ភ្នំពេញ ៖ ក្នុងគោលបំណងបញ្ចៀសនូវរាល់ការលក់ក្លែងបន្លំរវាងផ្លែធុរេនក្នុងស្រុក និងធុរេននាំចូល អាជ្ញាធរស្រុកស្ទឹងត្រង់ ខេត្តកំពង់ចាម បានជំរុញដល់កសិករដែលដាំធុរេន រួមគ្នាបង្កើតជាសហគមន៍និងបិទតែមសម្គាល់​អត្តសញ្ញាណលើផ្លែធុរេសរបស់សហគមន៍។

លោក បាន ស្រេង អភិបាលនៃគណៈអភិបាលស្រុកស្ទឹងត្រង់មានលើកឡើងកាលពីពេលកន្លងទៅថ្មីៗនេះថា បច្ចុប្បន្ន ការចរាចរណ៍លក់ផ្លែធុរេននៅលើទីផ្សារមានភាពសម្បូរបែប និងប្រកួតប្រជែងជាខ្លាំង ប៉ុន្តែអតិ​ថិជនមួយចំនួន មិនដឹងពីប្រភពធុរេនដែលខ្លួនបានទិញថាជាធុរេននាំចូល ឬធុរេនក្នុងស្រុកនោះឡើយ ដូច្នេះហើយដើម្បីផ្តល់ទំនុកចិត្តនៅលើទីផ្សារ លោកអភិបាលជំរុញដល់កសិករត្រូវចងក្រងគ្នាជាសហគមន៍ និងបង្កើតតែមឡូហ្គូ ឬស្លាកសញ្ញាបញ្ជាក់ថា ជាធុរេនស្រុកស្ទឹងត្រង់ពិតប្រាកដ។

លោកបានបញ្ជាក់ថា ៖

«ការបង្កើតជាសហគមន៍ បង្កើតតែមបិទលើផ្លែធុរេននេះមានសារៈសំខាន់ណាស់ ទី១.រក្សាបាននូវតម្លៃ និងទី២.រក្សាបាននូវគុណភាពធុរេន ដែលផ្តល់ភាពងាយស្រួលសម្រាប់រកទីផ្សារ។ សម្រាប់កសិករ បើមិនបង្កើតជាសហគមន៍ មិនមានបិទសញ្ញសម្គាល់លើផ្លែធុរេននោះទេ វានឹងបាត់បង់អត្តសញ្ញាណធុរេនសហគមន៍ ដែលអាចប៉ះពាល់គុណភាព និងតម្លៃ ហើយនឹងបាត់ទំនុកចិត្តពីអតិថិជន ក៏ដូចជាសាធារណៈជនទូទៅ ខណៈដែលធុរេនជាច្រើនមានប្រភពមិនច្បាស់លាស់​ដាក់លក់លើទីផ្សារ ហើយប្រាប់អតិថិជនថា ជាធុរេនចំការខ្មែរ ហើយថែមទាំងលក់ក្នុងតម្លៃទាបជាងតម្លៃលក់នៅចំការផ្ទាល់ទៀតផង»។

ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានមានប្រ​សាសន៍​ថា ការចងក្រងជាសហគមន៍កសិកម្មទំនើប ប្រៀបបានទៅនឹងការប្រមូលផ្តុំគ្នាទៅជាចង្កឹះមួយបាច់ធំដែលមានភាពរឹងមាំ និងជាខែលការពារពុកម៉ែបងប្អូនប្រជាកសិករតូចៗពីរាល់ហានិភ័យ និងបញ្ហាប្រឈមនានា ដែលចង្កឹះតែមួយពិបាកនឹងទប់ទល់តែម្នាក់ឯងបាន។

ឯកឧត្តមបញ្ជាក់ថា ៖

«ការចងក្រងជាសហគមន៍នេះទទួលបាននូវអត្ថប្រយោជន៍ចំនួន៥ ក្នុងនោះរួមមាន ៖ ការដោះស្រាយបញ្ហាខ្វះទុន ខ្វះបច្ចេកទេស ខ្វះទីផ្សារ ថ្លៃដើមផលិតខ្ពស់ និងផលប៉ះពាល់ពីការប្រែប្រួលអាកាសធាតុ ថែមទាំងអនុញ្ញាតឱ្យកសិករជាសមាជិកនីមួយៗ សល់ពេលវេលាសម្រាប់យកទៅបង្កើនប្រាក់ចំណូលផ្សេងៗទៀត ឬទទួលបានកម្រៃបន្ថែមពីការជួលជាកម្លាំងពលកម្មជូនសហគមន៍វិញផងដែរ» ។

ឯកឧត្តមបានបន្តថា ប្រសិនបើធ្វើដូច្នេះបាន កសិផលកម្ពុជា នឹងមានភាពប្រកួតប្រជែងជាងមុន ទាំងលើកត្តាតម្លៃ គុណភាព និងបរិមាណ អាចបំពេញតម្រូវការប្រើប្រាស់ក្នុងស្រុកជំនួសឱ្យការនាំចូលពីខាងក្រៅ និងអាចនាំចេញទៅកាន់ទីផ្សារអន្តរជាតិបានប្រកបដោយភាពទាក់ទាញ និងឧត្តមភាពខាងផ្នែកសេដ្ឋកិច្ចទៀតផង៕ វិន ឈុនហ៊ាត