សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ការស្ទង់មតិជាលក្ខណៈអន្តរជាតិដ៏ធំមួយដែលត្រូវបានធ្វើឡើងដោយមជ្ឈមណ្ឌលស្រាវជ្រាវ Pew (Pew Research Center) ជាមួយបណ្តាប្រទេសចំនួន ៣៦ បានបង្ហាញពីទស្សនៈជាសកល ដែលភាគច្រើនមានទំនោរទៅលើប្រទេសចិនក្នុងផ្លូវវិជ្ជមាន ច្រើនជាងសហរដ្ឋអាមេរិក។
ចេញផ្សាយដោយកាសែតប៊ុលហ្គារី Novinata បានឱ្យដឹងថា ការសិក្សានេះ ធ្វើឡើងតាមរយៈការស្ទង់មតិលើប្រជាពលរដ្ឋពេញវ័យចំនួន ៤២ ១៥១ នាក់ ចាប់ពីថ្ងៃទី ៨ខែកុម្ភៈ ដល់ថ្ងៃទី ១៣ ខែឧសភា ឆ្នាំ ២០២៦ ដែលបង្ហាញពីកត្តាចំនួនពីរ ជំរុញឱ្យមានការផ្លាស់ប្តូរទស្សនទានរវាងសហរដ្ឋអាម៉េរិក និងមហាយក្សចិន ពោល គឺ ទី១ កំណើនប្រជាប្រិយភាពក្នុងឆាកអន្តរជាតិចំពោះទីក្រុងប៉េកាំង ខណៈដែលកេរ្តិ៍ឈ្មោះរបស់អាម៉េរិកបានធ្លាក់ចុះជាបន្តបន្ទាប់ ជាពិសេស នៅក្នុងអាណត្តិប្រធានាធិបតីរបស់លោក Donald Trump។
កាលពីឆ្នាំមុន សហរដ្ឋអាម៉េរិកនៅតែរក្សាបាននូវប្រជាប្រិយភាពរបស់ខ្លួនជាងប្រទេសចិន(តាមរយៈការស្ទង់មតិ) ប៉ុន្តែនៅក្នុងឆ្នាំ២០២៦ នេះ ជញ្ជីងបានផ្អៀងទៅម្ខាងយ៉ាងខ្លាំង ពោលគឺពេលនេះ ទីក្រុងប៉េកាំង ទទួលបានអត្រាគាំទ្រខ្ពស់ជាងទីក្រុងវ៉ាស៊ីនតោននៅតាមតំបន់សំខាន់ៗ រួមទាំងអាស៊ីប៉ាស៊ីហ្វិក មជ្ឈិមបូព៌ា និងក្នុងចំណោមប្រទេសជិតខាងផ្ទាល់របស់អាមេរិក ដូចជា កាណាដា និងម៉ិកស៊ិក ផងដែរ។
នៅក្នុងប្រទេសកាណាដា កាលពីឆ្នាំ២០២៣ មានប្រជាជន ៥៧ ភាគរយមើលឃើញសហរដ្ឋអាមេរិកក្នុងផ្លូវវិជ្ជមាន ប្រៀបធៀបនឹង ១៤ ភាគរយចំពោះប្រទេសចិន ប៉ុន្តែនៅឆ្នាំបន្ទាប់ក៏មានការប្រែប្រួល ជាពិសេស នៅក្នុងឆ្នាំ២០២៦នេះតែម្ដង ដែលការគាំទ្រក្រុងប៉េកាំងមានអត្រា ៤៤ ភាគរយ និង ៣៣ ភាគរយគាំទ្រក្រុងវ៉ាស៊ីនតោន។ ជាការកត់សម្គាល់ សហរដ្ឋអាមេរិក រក្សាបាននូវប្រជាប្រិយភាពខ្ពស់ជាងចិនតែនៅក្នុងប្រទេសចំនួន ៦ ប៉ុណ្ណោះ ក្នុងចំណោម ៣៦ ប្រទេស មានដូចជា ប្រទេសឥណ្ឌា ជប៉ុន ហ្វីលីពីន និងកូរ៉េខាងត្បូងជាដើម។
និន្នាការស្រដៀងគ្នានេះ ក៏កើតមានចំពោះការវាយតម្លៃលើថ្នាក់ដឹកនាំផងដែរ ដោយទំនុកចិត្តលើប្រធានាធិបតីចិន លោក Xi Jinping និងប្រធានាធិបតីអាមេរិក លោក Donald Trump នៅតែមានកម្រិតទាប។ ទោះជាយ៉ាងណាក៏ដោយ លោក Xi ទទួលបានប្រជាប្រិយភាពលើសលោក Trump លើការដឹកនាំកិច្ចការអន្តរជាតិនៅក្នុងប្រទេសភាគច្រើន។
នៅក្នុងបណ្តាប្រទេសអឺរ៉ុប ដូចជា អាល្លឺម៉ង់ ក្រិក អ៊ីតាលី ហូឡង់ អេស្ប៉ាញ ស៊ុយអែត និងចក្រភពអង់គ្លេស លោក Xi មានប្រជាប្រិយភាពនាំមុខលោក Trump រហូតដល់ទៅពីរខ្ទង់ បើទោះបីជាអ្នកទាំងពីរមិនទទួលបានការទុកចិត្តពីប្រជាជនភាគច្រើនក៏ដោយ។ ផ្ទុយទៅវិញ លោក Trump ទទួលបានអត្រាគាំទ្រខ្ពស់ជាងលោក Xi នៅក្នុងប្រទេសអាស៊ីមួយចំនួនដែលនៅជិតប្រទេសចិន ដូចជា ឥណ្ឌា ជប៉ុន និងហ្វីលីពីន។
គួរឱ្យដឹងដែរថា ប្រទេសចិនក៏ត្រូវបានបណ្តាប្រទេសភាគច្រើនមើលឃើញ និងទទួលបានកម្រិតកាន់តែខ្លាំងឡើងនៅក្នុងតំបន់ ក្នុងនាមជាដៃគូអភិវឌ្ឍន៍ដ៏គួរឱ្យទុកចិត្ត និងជាប្រទេសដែលរួមចំណែកដល់សន្តិភាពពិភពលោក។ នៅក្នុងប្រទេសអាហ្វ្រិកខាងត្បូង ៧២ ភាគរយនៃអ្នកឆ្លើយតប បានចាត់ទុកចិនជាដៃគូដ៏គួរឱ្យទុកចិត្តប្រៀបធៀបនឹង ៤៦ ភាគរយសម្រាប់អាម៉េរិក ខណៈដែល ៦៤ ភាគរយជឿជាក់ថាទីក្រុងប៉េកាំងរួមចំណែកដល់ស្ថិរភាពសកលដែលកើនឡើងពី ៤៧ ភាគរយនៅក្នុងឆ្នាំ២០២៣។
វិស័យតែមួយគត់ដែលសហរដ្ឋអាម៉េរិកអាចរក្សាបានប្រជាប្រិយភាពខ្ពស់ជាងចិន នោះគឺការយល់ឃើញអំពីការគោរពលើសេរីភាពបុគ្គល បើទោះបីជាគម្លាតនោះកំពុងរួមតូចយ៉ាងឆាប់រហ័សក៏ដោយ។ នៅក្នុងប្រទេសស៊ុយអែត ភាគរយនៃប្រជាជនដែលជឿថា រដ្ឋាភិបាលអាម៉េរិកគោរពសេរីភាពបុគ្គល បានធ្លាក់ចុះយ៉ាងខ្លាំងពី ៦១ ភាគរយក្នុងឆ្នាំ២០២១ មកត្រឹម ២៧ ភាគរយក្នុងឆ្នាំ២០២៦ ហើយការធ្លាក់ចុះនូវជំនឿនេះ យ៉ាងហោចណាស់ ២៥ ភាគរយត្រូវបានកត់ត្រានៅទូទាំងអឺរ៉ុបខាងលិច កូរ៉េខាងត្បូង និងកាណាដា ផងដែរ៕
Account
Security
Favourite Content