រាល់ការធ្វើអាជីវកម្ម មិនថាទំហំតូចក្ដី ធំក្ដី តែងតែត្រូវការនូវដើមទុនដើម្បីចាត់ចែងចំណាយផ្សេងៗក្នុងដំណើរការអាជីវកម្ម ព្រោះរាល់ការរកស៊ីត្រូវការចំណាយ ចំណូល ធ្វើឱ្យមានចរន្តសាច់ប្រាក់ក្នុងអាជីវកម្ម។ សម្រាប់សហគ្រិនវៃឆ្លាត មិនត្រឹមតែមានដើមទុនផ្ទាល់ខ្លួននោះទេ គេក៏ត្រូវមានផែនការអាជីវកម្ម ក៏ដូចជាមានភាពរហ័សរហួនក្នុងការរកដើមទុនតាមរយៈគម្រោងជំនួយផ្សេងៗផងដែរ។

ជាក់ស្ដែងតាមរយៈសហគ្រិនខ្មែរ (KE) ជាស្ថាប័នបង្កើតឡើងដោយក្រសួងសេដ្ឋកិច្ច និងហិរញ្ញវត្ថុ ក្នុងគោលបំណងកៀរគរវិនិយោគ និងគ្រប់គ្រងធនធានដើម្បីគាំទ្រដល់ការអភិវឌ្ឍប្រព័ន្ធអេកូឡូស៊ីសហគ្រិននៅកម្ពុជា ដោយជំរុញសកម្មភាពសហគ្រិន អភិវឌ្ឍសមត្ថភាពគ្រប់គ្រង ការប្រកួតប្រជែងសហគ្រិនឆ្នើម ផ្ដល់នូវកញ្ចប់ជំនួយជាច្រើនផ្នែក។

បើតាម លោក ហាច ឆន ជាម្ចាស់កសិដ្ឋាន៤០០ និងអ្នកធ្លាប់ទទួលបានពានរង្វាន់ពីសហគ្រិនខ្មែរបានចែករំលែកថា៖

«ការបង្កើតឱ្យមានសហគ្រិនខ្មែរ ខ្ញុំឃើញថាល្អមែនទែនសម្រាប់ការផ្ដល់ជាបទពិសោធល្អៗសម្រាប់ម្ចាស់អាជីវកម្មទូទាំងប្រទេស មិនត្រឹមតែប៉ុណ្ណោះទេ ក៏មានការបង្វឹកម្ចាស់អាជីវកម្មនូវជំនាញជាច្រើន ហើយក៏ជួយផ្ដល់ទុនដល់ម្ចាស់អាជីវកម្មណាដែលខ្វះខាតទុន ពិសេសកំឡុងពេលមានគ្រាលំបាក ដូចជាបញ្ហាជំងឺកូវីដ-១៩ បញ្ហាសេដ្ឋកិច្ចធ្លាក់ចុះបានជួយពង្រឹងសមត្ថភាពបន្ថែម តាមដាន ក៏ដូចជាត្រួតពិនិត្យភាពរីកចម្រើនរបស់ម្ចាស់អាជីវកម្មជាប្រចាំ»។

លោកបន្ថែមថា សហគ្រិនខ្មែរក៏មានជាការប្រកួតពានរង្វាន់ធ្វើឱ្យម្ចាស់សហគ្រាសអ្នកនៅតាមតំបន់ផ្សេងៗគ្នាចូលមកសហការគ្នា ចែករំលែកបទពិសោធល្អៗ លើសពីនេះទៅទៀត វាក៏ជាកន្លែងផ្គូរផ្គងម្ចាស់អាជីវកម្មទូទាំងប្រទេសមកចួបជុំគ្នា ក៏ដូចជាសហការគ្នាទៅលើប្រភេទផលិតដូចគ្នា ឬក៏អាចលក់ជាមួយគ្នាបាន ហើយក៏មានជាការស្គាល់ និងជួយគាំទ្រគ្នាទៅវិញទៅមក។

គួររំឭកដែរថា សម្រាប់ម្ចាស់កសិដ្ឋានខាងលើមានបទពិសោធធ្លាប់ទទួលបានពានរង្វាន់សហគ្រិនខ្មែរ សហគ្រាសធុនតូច និងមធ្យម ឆ្នាំ២០២២ ដឹកនាំដោយវិទ្យាស្ថានបច្ចេកវិទ្យា និងនវានុវត្តន៍ បានជាប់ចំណាត់ថ្នាក់លេខ ២ និងទទួលបានរង្វាន់ ២៤លានរៀល ហើយលើកទីពីរ លោកទទួលបានពានរង្វាន់សហគ្រិនថ្នាក់ជាតិប្រចាំតំបន់កំពង់ចាម ចំណាត់ថ្នាក់លេខ១ ដោយទទួលបានរង្វាន់ ៥០០ដុល្លារ និងទុនវិនិយោគបន្ថែម ៧ពាន់ដុល្លារផងដែរ។

តាមរយៈការចូលរួមជាមួយសហគ្រិនខ្មែរ លោកអាចទទួលបានទុនវិនិយោគមកពង្រីកអាជីវកម្ម ពិសេសការរៀបចំយុទ្ធសាស្ត្រក្នុងការប្រើប្រាស់ធនធាន និងថវិកា ធ្វើយ៉ាងណាអាចចាត់ចែងផ្នែកហិរញ្ញវត្ថុ ដឹកនាំការងារ ក៏ដូចជាការពង្រឹងសមត្ថភាពដល់សមាជិកខាងក្រោម ដើម្បីឱ្យពួកគាត់មានសមត្ថភាព និងធ្វើការបានលឿនជាងមុន។

ក្នុងឆ្នាំ២០២៣ លោកបានចូលរួមសកម្មភាពជាច្រើនជាមួយសហគ្រិនខ្មែរ មានវគ្គពង្រឹងសមត្ថភាព វគ្គផ្គូរផ្គងអាជីវកម្ម វគ្គរៀបចំគម្រោងអាជីវកម្ម វគ្គដឹកនាំក្រុម របៀបគ្រប់គ្រងហិរញ្ញវត្ថុ និងបានដាក់ពាក្យស្នើថវិកាដើម្បីអនុវត្ត និងកែលម្អគម្រោងអាជីវកម្មផ្នែកការផលិតពូជ ការផ្គត់ផ្គង់ និងការចិញ្ចឹមសត្វច្រើនប្រភេទផ្សេងទៀត។

ជារួមមក សហគ្រិនខ្មែរ បានជួយទៅដល់ម្ចាស់អាជីវកម្មជាច្រើន ក្នុងនោះក៏មានកសិដ្ឋាន៤០០ផងដែរ ដែលបានទទួលកញ្ចប់ជំនួយ ដើម្បីប្រែក្លាយក៏ដូចជាមានឱកាសក្នុងការអភិវឌ្ឍខ្លួន បំប្លែងខ្លួនឱ្យ មានសមត្ថភាពអាចប្រឈមមុខ និងដោះស្រាយបញ្ហាកាន់តែមានភាពរឹងមាំរហូតអាចឈរជើងបានដូចសព្វថ្ងៃ៕