ភ្នំពេញ៖ ដូចតាមការគ្រោងទុក នៅថ្ងៃទី០៩ ខែកុម្ភៈ ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា បំពេញទស្សនកិច្ចជាផ្លូវការនៅសាធារណរដ្ឋប្រជាមានិតចិនចាប់ពីថ្ងៃទី៩ ដល់ថ្ងៃទី១១ ខែកុម្ភៈ ឆ្នាំ២០២៣ តបតាមការអញ្ជើញរបស់រដ្ឋាភិបាលប្រទេសចិន ​ដែលរំពឹងថានឹងរឹតបន្តឹងនូវចំណងមិត្តភាព និងជំរុញការកសាងសហគមន៍វាសនារួមកម្ពុជា-ចិន ដើម្បីផលប្រយោជន៍ទៅវិញទៅមកសម្រាប់ប្រជាជន និងប្រជាជាតិទាំងពីរ។

ក្នុងដំណើរទស្សនកិច្ចនៅប្រទេសចិននាពេលនេះ សម្តេចតេជោនឹងជួបសម្តែងការគួរសមដាច់ដោយឡែកជា​មួយឯកឧត្តម ស៊ី ជីនពីង ប្រធានាធិបតីចិន និងឯកឧត្តម លី ជាន ស៊ូ ប្រធានសភាតំណាងប្រជាជនចិន។ សម្តេចតេជោក៏នឹងមានជំនួបទ្វេភាគីជាមួយឯកឧត្តម លី ខឺឈាង នាយករដ្ឋមន្ត្រីចិន ដើម្បីផ្លាស់ប្តូរទស្សនៈ និងពិភាក្សាអំពីចំណង និងកិច្ចសហប្រតិបត្តិការទ្វេភាគី ព្រមទាំងបញ្ហាដែលជាប្រយោជន៍ និងកង្វល់រួមក្នុងតំបន់ និងអន្តរជាតិផងដែរ។ ក្រោយជំនួបសម្តេចតេជោ និងលោក លី ខឺឈាង នឹងអញ្ជើញធ្វើជាអធិបតី ក្នុងពិធីចុះហត្ថលេខាលើឯកសារកិច្ចសហប្រតិបត្តិការមួយចំនួនផងដែរ។

ដំណើរទស្សនកិច្ចរបស់សម្តេចតេជោហ៊ុន សែន ទៅកាន់ប្រទេសចិននាពេលនេះនឹងផ្តល់កាលានុវត្តភាពដល់រដ្ឋាភិបាលទាំងពីរ ដើម្បីជំរុញកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ និងធ្វើឱ្យកាន់តែស៊ីជម្រៅនូវការកសាងសហគមន៍វាសនារួមកម្ពុជា-ចិន ដើម្បីផលប្រយោជន៍ទៅវិញទៅមកសម្រាប់ប្រជាជន និងប្រជាជាតិទាំងពីរ។

លោកស្រី Mao Ning អ្នក​នាំ​ពាក្យ​ក្រសួង​ការ​បរទេស​ចិនបានថ្លែងក្នុង​សន្និសីទ​សារព័ត៌មានដោយវាយតម្លៃខ្ពស់ និងកោត​សរសើរចំពោះចំណងមិត្តភាពដ៏រីកចំរើនជាមួយកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែលនឹងទៅបំពេញទស្សនកិច្ចនៅសាធារណរដ្ឋប្រជាមានិតចិន នៅថ្ងៃទី៩-១១ ខែកុម្ភៈ។

​លោកស្រីបានលើកឡើងថា  នាយករដ្ឋមន្ត្រីសម្ដេចតេជោ ហ៊ុន សែន គឺជាមិត្តល្អ និងចាស់របស់ប្រជាជនចិន។ សម្ដេច​ជា​មេដឹកនាំ​បរទេស​ដំបូង​គេ​ដែល​ត្រូវ​បាន​ទទួល​ដោយ​ប្រទេស​ចិន​បន្ទាប់​ពី​បុណ្យ​និទាឃរដូវ​ឆ្នាំ​នេះដែល​និយាយ​ទៅ​កាន់​គុណភាព​ខ្ពស់​នៃ​ទំនាក់ទំនង​ចិន-កម្ពុជា។ លោកស្រី Mao Ning រំពឹងថានឹងជួបពិភាក្សាការងារជាមួយថ្នាក់ដឹកនាំនៃសាធារណរដ្ឋប្រជាមានិតចិន ក្នុងដំណើរបំពេញទស្សនកិច្ចនេះ ដោយផ្តោតលើការផ្លាស់ប្តូរទស្សនៈស៊ីជម្រៅលើទំនាក់ទំនងទ្វេភាគី និងបញ្ហាតំបន់ និងអន្តរជាតិ ដែលជាផលប្រយោជន៍រួម។

លោកស្រី​បានមានប្រសាសន៍​ថា ​៖

“ចិន និង​កម្ពុជា​ជា​ប្រពៃណី​ជា​ប្រទេស​ជិត​ខាង​ជិត​ស្និទ្ធ និង​ជា​មិត្ត​ដែក​ថែប។ ​លោកស្រី​បាន​បន្ថែមថា ទំនាក់ទំនង​មិត្តភាព​ចិន​-​កម្ពុជា​ដែល​ត្រូវបាន​បង្កើត​ឡើង​ដោយ​មេដឹកនាំ​ជំនាន់​ចាស់​នៃ​ប្រទេស​ទាំងពីរ​បាន​ឈរ​សាកល្បង​ពេលវេលា និង​រីកចម្រើន​ពី​កម្លាំង​ទៅ​កម្លាំង​”

លោកស្រី Mao Ning បានបន្តទៀតថា ក្រោមការណែនាំជាយុទ្ធសាស្ត្ររបស់មេដឹកនាំនៃប្រទេសទាំងពីរ ការខិតខំប្រឹងប្រែងកសាងសហគមន៍ចិន-កម្ពុជា ជាមួយនឹងអនាគតរួមគ្នា ទទួលបានលទ្ធផលជាផ្លែផ្កាក្នុងប៉ុន្មានឆ្នាំចុងក្រោយនេះ ដែលនាំមកនូវផលប្រយោជន៍ជាក់ស្តែងដល់ប្រជាជននៃប្រទេសទាំងពីរ និងធ្វើឱ្យមានភាពវិជ្ជមាន។ រួមចំណែកដល់សន្តិភាព និងវិបុលភាពក្នុងតំបន់ និងក្រៅប្រទេស”។

ឆ្នាំ២០២៣ គឺជាខួបលើកទី៦៥ នៃការបង្កើតទំនាក់ទំនងការទូតចិន-កម្ពុជា និងឆ្នាំមិត្តភាពចិន-កម្ពុជា។ ប្រទេសចិនសង្ឃឹមថានឹងយកដំណើរទស្សនកិច្ចនេះជាឱកាសមួយដើម្បីជំរុញឱ្យមានការរីកចម្រើនកាន់តែខ្លាំងឡើងក្នុងការកសាងសហគមន៍ចិន-កម្ពុជាជាមួយនឹងអនាគតរួមគ្នា និងបន្តទំនាក់ទំនងមិត្តភាពចិន-កម្ពុជាពីមួយជំនាន់ទៅមួយជំនាន់៕