សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ប្រព័ន្ធធនាគារ បើនិយាយឱ្យស្រួលស្ដាប់ទៅគឺជាដំណើរការនៃការយកប្រាក់បញ្ញើរទៅផ្ញើរនឹងធនាគាររបស់ប្រជាជនដែលមានប្រាក់ ហើយភាគីធនាគារជាអ្នកបង្វិលប្រាក់នោះទៅឱ្យប្រជាជនដែលមានតម្រូវការខ្ចី។
លោកស្រី ផល ឆាលម៍ ធានី អគ្គលេខាធិការនៃសមាគមធនាគារនៅកម្ពុជាបានលើកឡើងថា ប្រព័ន្ធធនាគារមានគោលបំណង២សំខាន់ គឺកាត់បន្ថយភាពក្រីក្រ និងជួយឱ្យប្រព័ន្ធសេដ្ឋកិច្ចរីកចម្រើន។
ក្នុងន័យនេះ លោកស្រីបានបកស្រាយថា ការកាត់បន្ថយភាពក្រីក្រគឺធ្វើឡើងតាមរយៈធនាគារដែលគាត់មានសេវាជាច្រើនតម្រូវទៅតាមតម្រូវការរបស់ប្រជាជន។
លោកស្រីបន្តពន្យល់ថា៖
«សម្រាប់ការធ្វើឱ្យសេដ្ឋកិច្ចរីកចម្រើនគឺយើងសាកគិតមើលថា បើប្រទេសមួយមិនមានធនាគារ តើប្រជាជនយើងយកលុយទុកនៅកន្លែងណា? ពីមុនមក យើងយកលុយទុកនៅក្រោមគ្រែ ក្រោមខ្នើយ ដែលទាំងអស់នោះមានហានិភ័យខ្ពស់ ហើយបើគាត់ត្រូវការលុយ តើគាត់ទៅខ្ចីអ្នកណា គាត់មានតែខ្ចីបងប្អូនគាត់ ឬកម្ចីក្រៅផ្លូវការផ្សេងៗ ដែលអាចផ្ដល់ហានិភ័យនាពេលក្រោយ»។
នៅក្នុងការធ្វើឱ្យប្រសើរឡើងនូវសេដ្ឋកិច្ចនេះ ធនាគារមិនត្រឹមតែផ្ដល់កម្ចីជាលក្ខណៈបុគ្គលនោះទេ ប៉ុន្តែធនាគារក៏មានចំណែកក្នុងការធ្វើឱ្យអាជីវកម្មមានការរីកចម្រើនផងដែរ។ ទាក់ទិននឹងចំណុចនេះដែរ លោក ផល វ៉ាន់ឌី អគ្គលេខាធិការនៃសមាគមមីក្រូហិរញ្ញវត្ថុកម្ពុជាបានបន្ថែមថា ប្រព័ន្ធមីក្រូហិរញ្ញវត្ថុ មានដំណើរការស្រដៀងនឹងប្រព័ន្ធធនាគារដែរ គ្រាន់តែថាធនាគារ ផ្ដល់កម្ចីដល់ប្រជាជនដែលមានប្រាក់ចំណូលខ្ពស់ជាង រីឯមីក្រូហិរញ្ញវត្ថុផ្ដោតលើប្រជាពលរដ្ឋដែល មានប្រាក់ចំណូលទាប និងមធ្យម ជាពិសេសនៅតាមតំបន់ដាច់ស្រយាល។
លោក ផល វ៉ាន់ឌី បន្តមានប្រសាសន៍ថា៖
«ចេញពីគម្រោងរបស់អង្គការសង្គមស៊ីវិលមីក្រូហិរញ្ញវត្ថុក៏បានក្លាយជាគ្រឹះស្ថានឯកជន ដែលបង្កើតឡើងដើម្បីធានានិរន្តរភាពក្នុងការផ្ដល់ប្រាក់កម្ចីដល់មុខរបរខ្នាតតូច ក៏ដូចជាអាជីវកម្មខ្នាតតូច ដើម្បីឱ្យម្ចាស់អាជីវកម្មទាំងនោះមានលទ្ធភាពទទួលនូវសេវាហិរញ្ញវត្ថុផ្លូវការមួយ ដែលមានកិច្ចការពារដោយច្បាប់»។
លោកបន្តថា សេវានេះសំខាន់ណាស់ ដោយសមាគមមីក្រូហិរញ្ញវត្ថុចង់រួមបញ្ចូលប្រជាជនទាំងអស់ មិនថានៅក្នុងក្រុង ឬជនបទទេ។
តាមរយៈភាពសំខាន់របស់វិស័យធនាគារ និងមីក្រូហិរញ្ញវត្ថុកន្លងមកនេះ លោកមានជំនឿចិត្តខ្ពស់ថា
វិស័យទាំងពីរនេះអាចរួមចំណែកទៅក្នុងការអភិវឌ្ឍសេដ្ឋកិច្ចសង្គមដោយមិនអាចខ្វះបាន៕
Account
Security
Favourite Content