សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ភូមិភាគឦសាន ដែលរួមមានខេត្តស្ទឹងត្រែង រតនគិរី មណ្ឌលគិរី និងក្រចេះ បានក្លាយជាទិសដៅអាទិភាពខ្ពស់សម្រាប់ការអភិវឌ្ឍសង្គម-សេដ្ឋកិច្ច ដោយផ្តោតលើការពង្រឹងហេដ្ឋារចនាសម្ព័ន្ធ ការទាក់ទាញវិនិយោគ និងការអភិវឌ្ឍវិស័យកសិកម្ម កសិ-ឧស្សាហកម្ម និងទេសចរណ៍ ដើម្បីជំរុញកំណើន និងកាត់បន្ថយគម្លាតអភិវឌ្ឍន៍ជាមួយតំបន់កណ្តាលនៃប្រទេស។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវសមិទ្ធផលនានា ក្នុងក្រុងស្ទឹងត្រែង ខេត្តស្ទឹងត្រែង នាព្រឹកថ្ងៃទី១២ ខែសីហា ឆ្នាំ២០២៦ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា រាជរដ្ឋាភិបាលបាន និងកំពុងខិតខំអភិវឌ្ឍមូលធនមនុស្ស និងកែលម្អសេវាសាធារណៈ ជាពិសេសវិស័យសុខាភិបាល អប់រំ និងបណ្ដុះបណ្ដាលវិជ្ជាជីវៈ។
សម្ដេចធិបតីបានបញ្ជាក់ថា រាជរដ្ឋាភិបាលក៏កំពុងពង្រីកការតភ្ជាប់ភូមិភាគឦសានជាមួយរាជធានីភ្នំពេញ ខេត្តជុំវិញ និងប្រទេសជិតខាង តាមរយៈការកែលម្អហេដ្ឋារចនាសម្ព័ន្ធរូបវន្ត ជាពិសេសផ្លូវជាតិ និងស្ពាន ព្រមទាំងជំរុញការអភិវឌ្ឍសេដ្ឋកិច្ចមូលដ្ឋាន តាមរយៈការលើកកម្ពស់កសិកម្ម កសិ-ឧស្សាហកម្ម ទេសចរណ៍ធម្មជាតិ ពាណិជ្ជកម្មឆ្លងដែន និងការទាក់ទាញវិនិយោគ។
ក្នុងនោះ ការតភ្ជាប់បណ្ដាញផ្គត់ផ្គង់អគ្គិសនី ទឹកស្អាត និងទូរគមនាគមន៍ ក៏ត្រូវបានលើកឡើងជាផ្នែកសំខាន់មួយ ដើម្បីគាំទ្រដល់ការវិនិយោគ និងការអភិវឌ្ឍនៅក្នុងតំបន់។
សម្ដេចធិបតីបានមានប្រសាសន៍ថា ភូមិភាគឦសាននៅមានកម្រិតបើប្រៀបធៀបនឹងប៉ូលសេដ្ឋកិច្ចផ្សេងៗ ដូចជាភ្នំពេញ សៀមរាប និងខេត្តព្រះសីហនុ ប៉ុន្តែខេត្តនៅភាគឦសានមានសក្ដានុពលពិសេសលើវិស័យកសិកម្ម កសិ-ឧស្សាហកម្ម និងទេសចរណ៍។
តាមសម្ដេចធិបតី គិតត្រឹមថ្ងៃទី៧ ខែសីហា ឆ្នាំ២០២៦ តាមរយៈ «កម្មវិធីពិសេសជំរុញការវិនិយោគខេត្តភាគឦសាន» ខេត្តទាំងបួនទទួលបានសំណើវិនិយោគចំនួន ៧២គម្រោង ក្នុងនោះ ៥៧គម្រោងត្រូវបានពិនិត្យ និងបន្តនីតិវិធី។ គម្រោងទាំង ៧២ មានទុនវិនិយោគសរុបប្រមាណ ២.៧ពាន់លានដុល្លារ និងអាចបង្កើតការងារជូនប្រជាពលរដ្ឋជិត ៨៣,០០០នាក់។
កម្មវិធីពិសេសនេះផ្តោតលើវិស័យអាទិភាពចំនួនបី គឺកសិកម្ម កសិ-ឧស្សាហកម្ម និងទេសចរណ៍ ដោយរដ្ឋាភិបាលបានដាក់ចេញវិធានការគាំទ្រសំខាន់ៗ រួមមាន ការលើកទឹកចិត្តផ្នែកពន្ធដារ និងពន្ធគយ ការផ្តល់ហិរញ្ញប្បទានក្នុងអត្រាការប្រាក់សមរម្យ និងការជួយកាត់បន្ថយថ្លៃដើមផលិតកម្ម ព្រមទាំងការសម្រួលនីតិវិធី និងគាំទ្រសកម្មភាពវិនិយោគ។
ទន្ទឹមនឹងនេះ ក្រុមការងារជំរុញការវិនិយោគក្នុងខេត្តទាំងបួន និងក្រសួង-ស្ថាប័នពាក់ព័ន្ធ មានតួនាទីសម្របសម្រួលពិសេស ដើម្បីជួយសម្រួលដល់វិនិយោគិន និងធុរជនដែលមានបំណងចូលមកបណ្ដាក់ទុនក្នុងតំបន់។
លោក ឌុក ពិសិដ្ឋ ប្រធានសមាគមកាហ្វេកម្ពុជា និងជាម្ចាស់រីសត PIDA Coffee Farm Lodge បានមានប្រសាសន៍ថា កម្មវិធីជំរុញការវិនិយោគនៅភូមិភាគឦសាន បាន និងកំពុងផ្តល់អត្ថប្រយោជន៍ដល់វិនិយោគិន និងធុរជនក្នុងតំបន់។
ក្នុងនាមជាអ្នកវិនិយោគលើដំណាំកាហ្វេ និងអ្នកកែច្នៃកាហ្វេនៅខេត្តមណ្ឌលគិរី លោកបានទទួលការលើកលែងពន្ធពីរាជរដ្ឋាភិបាលរហូតដល់ ១២ឆ្នាំ។ ការលើកលែងនេះរួមមានពន្ធលើប្រាក់ចំណេញ ពន្ធលើប្រាក់ខែបុគ្គលិក និងពន្ធលើការនាំចូលគ្រឿងម៉ាស៊ីនផ្សេងៗសម្រាប់ដំណើរការសិប្បកម្មកែច្នៃកាហ្វេ។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់បណ្ដាញសារព័ត៌មាន AMS នៅរសៀលថ្ងៃទី១២ ខែសីហា ថា ថ្នាក់ដឹកនាំរាជរដ្ឋាភិបាលតាំងពីសម្ដេចតេជោរហូតមកដល់សម្ដេចធិបតី បានកំណត់ភូមិភាគឦសានជាប៉ូលសេដ្ឋកិច្ចដែលត្រូវការការអភិវឌ្ឍ។
លោកបានលើកឡើងថា ការពង្រីកតំបន់នេះទៅជាប៉ូលសេដ្ឋកិច្ច គឺជារឿងចាំបាច់សម្រាប់ប្រជាពលរដ្ឋនៅក្នុងខេត្តទាំងបួន។ តាមរយៈការភ្ជាប់ហេដ្ឋារចនាសម្ព័ន្ធ ភូមិភាគឦសានអាចតភ្ជាប់ទៅភ្នំពេញ និងកំពង់សោមតាមរយៈប្រព័ន្ធដឹកជញ្ជូន ព្រមទាំងមានសក្តានុពលក្នុងការតភ្ជាប់ជាមួយកំពង់ផែខេត្តព្រះសីហនុ និងច្រកពាណិជ្ជកម្មទៅវៀតណាម និងឡាវ ដែលអាចបន្តតភ្ជាប់ទៅចិន។
លោកបានបន្ថែមថា តំបន់នេះក៏អាចមានការតភ្ជាប់ជាមួយកំពង់ផែភ្នំពេញ ឬកំពង់ផែនៅកំពង់ចាម តាមដៃទន្លេមេគង្គ និងតភ្ជាប់ទៅព្រែកជីកហ្វូណនតេជោ ដើម្បីឈានទៅសមុទ្រ។
គួរជម្រាបថា សម្ដេចមហាបវរធិបតី ហ៊ុន ម៉ាណែត បានប្រកាសដាក់ឱ្យអនុវត្តជាផ្លូវការ «កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន នៃព្រះរាជាណាចក្រកម្ពុជា ឆ្នាំ២០២៥-២០២៨» នៅថ្ងៃទី៩ ខែមេសា ឆ្នាំ២០២៥។
កម្មវិធីនេះមានគោលបំណងពង្រីកមូលដ្ឋានសេដ្ឋកិច្ចនៅតាមបណ្ដាខេត្តដែលនៅឆ្ងាយពីមជ្ឈមណ្ឌលកំណើន អភិវឌ្ឍវិស័យគន្លឹះ និងបង្កើតប្រភពកំណើនថ្មីសម្រាប់សេដ្ឋកិច្ចជាតិ ដោយផ្អែកលើសក្ដានុពលដែលមានស្រាប់នៅក្នុងតំបន់។
កម្មវិធីត្រូវបានរៀបចំឡើងដោយផ្អែកលើទស្សនាទានបី រួមមាន ការកែប្រែមុខមាត់ខេត្តទាំងបួនឱ្យមានមូលដ្ឋានសេដ្ឋកិច្ចពឹងផ្អែកលើកសិកម្ម កសិ-ឧស្សាហកម្ម និងទេសចរណ៍ ការដោះស្រាយបញ្ហាប្រឈមជាក់ស្ដែងដែលអាចនាំមកនូវលទ្ធផលឆាប់រហ័ស ជាពិសេសការទាក់ទាញវិនិយោគឯកជន និងការជំរុញសហថាមពលពីការប្រមូលផ្ដុំ ដើម្បីឈានទៅអភិវឌ្ឍសេដ្ឋកិច្ចមាត្រដ្ឋាន ជំនួសការវិនិយោគដែលមានលក្ខណៈរាយប៉ាយ។
សម្រាប់វិស័យកសិកម្ម កម្មវិធីផ្តោតលើការដាំដុះដំណាំដែលមានសក្ដានុពលសេដ្ឋកិច្ច រួមមានផ្កា បន្លែ ផ្លែឈើ និងឈើដាំ ព្រមទាំងការចិញ្ចឹមសត្វជាលក្ខណៈពាណិជ្ជកម្ម។ ចំពោះកសិ-ឧស្សាហកម្ម វាផ្តោតលើការកែច្នៃ និងវេចខ្ចប់ផលិតផលគន្លឹះ ដូចជា កៅស៊ូ ស្វាយចន្ទី ដំឡូងមី ចេកអំបូងលឿង ផ្លែឈើ និងឈើដាំ។
វិស័យទេសចរណ៍ផ្តោតលើទេសចរណ៍អត្តសញ្ញាណពិសេស ការបង្កើតតំបន់អេកូទេសចរណ៍ តំបន់ទេសចរណ៍ពិសិដ្ឋ សួនភូតគាម ឬសួនទេសចរណ៍ សួនសត្វ សកម្មភាពអភិរក្សជីវៈចម្រុះ និងធនធានសេនេទិក ព្រមទាំងការបង្កើតរមណីយដ្ឋានដែលមានសេវាកម្មចម្រុះ។
តាមរយៈវិធានការគាំទ្រទាំងនេះ រាជរដ្ឋាភិបាលមានគោលដៅបន្តទាក់ទាញការវិនិយោគ និងបង្កើតការងារនៅក្នុងភូមិភាគឦសាន ខណៈជំរុញឱ្យតំបន់នេះក្លាយជាប្រភពកំណើនសេដ្ឋកិច្ចថ្មីមួយរបស់កម្ពុជា៕
Account
Security
Favourite Content