សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ប្រេងសណ្ដែកដី ជាប្រភេទប្រេងដែលចម្រាញ់ចេញពីគ្រាប់សណ្ដែកដីដោយការយកទៅគៀបចេញជាប្រេងភ្លាមៗ ដែលគេអាចយកមកប្រើប្រាស់ដូចប្រេងឆាធម្មតាដែរ ប៉ុន្តែមានក្លិនឈ្ងុយ និងមានគុណភាពល្អជាង។ យ៉ាងណាមិញ ប្រេងប្រភេទនេះក៏មិនទាន់មានគេស្គាល់ និងនិយមប្រើជាទូទៅនៅឡើយទេ ទើបម្ចាស់សិប្បកម្មផលិតប្រេងនេះអំពាវនាវឱ្យអតិថិជនគាំទ្របន្ថែមទៀត។
លោក ម៉ៅ តារា ជាម្ចាស់សិប្បកម្ម តារា ហ្វូត បានប្រាប់ឱ្យដឹងថា៖
«ប្រេងសណ្ដែកដីយើងជាប្រេងស្រស់ ដែលគៀបភ្លាមៗ និងមានគុណភាពល្អ អាចប្រើដូចប្រេងឆាដទៃទៀតបាន បំពងច្រើនដងក៏មិនដូរពណ៌ ជាពិសេសអាចប្រើប្រេងនេះប្រឡាក់ជាមួយសាច់ ងាយចម្អិន មិនសូវជាប់ មានក្លិនឈ្ងុយល្អ ហើយមានគុណប្រយោជន៍ច្រើនចំពោះសុខភាព»។
លោកបន្ថែមថា ៖
«យើងយកប្រើគ្រាប់សណ្ដែកដីដែលចាស់ល្អទៅគៀប ចម្រោះ ចេញជាប្រេងសណ្ដែកដីដែលមានគុណភាព ដោយគ្រាប់សណ្ដែកដី ១០គីឡូក្រាម អាចចម្រាញ់បានប្រេង ២.៥លីត្រ។ ចំណែកតម្លៃប្រេងសណ្ដែកដីចំណុះ ៥០០មីលីលីត្រ មានតម្លៃ ៨ដុល្លារ ត្បិតតម្លៃខ្ពស់ជាងប្រេងឆាធម្មតា តែវាជាប្រភេទប្រេងមានគុណភាព និងសុវត្ថិភាពសម្រាប់អ្នកទទួលទាន។ សម្រាប់គុណប្រយោជន៍វិញ ប្រេងសណ្តែកដីធម្មជាតិ ជួយឱ្យសក់ និងឫសសក់រឹងមាំល្អ ការពារជំងឺទឹកនោមផ្អែម ជួយឱ្យចរន្តឈាមដើរស្រួល ជំនួយសុខភាពបេះដូង និងអាចយកទៅម៉ាស្សាបានថែមទៀតផង»។
សូមជម្រាបដែរ ក្រៅពីប្រភេទប្រេងសណ្ដែកដី សិប្បកម្ម តារា ហ្វូត ក៏មានផលិតផលផ្សេងទៀតដូចជា ប្រេងល្ងខ្មៅ ប្រេងដូង ប្រេងសណ្ដែកផ្កាយ តែខ្ញី តែស្លឹកគ្រៃ និងតែម្រុំជាដើម ដែលសុទ្ធសឹងជាផលិតផលច្នៃពីកសិផលធម្មជាតិ ប្រមូលទិញពីប្រជាកសិករនានាទូទាំងប្រទេស មកកិន ចម្រាញ់ និងដាក់លក់លើទីផ្សារ មិនថាក្នុងផ្សារប្រពៃណី ផ្សារទំនើប ម៉ាត និងការតាំងពិព័ណ៌ផងដែរ។
ចុងក្រោយ ម្ចាស់សិប្បកម្មរូបនេះក៏សូមថ្លែងអំណរគុណដល់អតិថិជនដែលតែងតែគាំទ្រកន្លងមក និងសូមអំពាវនាវឱ្យបងប្អូនក្នុងស្រុកគាំទ្របន្ថែមទៀត ពិសេសប្រភេទប្រេងសណ្ដែកដី ដែលផលិតពីគ្រាប់សណ្ដែកដីស្រស់ៗ ជួយដល់ជីវភាពកសិករបានកាន់តែច្រើន និងលើកកម្ពស់សេដ្ឋកិច្ចជាតិផងដែរ៕
Account
Security
Favourite Content