សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ នៅពេលដែលនិយាយដល់ការវិនិយោគលើវិស័យថាមពលស្អាត ប្រាកដណាស់ ចិន ត្រូវបានគេទទួលស្គាល់ថាជាប្រទេសដែលបានចំណាយលុយច្រើនជាងគេបំផុតលើពិភពលោក ដើម្បីសម្រេចឲ្យបានមហិច្ឆតាក្លាយជាអ្នកនាំមុខគេបំផុតក្នុងវិស័យបៃតងមួយនេះ។
ជាមួយគ្នានេះ ក្នុងគ្រាដែលគ្រប់គ្នាកំពុងងាកទៅរកថាមពលកកើតឡើងវិញបែបនេះ រដ្ឋាភិបាលក្រុងប៉េកាំងបានរៀបចំការងារ និងផែនការបានយ៉ាងល្អ និងមុនគេចំពោះកិច្ចការងារនេះ ហើយជាលទ្ធផល គិតត្រឹមពាក់កណ្តាលឆ្នាំ២០២៤នេះ ចិនបានធ្វើឲ្យគ្រប់គ្នាភ្ញាក់ផ្អើលខ្លាំងមែនទែនក្រោយប្រកាសថាបានជោគជ័យតាមគោលដៅដែលបានដាក់ចេញមុនពេលកំណត់ដល់ទៅ៦ឆ្នាំ។
ទិន្នន័យដែលបានបង្ហាញដោយអជ្ញាធរជាតិទទួលបន្ទុកកិច្ចការងារថាមពលនៅសប្តាហ៍នេះបានឲ្យដឹងថា អគ្គិសនីជាតិបានទទួលថាមពលបន្ថែមដល់ទៅ ២៥ ជីហ្គាវ៉ាត់ ចេញពីប្រភពទាញថាមពលកង្ហារតួប៊ីន(ថាមពលខ្យល់) និងបន្ទះសូឡា (ថាមពលព្រះអាទិត្យ) គិតត្រឹមខែកក្កដាកន្លងមកនេះ និងធ្វើឲ្យទំហំសរុបបានកើនឡើងទៅដល់ ១២០៦ជីហ្គាវ៉ាត់ ខណៈដែលផែនការគោលដៅដែលធ្លាប់បានដាក់ចេញដោយប្រធានាធិបតីចិនកាលពីឆ្នាំ២០២០បានកំណត់ថា ចិន ត្រូវតែសម្រេចឲ្យបានដល់ ១២០០ជីហ្គាវ៉ាត់ ក្នុងឆ្នាំ២០៣០។
ស្របពេលជាមួយគ្នានេះ គិតមកទល់នឹងពេលបច្ចុប្បន្ន សម្រាប់វិស័យថាមពលស្អាត ប្រទេសចិនបានវិនិយោគលើសបណ្តាប្រទេសណាណាទាំងអស់លើពិភពលោក ហើយបានបំបែកកំណត់ត្រាក្នុងការបង្កើនថាមពលពីថាមពលខ្យល់ និងពន្លឺព្រះអាទិត្យម្តងហើយម្តងទៀតក្នុងរយៈពេលប៉ុន្មានឆ្នាំចុងក្រោយនេះ។
អ្វីដែលគេអាចមើលឃើញនោះគឺថា កំណើនដ៏ឆាប់រហ័សនេះកំពុងបានជួយនាំប្រទេសចិនទៅរកការថយចុះនៃការបង្កើតថាមពលធ្យូងថ្មនៅរដូវក្តៅនេះ ប៉ុន្តែទោះជាយ៉ាងណាក្តី ថាមពលព្រះអាទិត្យ និងខ្យល់ បច្ចុប្បន្នអាចចាប់យកចំណែកផ្គត់ផ្គង់ត្រឹមតែ១៤ភាគរយប៉ុណ្ណោះនៃថាមពលអគ្គិសនីទាំងអស់នៅក្នុងប្រទេសចិនក្នុងឆ្នាំនេះ។
ការងារបន្ថែមទៀតរបស់រដ្ឋាភិបាលចិនគឺធ្វើយ៉ាងណាទាមទារ និងពង្រីកចំណែកនោះឲ្យកាន់តែធំជាងនេះ និងបន្តកាត់បន្ថយឥន្ធនៈហ្វូស៊ីលឲ្យបានកាន់តែតិច ហើយប្រតិបត្តិករបណ្តាញអគ្គិសនីរបស់ប្រទេសនេះកំពុងវិនិយោគយ៉ាងច្រើនលើខ្សែថាមពល និងកន្លែងស្តុកថាមពលនៅតាមទីតាំងផ្សេងទៀតដែលមិនទាន់ភ្ជាប់ទៅដល់៕
Account
Security
Favourite Content