់រងធម្មតា គេផ្ដល់ធានារ៉ាប់រងដល់អតិថិជនគោលដៅរបស់គេ គឺច្រើនតែមានជីវភាពធូរធានៅតាមទីក្រុងប្រជុំជន ។ ដោយឡែក ហ្វតតេ យើងធ្វើលើសពីហ្នឹង ដោយអតិថិជនមានជីវភាពធូរធារដែលនៅទីប្រជុំជន ទីក្រុងក៏យើងធ្វើ នៅតាម ឃុំ ស្រុក និងជនបទដាច់ស្រយាលក៏យើងធ្វើផងដែរ»។

លោកបន្តទៀតថា ៖

«ទីពីរ គឺយើងអនុញ្ញាតឱ្យពួកគាត់តាមរយៈផលិតផល ឬសេវាកម្មរបស់យើងឱ្យគាត់អាចប្រើប្រាស់បានគឺជាប័ណ្ណធានារ៉ាប់រងរបស់យើង ដែលគាត់ងាយទិញបាន ហើយគាត់រកកន្លែងទិញដែលនៅជិតគាត់បាន ហើយប័ណ្ណរបស់យើងគាត់ងាយយល់ ងាយស្រួលប្រើ។ បើគិតទៅដល់អតិថិជនជាកសិករដែលប្រើផលិតផលរបស់យើង គឺយើងគិតតែប្រជាពលរដ្ឋដែលប្រើប្រាស់ប័ណ្ណធានារ៉ាប់រងនៅក្នុងវិស័យកសិកម្ម គឺយើងមានអតិថិជននេះប្រមាណជាងកន្លះលាននាក់»។

សូមបញ្ជាក់ថា ក្រុមហ៊ុនធានារ៉ាប់រង ហ្វតតេ ដែលទទួលពានរង្វាន់ចំនួនពីរ គឺពានក្នុងស្រុករបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងពានរង្វាន់ Global Banking & Finance Review Awards ដែលល្បីល្បាញសម្រាប់ស្តង់ដារខ្ពស់ ដោយការជ្រើសរើសអ្នកឈ្នះនេះផ្អែកលើការច្នៃប្រឌិត សមិទ្ធផល និងឧត្តមភាពជាយុទ្ធសាស្ត្រ។ ការទទួលស្គាល់ជាប់លាប់របស់ Forte ដោយ Global Banking & Finance Review គូសបញ្ជាក់ពីជំហររបស់ខ្លួនក្នុងនាមជាអ្នកនាំមុខគេក្នុងវិស័យឧស្សាហកម្មក្នុងប្រទេសកម្ពុជា ជាមួយនឹងចំណែកទីផ្សាររហូតដល់៤៤ភាគរយអស់រយៈពេលជាង២០ឆ្នាំកន្លងមកហើយ៕