ដោយមើលឃើញពីបញ្ហាសុខភាព ពិសេសផ្នែកអារម្មណ៍ និងស្មារតី ដែលបងប្អូនយើងមានភាពតានតឹង និងហត់នឿយច្រើន យុវតីមួយរូបបានច្នៃបង្កើតនូវផលិតផលធម្មជាតិដែលអាចកាត់បន្ថយស្ត្រេស បំបាត់ភាពហត់នឿយ និងធ្វើឱ្យអារម្មណ៍ស្រស់ស្រាយក្នុងការរស់នៅប្រចាំថ្ងៃ។

ហត្ថានារី ជាអាជីវកម្មមួយផ្ដោតលើការផលិតតែរុក្ខជាតិ ទៀនក្រអូបប្រហើរ ក្រមួនជំនួយដំណេក និងក្រែមការពារមូស ដែលជាប្រភេទផលិតផលបែប Healing ដោយប្រមូលយកទិន្នផលរុក្ខជាតិតាមរដូវកាលកែច្នៃជាផលិតផល ពិសេសគឺផលិតឡើងដោយស្ត្រីនៅជនបទ។

កញ្ញា ភាព សុថុន ស្ថាបនិក ហត្ថានារី បានមានប្រសាសន៍ថា៖

«កត្តាសំខាន់ៗដែលជំរុញឱ្យខ្ញុំបង្កើតហត្ថានារីឡើងគឺដោយសារមើលឃើញពីបញ្ហារបស់បងប្អូនយើងផង ណាមួយមានជំនាញផ្នែកគីមីចំណីអាហារស្រាប់ផង ទើបខ្ញុំចង់ប្រើជំនាញនេះដើម្បីបង្កើតនូវអ្វីដែលជះផលវិជ្ជមានដល់ការរស់នៅ ពិសេសជួយជីវភាពបងប្អូនស្ត្រីនៅជនបទបានមួយកម្រិតផងដែរ»។

កញ្ញាបន្ថែមថា ដំណើរការនៃសង្វាក់ផលិតកម្មទាំងអស់ គឺធ្វើឡើងដោយដៃទាំងស្រុង រាប់ទាំងការផលិត ការរចនានៅលើសំបកកញ្ចប់ និងការវេចខ្ចប់គឺមិនប៉ះពាល់ដល់បរិស្ថាននោះទេ។

សម្រាប់ ផលិតផលរបស់ហត្ថានារី ផ្ដោតលើ គ្រីមធម្មជាតិ ដូចជា គ្រីមការពារមូស គ្រីមជំនួយដំណេក និងគ្រីមលាបនៅពេលឈឺក្បាល ចំណែកប្រភេទតែមាន ៩រសជាតិ មានដូចជា តែរមៀត តែខ្ញី និងតែស្លឹកគ្រៃលាយស្លឹកក្រូច និងរំដេង តែផ្កាអមតៈ តែស្លឹកតើយ តែផ្កាឡេវអាវ តែម្ជូរព្រឹក និងតែព្នៅ។ ក្រៅពីនេះគេក៏មានជាប្រភេទទៀនក្រអូបដែលមានចំនួន ១២ក្លិន ផ្សំឡើងពីវត្ថុធាតុដើមក្នុងស្រុក និងមានការរចនារូបលើដបទឹកផងដែរ។

កញ្ញាបន្ថែមទៀតថា៖

«រាល់ផលិតផលសុទ្ធតែមានរឿងរ៉ាវផ្សេងៗគ្នានៅពីក្រោយ ដូចជារូបនៅលើដបទឹកដែលមានរូបផ្កាកំប្លោកពណ៌ស្វាយ ដោយសារខ្ញុំចូលចិត្តពណ៌ស្វាយ ហើយផ្កាកំប្លោកគឺគ្រួសារខ្ញុំចូលចិត្តញ៉ាំតាំងពីខ្ញុំនៅក្មេងដែលខ្ញុំចង់រំឭកពីការចងចាំល្អៗទាំងនេះ ហើយក៏មានរូបបញ្ជាក់ពីខេត្តនីមួយៗដែលយើងកំពុងធ្វើជាមួយបងប្អូនស្ត្រីមេផ្ទះ ស្ត្រីពិការ និងស្ត្រីម៉េម៉ាយដូចជានៅ ខេត្តសៀមរាប បាត់ដំបង បន្ទាយមានជ័យ កំពត និងភ្នំពេញ»។

ពាក់ព័ន្ធនឹងការ ស្ថាបិករូបនេះបន្តថា ការផលិតទៀនគឺងាយស្រួល ដែលអាចផលិតបានលឿនដល់ទៅរាប់រយ ឬរាប់ពាន់កែវក្នុងមួយថ្ងៃ ដោយសារការផលិតគឺយើងត្រូវការស្ងោរក្រមួនលាយជាមួយប្រេងរុក្ខជាតិរួចចាក់ចូលកែវ រង់ចាំឱ្យវាស្ងួតជាការស្រេច។ ឯការផលិតតែក៏មិនខុសពីការផលិតទៀនប៉ុន្មានដែរ តែគេត្រូវចំណាយពេលយូរជាងក្នុងការលាងសម្អាត និងចិតវត្ថុធាតុដើមឱ្យបានស្អាត និងត្រូវទំហំ ទើបយកទៅសម្ងួត។

គួរបញ្ជាក់ដែរថា ក្នុងការចាប់ផ្ដើម កញ្ញា សុថុន បានបង្កើតអាជីវកម្មនេះឡើងនៅឆ្នាំ២០១៩ ដោយប្រើដើមទុនតិចតួច ដោយសារខ្លួននៅកំពុងរៀនផង និងធ្វើការងារ freelance នៅឡើយ។ អ្វីដែលកញ្ញាចងចាំនោះគឺ មានលុយត្រឹម​ ១៦ដុល្លារដើម្បីទិញវត្ថុធាតុដើមក្នុងការផលិតតែរុក្ខជាតិ ហើយបានដាក់លក់ ជាលក្ខណៈ refill store នៅក្រុមហ៊ុន ដោយមានការគាំទ្រច្រើនទាំងបងប្អូនខ្មែរ និងបរទេស ទើបគេអាចបង្វិលដើមទុនដើម្បីផលិតបន្ថែម ទិញសម្ភារសម្រាប់វេចខ្ចប់ និងបង្កើតជាយីហោខ្លួនឯងដូចសព្វថ្ងៃ។

យ៉ាងណាមិញ បញ្ហាប្រឈមខ្លាំងនៅពេលចាប់ផ្ដើមនោះគឺ ដោយសារស្ថាបនិករូបនេះចេះទំនាញតែមួយមុខ ដែលត្រូវការរៀនជំនាញផ្សេងៗជាច្រើនទៀតដើម្បីដំណើរការអាជីវកម្មមួយបាន។ ដោយឡែកបច្ចុប្បន្ន ហត្ថានារីក៏អាចចំណេញខ្លះហើយ អ្វីដែលសំខាន់គឺយើងនៅមានស្តុកឥវ៉ាន់ច្រើន និងមានលទ្ធភាពអាចបង្កើតផលិតផលថ្មីផ្សេងៗទៀតបាន។ នេះជាអ្វីដែលម្ចាស់អាជីវកម្មរូបនេះបានលើកឡើង។

ចុងក្រោយ កញ្ញា ភាព សុថុន ក៏មានក្ដីស្រមៃគឺចង់បានពង្រីកការផលិតផលិតផលពីរុក្ខជាតិនេះឱ្យកាន់តែធំ អាចជួយដល់ស្ត្រីអ្នកផលិតបានកាន់តែច្រើន និងមានផលិតផលធម្មជាតិច្រើនមុខដើម្បីសម្រួលដល់ការរស់នៅ និងរក្សាការវេចខ្ចប់មិនប៉ះពាល់ដល់បរិស្ថាន និងប្រើប្រាស់បានយូរ៕