សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងជំរុញការអភិឌ្ឍគម្រោងលំនៅឋានតម្លៃសមរម្យនៅក្នុងប្រទេសកម្ពុជាសម្រាប់ជួយដល់ប្រជាពលរដ្ឋដែលមានប្រាក់ចំណូលទាប និងមធ្យម ជាពិសេសមន្ត្រីរាជការឱ្យទទួលបានលំនៅឋានស្នាក់នៅសមរម្យនោះ រាជរដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ បានសម្រេចបង្កើតក្រុមការងារបច្ចេកទេសសម្រាប់គម្រោងអភិវឌ្ឍន៍លំនៅឋានតម្លៃសមរម្យនៅកម្ពុជា ។
បើតាមប្រកាសរបស់ក្រសួងសេដ្ឋកិច្ច និងហិរញ្ញវត្ថុ ស្ដីពីការបង្កើតក្រុមការងារបច្ចេកទេសសម្រាប់អភិវឌ្ឍន៍គម្រោងលំនៅឋានតម្លៃសមរម្យបានបង្ហាញថា ក្រុមការងារនេះជាសេនាធិការនៃគណៈកម្មាធិការអន្តរក្រសួងសម្រាប់គម្រោងអភិវឌ្ឍន៍លំនៅឋានតម្លៃសមរម្យ ដែលមានសមាសភាពចំនួន១២រូប ក្នុងនោះឯកឧត្តម ឱម ម៉ាក់ធារិទ្ធ ដែលជាអគ្គនាយកនៃអគ្គនាយកដ្ឋានភាពជាដៃគូ រវាងរដ្ឋ និងឯកជន គឺជាប្រធានក្រុមការងារមួយនេះ ។
បើតាមប្រកាសនេះបានបង្ហាញផងដែរ ក្រុមការងារបច្ចេកទេសនេះ មានតួនាទី និងភារកិច្ចសំខាន់ៗដូចជា សម្របសម្រួលការលើកលែងពន្ធ ការបន្ធូរបន្ថយពន្ធ ឬការដាក់ពន្ធជាបន្ទុករបស់រដ្ឋ ដោយធ្វើការវាយតម្លៃផលប៉ះពាល់លើចំណូលរបស់រដ្ឋ ដើម្បីជាមូលដ្ឋាននៃការសម្រេចចិត្តរបស់រាជរដ្ឋាភិបាល ។ ក្រុមការការនេះ ក៏មានតួនាទីសម្របសម្រួល និងពន្លឿនការរៀបចំបែបបទ និងការអនុម័តលើការស្នើសុំការលើកលែងពន្ធ ។ ក្រៅពីនេះ នៅមានដូចជាការពិនិត្យលទ្ធភាពក្នុងការស្នើជម្រើសហិរញ្ញប្បទាន ដើម្បីផ្ដល់ការគាំទ្រដល់ការអភិវឌ្ឍលំនៅឋានតម្លៃសមរម្យក្នុងករណីចាំបាច់ ។ ក្រុមការងារត្រូវរិះរកវិធានការ និងកិច្ចសហការពីស្ថាប័នពាក់ព័ន្ធ ជាពិសេសពីស្ថាប័នហិរញ្ញវត្ថុ ដើម្បីធានាអត្រាការប្រាក់សម្រាប់ទិញលំនៅឋានឱ្យសមស្របនឹងលទ្ធភាពរបស់ក្រុមគ្រួសារមានប្រាក់ចំណូលទាប និងមធ្យម ។
យោងតាមប្រសាសន៍ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងថា តម្រូវការលំនៅឋានសម្រាប់ពលរដ្ឋស្នាក់នៅ គឺនៅតែមានខ្ពស់ ប៉ុន្តែអ្នកអភិវឌ្ឍន៍ភាគច្រើនបានអភិវឌ្ឍន៍លំនៅឋានដែលមានតម្លៃខ្ពស់ហួសពីលទ្ធភាពរបស់ពលរដ្ឋទើបធ្វើឱ្យការផ្គត់ផ្គង់លំនៅឋានដែលមានតម្លៃខ្ពស់លើសពីតម្រូវការ។
ឯកឧត្តមបានបន្តថា បើសិនជាអ្នកអភិវឌ្ឍន៍ បានសិក្សាពីតម្រូវការរបស់ពលរដ្ឋជាក់ស្ដែង នោះការអភិវឌ្ឍលំនៅឋាននឹងមិនលើសតម្រូវការ ហើយក៏មិនមានលំនៅឋាននៅសល់ច្រើនទៀតនោះដែរ ។
លោក យក់ សុធីរិទ្ធ នាយកគ្រប់គ្រងក្រុមហ៊ុន Worldbridge Homes ដែលជាក្រុមហ៊ុនអភិវឌ្ឍន៍លំនៅឋានតម្លៃសមរម្យនៅកម្ពុជាដំបូងគេបានថ្លែងថា គម្រោងលំនៅឋានទីក្រុងរណបសិរីមង្គល ដែលក្រុមហ៊ុនបានអភិវឌ្ឍន៍សម្រាប់ផ្ដល់ជូនពលរដ្ឋមានប្រាក់ចំណូលទាប និងមធ្យម និងមន្ត្រីរាជការ មកដល់ពេលនេះ បានលក់ចេញជិតអស់ហើយ ដោយក្រុមហ៊ុនគ្រោងនឹងអភិវឌ្ឍន៍គម្រោងថ្មីមួយទៀត នៅទីតាំងដែលមានតម្រូវការខ្ពស់លើលំនៅឋានប្រភេទនេះ ។
គួរបញ្ជាក់ថា បើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញថា គិតត្រឹមឆ្នាំ២០២៤ មានក្រុមហ៊ុនអភិវឌ្ឍន៍លំនៅឋានតម្លៃសមរម្យមានចំនួន៤ អភិវឌ្ឍលំនៅឋានសរុបចំនួន ១១ ៤៩៥ ផ្ទះ ក្នុងនោះមានក្រុមហ៊ុនចំនួន២ បានអភិវឌ្ឍរួចរាល់១០០ភាគរយ ។ ក្រុមហ៊ុនទាំង៤ ដែលអភិវឌ្ឍលំនៅឋានតម្លៃសមរម្យនៅកម្ពុជា មាន ទី១. ក្រុមហ៊ុន WorldBridge Homes ទី២. ក្រុមហ៊ុន B&BM Development, ទី៣. ក្រុមហ៊ុនអារ៉ាខាវ៉ា និង ទី៤. ក្រុមហ៊ុន ប៊ីអជីភី ប្រផឹធី ឌីវេឡុបមិន ៕
Account
Security
Favourite Content