ការដាំដំណាំជុំវិញផ្ទះ ជាទម្លាប់ដ៏ល្អមួយដែលបងប្អូនគួរតែអនុវត្ត ដោយសារវាចូលរួមជួយទាំងផ្នែកសុខភាព កាត់បន្ថយភាពតានតឹងអារម្មណ៍តាមរយៈការមើលថែដំណាំ និងផ្នែកហិរញ្ញវត្ថុ ខណៈដែលវាជាប្រភពម្ហូបអាហារធម្មជាតិពិតៗគ្មានសាធាតុគីមី។ ជាមួយគ្នានេះ ដើម្បីអាចដាំដំណាំចម្រុះជុំវិញផ្ទះឱ្យបានផលល្អ អ្នកដាំទាំងឡាយគួរយល់ដឹងពីចំណុចសំខាន់ៗមួយចំនួនជាមុនសិន។

មុនពេលចាប់ផ្តើមដាំដំណាំ ដំបូងឡើយគេត្រូវជ្រើសរើសទីតាំង មិនថាបរិវេណជុំវិញផ្ទះដែលយើងអាចកាប់គាស់សម្អាតដី ឬនៅលើដំបូលផ្ទះដែលយើងអាចច្នៃដាំនៅលើធ្នើរ ធុង ឬសម្ភារផ្សេងៗដែលអាចផ្ទុកដីបាន ជាពិសេសគឺរកកន្លែងណាដែលមានពន្លឺគ្រប់គ្រាន់ ស្ថិតនៅឆ្ងាយពីសត្វចិញ្ចឹម ព្រោះវាអាចកាយបំផ្លាញដំណាំ និងស្ថិតនៅជិតប្រភពទឹកដើម្បីងាយស្រួលស្រោចស្រព។

ចំណុចបន្ទាប់មកទៀតគឺការរៀបចំដីដោយអ្នកដាំគួរប្រើរានដែកសម្រាប់ដាំ ដែលអាចប្រើបានរយៈពេលយូរ និងបានផលល្អ ជាពិសេសសម្រាប់ដំណាំរយៈពេលខ្លី ដូចជា សាឡាដ និងប្រភេទស្ពៃផ្សេងៗទៀត។ ដោយឡែកចំពោះការប្រើធុង ឬច្នៃប្លាស្ទិកមកដាំក៏ជាការប្រើប្រាស់ឡើងវិញប្រកបដោយនិរន្តរភាពដែរ ប៉ុន្តែត្រូវប្រើប្រាស់របស់ដែលមានស្រាប់ មិនមែនជាសម្ភារដែលទិញមកដើម្បីដាំនោះទេ។

សម្រាប់ការបែងចែកដំណាំ ក៏ជាផ្នែកដែលអ្នកដាំគួរយកចិត្តទុកដាក់ផងដែរ ព្រោះកាលណាយើងដាំបន្លែ ឬផ្លែឈើ ត្រូវជ្រើសរើសទីតាំងដីសម្រាប់ដាំ និងការមើលថែខុសៗគ្នាទៅតាមប្រភេទ។ តួយ៉ាងដំណាំខ្លះត្រូវការជីមានជាតិអាសូតច្រើន ខ្លះត្រូវការទឹកច្រើន ហេតុនេះម្ចាស់សួនដំណាំត្រូវមានភាពវ័យឆ្លាត ក៏ដូចជាស្គាល់ពីប្រភេទដំណាំឱ្យបានច្បាស់មុនពេលដាំ។

បន្ថែមពីលើការដាំ អ្នកដាំក៏ត្រូវយល់ដឹងពីការផលិតជីទឹកដែលជាប្រភេទជីធម្មជាតិមានប្រយោជន៍ច្រើនចំពោះដំណាំរយៈពេលខ្លី និងបន្លែស្លឹក ហើយជីនេះក៏មានភាពងាយស្រួលក្នុងការផលិតដោយគ្រាន់តែប្រើប្រាស់កាកសំណល់ផ្ទះបាយមកលាយជាមួយស្កររងូ និងអ៊ីអឹមគឺអាចប្រើប្រាស់បានស្ទើរគ្រប់ប្រភេទដំណាំ។ យ៉ាងណាក៏ដោយ អ្នកដាំក៏គួរតែយកចិត្តទុកដាក់ក្នុងការមើលថែទាំ ដូចជាបេះ ឬជម្រុះស្លឹកបន្លែណាដែលទុំ ស្អុយ ឬរលួយចេញ ជៀសវាងឆ្លងជំងឺដល់ដើមដទៃទៀត។

ជាចុងក្រោយ គឺកត្តាបច្ចេកវិទ្យា កសិករវ័យឆ្លាត តែងចេះទាញយកផលប្រយោជន៍ពីបច្ចេកវិទ្យាទំនើប ដូចជាការកំណត់ប្រព័ន្ធស្រោចស្រពស្វ័យប្រវត្តិ ទោះមិននៅផ្ទះក៏យើងអាចបញ្ជាការស្រោចដំណាំពីចម្ងាយបាន។ ហេតុនេះ តាមរយៈចំណុចសំខាន់ៗខាងលើ អ្នកដាំរបស់យើងនឹងកាន់តែមានគំនិតកែច្នៃបន្ថែមទៀតពាក់ព័ន្ធនឹងការដាំដំណាំជុំវិញផ្ទះ៕