សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាលនៃសហគ្រិនខ្មែរ នាថ្ងៃទី០៤ ខែកុម្ភៈ ឆ្នាំ២០២៦ បានដឹកនាំកិច្ចប្រជុំក្រុមប្រឹក្សាបរធនបាលលើកទី ១៩ ដើម្បីកំណត់ទិសដៅ និងយុទ្ធសាស្រ្តការងារថ្មី ដើម្បីពង្រីកការគាំទ្រដល់សហគ្រិន និងសហគ្រាសនៅកម្ពុជា និងឆ្លើយតបទៅនឹងចក្ខុវិស័យក្នុងការពង្រឹងប្រព័ន្ធអេកូឡូស៊ីសហគ្រិនភាពនៅកម្ពុជា។
ចំណុចសំខាន់ៗចំនួន ៣ ដែលត្រូវបានលើកឡើង និងអនុម័តនៅក្នុងកិច្ចប្រជុំនេះ រួមមាន ៖
- ការលើកកម្ពស់កម្មវិធីថ្នាក់ជាតិ៖ ផ្អែកលើភាពជោគជ័យនៃកម្មវិធីដែលបានអនុវត្តកន្លងមក សហគ្រិនខ្មែរ នឹងពង្រឹងកម្មវិធីថ្នាក់ជាតិជាបន្តដើម្បីគាំទ្រទៅដល់សហគ្រិន និង សហគ្រាសធុនតូច និង មធ្យម នៅទូទាំងប្រទេស ក្នុងន័យជួយបង្កើនផលវិជ្ជមានដល់សេដ្ឋកិច្ចក្នុងមូលដ្ឋានជាច្រើន។
កម្មវិធីសំខាន់ៗរួមមាន៖ កម្មវិធីសហគ្រិនវិទ្យាល័យ កម្មវិធីសហគ្រិនមហាវិទ្យាល័យ, កម្មវិធីប្រកួតរចនា សំបកវេចខ្ចប់ផលិតផល, កម្មវិធីវិនិយោគទុននិស្សិត, កម្មវិធីប្រកួតប្រជែងកាត់ដេរ ផលិតផលវាយនភណ្ឌ និង កម្មវិធីកញ្ចប់ជំនួយសហគ្រិនខ្មែរ។
- ការពង្រឹងកិច្ចសហប្រតិបត្តិការជាមួយវិស័យឯកជន៖ សហគ្រិនខ្មែរ មានគោលបំណងពង្រឹងភាពជាដៃគូយុទ្ធសាស្ត្រជាមួយវិស័យឯកជនរួមមាន៖ ធនាគារ ក្រុមហ៊ុនធានារ៉ាប់រង និងស្ថាប័នពាក់ព័ន្ធផ្សេងៗ ដើម្បីលើកកម្ពស់ការអភិវឌ្ឍ សហគ្រាសធុនតូច និងមធ្យម តាមរយៈការកសាងបណ្តាញធុរកិច្ច និងការចូលរួមបង្កើតកម្មវិធីជាមួយគ្នាដែលមានគុណតម្លៃរួម មានសក្តានុពល និងការប្រកួតប្រជែងខ្ពស់ដែល ទទួលបានសមិទ្ធផលជាច្រើន ក្នុងទម្រង់ជាកិច្ចសហការពហុភាគី។
- ការពង្រីកការគាំទ្រទៅដល់សហគ្រាសធុនតូច និងមធ្យម៖ ឆ្លើយតបនឹងស្ថានភាពបច្ចុប្បន្ន សហគ្រិនខ្មែរ នឹងបន្ថែមការគាំទ្រដល់សហគ្រាសធុនតូច និងមធ្យម ដើម្បីអាចសម្របខ្លួននឹងនិន្នាការថ្មីៗ និងឱកាសសេដ្ឋកិច្ច។ ការគាំទ្រនេះរួមមានការផ្តល់ធនធានចាំបាច់ ជំនាញ បច្ចេកទេស និងឱកាសចូលទីផ្សារ ដើម្បីលើកកម្ពស់សមត្ថភាព គុណភាពផលិតផលក្នុងស្រុក និងបង្កើនសមត្ថភាពប្រកួតប្រជែងនៅពេលអនាគត។
ថ្លែងនៅក្នុងកិច្ចប្រជុំនេះដែរ ឯកឧត្ដម ហែម វណ្ណឌី បានមានប្រសាសន៍ថា៖
« តាមរយៈការពង្រឹងកម្មវិធីថ្នាក់ជាតិ និងធ្វើការជិតស្និទ្ធជាមួយវិស័យឯកជន សហគ្រិនខ្មែរ កំពុងត្រួសត្រាយផ្លូវជាក់ស្តែងសម្រាប់សហគ្រិន និងសហ គ្រាសធុនតូច និងមធ្យម ដើម្បីរីកចម្រើន អាចប្រកួតប្រជែង និងរួមចំណែកកាន់តែសំខាន់ដល់សេដ្ឋកិច្ចជាតិ»។
ឯកឧត្ដមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិ សហគ្រិនខ្មែរ ក៏បានលើកឡើងដែរថា៖
«សហគ្រិនខ្មែរបាន និងកំពុងពង្រឹងកម្មវិធីថ្នាក់ជាតិដែលទទួលបានចំណាប់អារម្មណ៍ និងការវិនិយោគបន្ថែមទៀតពីវិស័យឯកជន ព្រមទាំងដៃគូអភិវឌ្ឍន៍ដែលកិច្ចសហការទាំងនេះនឹងផ្តល់ឱកាសឱ្យបង្កើតគុណតម្លៃរួមគ្នាសម្រាប់សង្គម»។
នៅក្នុងកិច្ចប្រជុំនេះ ក្រុមប្រឹក្សាបរធនបាលបានបង្ហាញការបន្តគាំទ្រចក្ខុវិស័យរបស់សហគ្រិនខ្មែរ ក្នុងការរួមចំណែកកសាងប្រព័ន្ធនវានុវត្តន៍ ជំរុញកំណើនធុរកិច្ច និងលើកកម្ពស់ភាពជាដៃគូជាមួយដៃគូអភិវឌ្ឍន៍ ព្រមទាំងភាគីពាក់ព័ន្ធនៅក្នុងប្រព័ន្ធអេកូឡូស៊ីសហគ្រិនភាព ដើម្បីបង្កើតបរិយាកាសអំណោយផលសម្រាប់ធុរកិច្ចថ្មី និងសហគ្រាសធុនតូច និងមធ្យម នៅកម្ពុជា៕
Account
Security
Favourite Content