សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បឹងកក់កាលពីមុន ត្រូវបានចាត់ទុកជាតំបន់សំណង់អាណាធិបតេយ្យមួយនៅរាជធានីភ្នំពេញ ហើយបើសិនជានិយាយដល់បឹងកក់ មិនសូវមានអ្នកចាប់អារម្មណ៍ទេ ប៉ុន្តែបឹងកក់បច្ចុប្បន្ននេះ បាន និងកំពុងក្លាយជាតំបន់អភិវឌ្ឍន៍យ៉ាងទាក់ទាញ និងមានការចាប់អារម្មណ៍ពីសំណាក់អ្នកវិនិយោគនិងក្រៅប្រទេស ដោយបច្ចុប្បន្ននេះ គេឃើញមានអការខ្ពស់ៗបានចាប់ផ្ដើមលេចរូបរាងជាបន្តបន្ទាប់ក្រោយពីហេដ្ឋារចនាសម្ព័ន្ធខ្វាត់ខ្វែងបានសាងសង់រួចរាល់ ។
ក្រុមហ៊ុន ដែលទទួលបានការអភិវឌ្ឍតំបន់បឹងកក់នេះ បានរៀបចំលើហេដ្ឋារចនាសម្ព័ន្ធ ភ្លើង ផ្លូវ ខ្វាត់ខ្វែងបានធ្វើឱ្យតំបន់នេះមានមនុស្សឆ្លងកាត់ទាំងយប់ទាំងថ្ងៃ និងក្លាយជាតំបន់កម្សាន្ត និងពាណិជ្ជកម្មយ៉ាងទាក់ទាញ ដោយមានម៉ាកយីហោផលិតផលល្បីជាច្រើនចាប់ផ្ដើមចូលទៅកាន់តំបន់នោះដើម្បីធ្វើសកម្មភាពអាជីវកម្មរបស់ខ្លួន ។
បើតាមអ្នកជំនាញនៃវិស័យអចលនទ្រព្យបានបញ្ជាក់ថា បឹងកក់ជាតំបន់ដែលស្ថិតនៅកណ្ដាលក្រុងភ្នំពេញ ហើយអនាគតតំបន់នេះក៏នឹងមិនចាញ់តំបន់បឹងកេងកង១ នាពេលបច្ចុប្បន្ននេះទេ ដោយមានម៉ាកយីហោល្បីៗជាច្រើនបោះទីតាំងធ្វើអាជីវកម្មនៅក្នុងតំបន់បឹងកក់ ហើយនឹងធ្វើតម្លៃដីធ្លីនៅតំបន់នោះមានតម្លៃកាន់តែខ្ពស់ ។
នៅក្នុងតំបន់នេះដែរ គេឃើញមានអគារពាណិជ្ជកម្ម ក៏ដូចជាការិយាល័យ និងសណ្ឋាគារប្រណិតៗមួយចំនួនចាប់ផ្ដើមធ្វើសកម្មភាព និងដំណើរការអាជីវកម្មរបស់ខ្លួន ដោយក្នុងនោះអគាររបស់អាជ្ញាធរអគ្គិសនីកម្ពុជាមួយបានលេចរូបរាង និងគ្រោងដំណើរការក្នុងពេលខាងមុខនេះដែរ ដូច្នេះសកម្មភាពនៅតំបន់បឹងកក់នឹងកាន់តែមមាញឹកបន្ថែមទៀត ។
យ៉ាងណាក៏ដោយសម្រាប់ដីនៅក្នុងតំបន់បឹងកក់ដែលមិនទាន់មានការសាងសង់សំណង់នោះ ក៏ឃើញថាត្រូវគេរៀបចំធ្វើកន្លែងកម្សាន្តសម្រាប់ឪពុកម្ដាយនាំកូនៗមកកម្សាន្តពេលព្រលប់ និងដីខ្លះធ្វើជាទីលានបាល់ទាត់ និងបាល់ទះ និងខ្លះទៀតត្រូវបានជួលធ្វើជាអាហារដ្ឋានពេលរាត្រី ដែលមានការគាំទ្រពីប្រជាពលរដ្ឋនៅជាប់តំបន់នោះដែរ ពីព្រោះថាបឹងកក់ជាតំបន់ដែលជាប់នឹងខណ្ឌទាំង៣ក្នុងរាជធានីភ្នំពេញ រួមមានខណ្ឌទួលគោក ខណ្ឌ៧មករា និងខណ្ឌដូនពេញ ។
អ្នកនាង គឹម គិនកេសា នាយិការងប្រតិបត្តិក្រុមហ៊ុន CBRE Cambodia បានឱ្យដឹងថា ក្នុងពេលស្ថានភាពនៃការអភិវឌ្ឍជួបប្រទះ ម្ចាស់ដីឬម្ចាស់គម្រោង អាចយកដីនោះទៅកែច្នៃដើម្បីរកចំណូលសិន ហើយនៅពេលណាស្ថានភាពល្អម្ចាស់គម្រោងឬម្ចាស់ដីអាចយកដីនោះទៅអភិវឌ្ឍន៍វិញក៏មិនហួសពេលដែរ ។
ក្រលេកទៅមើលតម្លៃដីធ្លីនៅក្នុងតំបន់បឹងកក់វិញក៏ឃើញថាមិនចាញ់តំបន់កណ្ដាលក្រុងទៀតដែរ ដោយសារតែតំបន់ពាណិជ្ជកម្មកក់ស្ថិតនៅសង្កាត់ស្រះចក ខណ្ឌដូនពេញ តម្លៃដីធ្លីឃើញថាស្ថិតនៅក្នុងចន្លោះពី ៣ ៦០០ដុល្លារទៅ ៥ ៨០០ដុល្លារអាមេរិកក្នុងមួយម៉ែត្រការ៉េសម្រាប់ទីតាំងដីដែលស្ថិតនៅជាប់ផ្លូវធំ និងតម្លៃចន្លោះពី ២ ១០០ទៅ៤ ០០០ដុល្លារអាមេរិកក្នុងមួយម៉ែត្រការ៉េសម្រាប់ដីដែលមានទីតាំងនៅជាប់ផ្លូវតូច ៕
Account
Security
Favourite Content