សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មបានអះអាងថា បច្ចុប្បន្ននេះ វិស័យសំបុកត្រចៀកកាំកម្ពុជា កំពុងតែពង្រីកទីផ្សារកាន់តែទូលាយ ខណៈដែលវេទិកាធុរកិច្ចសំបុកត្រចៀកកាំកម្ពុជា ក៏បានឆ្លុះបញ្ចាំងកាន់តែច្បាស់ពីការប្តេជ្ញាចិត្តយ៉ាងមុតមាំ និងមានសារៈសំខាន់សម្រាប់ការស្វែងយល់កាន់តែច្រើន អំពីវិស័យត្រចៀកកាំកម្ពុជា ជាពិសេសបានផ្ដល់ឱកាសជូនអាជីវករ និងពាណិជ្ជករជាតិ-អន្តរជាតិ ក្នុងការពង្រឹង និងពង្រីកការធ្វើពាណិជ្ជកម្មលើវិស័យត្រចៀកកាំ។
ឯកឧត្តម សំហេង បូរ៉ា រដ្ឋលេខាធិកាក្រសួងពាណិជ្ជកម្មបានមានប្រសាសន៍ថា វេទិកានេះនឹងជួយជំរុញ និងបង្កើតឱកាសក្នុងការអភិវឌ្ឍវិស័យត្រចៀកកាំកម្ពុជាក្នុងក្របខ័ណ្ឌជាតិ និងពាណិជ្ជកម្ម ជាមួយអន្តរជាតិ ដែលនឹងចូលរួមចំណែកក្នុងការបង្កើនកម្រិតចំណូលរបស់ប្រជាជនកម្ពុជា ជួយជំរុញកំណើនសេដ្ឋកិច្ច និងការអភិវឌ្ឍរបស់កម្ពុជា។
សូមបញ្ជាក់ថា វេទិកាធុរកិច្ចសំបុកត្រចៀកកាំកម្ពុជា បានរៀបចំឡើងជាលើកដំបូងនៅកម្ពុជា ដែលប្រព្រឹត្តទៅរយៈពេល២ថ្ងៃ ចាប់ពីថ្ងៃទី២៤ ដល់ថ្ងៃទី២៥ ខែតុលា ឆ្នាំ២០២៣ ដោយមានការចូលរួមពីពាណិជ្ជករ មកពីបណ្តាប្រទេសដែលនាំចូលសំបុកត្រចៀកកាំ ដើម្បីកែច្នៃ មានដូចជា ឥណ្ឌូនេស៊ី ម៉ាឡេស៊ី វៀតណាម ថៃ ភូមា ចិន (ហុងកុង ម៉ាកាវ កោះតៃវ៉ាន់) និងសិង្ហបុរីជាដើម ដើម្បីសិក្សាពីគុណភាពសំបុកត្រចៀកកាំកម្ពុជា ខណៈកម្ពុជា និងចិន បាន និងកំពុងចរចាបើកទីផ្សារនាំចេញសំបុកត្រចៀកកាំទៅប្រទេសចិននាពេលខាងមុខ។
ឯកឧត្តម រដ្ឋលេខាធិការក្រសួងពាណិជ្ជកម្ម បានលើកឡើងបន្ថែមថា ការធ្វើអាជីវកម្មក្នុងវិស័យត្រចៀកកាំនៅកម្ពុជា បាន និងកំពុងមានការកើនឡើងជាបន្តបន្ទាប់ តាមរយៈកំណើននៃការសាងសង់ផ្ទះត្រចៀកកាំស្ទើរគ្រប់ខេត្តក្រុងនៅទូទាំងប្រទេស រាប់ទាំងរាជធានីភ្នំពេញផងដែរ។
ឯកឧត្តម សំហេង បូរ៉ា បានគូសបញ្ចាក់ថា វិស័យត្រចៀកកាំ ក៏បានចូលរួមចំណែកយ៉ាងសកម្ម ក្នុងការអភិវឌ្ឍដល់សេដ្ឋកិច្ចគ្រួសារ សហគមន៍ និងសេដ្ឋកិច្ចជាតិ និងបានផ្តល់ការងារដល់ប្រជាពលរដ្ឋកម្ពុជា លើការងារសាងសង់ផ្ទះត្រចៀកកាំ សម្អាតសំបុក កែច្នៃ ដឹកជញ្ចូន និងការងារនៅក្នុងខ្សែច្រវាក់ផលិតកម្មសំបុកត្រចៀកកាំដទៃទៀត និងបានជួយលើកកម្ពស់កម្រិតជីវភាពរបស់អ្នកអភិរក្សផ្ទះត្រចៀកកាំ តាមរយៈការលក់សំបុកត្រចៀកកាំដើម ( មិនទាន់សម្អាត/មិនទាន់រើសរោមចេញ) សំបុកសម្អាតរួចកែច្នៃសំបុកជាភេសជ្ជៈ និងការកែច្នៃទៅជាផលិតផលពាក់ព័ន្ធដទៃទៀត។
ឯកឧត្តម បានជំរុញ និងលើកទឹកចិត្តដល់សហគមអ្នកផលិត និងនាំចេញសំបុកត្រចៀកកាំកម្ពុជា និងភាគីពាក់ព័ន្ធក្នុងវិស័យត្រចៀកកាំកម្ពុជា ត្រូវបន្តពង្រឹងគុណភាពផលិតផលសំបុកត្រចៀកកាំ បង្កើនបរិមាណផលិត ដើម្បីធានាឱ្យបាននូវស្ថិរភាពនៃការផ្គត់ផ្គង់ និងការបំពេញតាមលក្ខខណ្ឌ ក៏ដូចជានីតិវិធីតម្រូវនានាសម្រាប់ការនាំចេញទៅទីផ្សារអន្តរជាតិ។
លោកស្រី វ៉ា សុជិន ប្រធានសមាគមអ្នកផលិត និងនាំចេញសំបុកត្រចៀកកាំកម្ពុជា បានឱ្យដឹងថា វេទិកានេះគឺជាវេទិកាលើកដំបូង ដែលអាចនិយាយបានថា ជាប្រវត្តិសាស្រ្តសម្រាប់វិស័យត្រចៀកកាំកម្ពុជា ដែលត្រូវបានផ្តួចផ្តើមឡើងដោយសមាជិក សមាជិកានៃសមាគមអ្នកផលិត និងនាំចេញសំបុកត្រចៀកកាំកម្ពុជា ដើម្បីផ្សព្វផ្សាយពីវិស័យសំបុកត្រចៀកកាំកម្ពុជា ឱ្យទូលំទូលាយទៅកាន់ទីផ្សារក្នុងស្រុក និងអន្តរជាតិ, កសាងទំនាក់ទំនងរវាងពាណិជ្ជករក្នុងស្រុក និងអន្តរជាតិ ដើម្បីឈានដល់ការធ្វើពាណិជ្ជកម្ម ប្រកបដោយទំនុកចិត្ត, បង្កើតឱកាសឱ្យវិស័យពាក់ព័ន្ធចូលរួមគាំទ្រ និងទទួលបានផលប្រយោជន៍តាមរយៈការបង្ហាញនូវផលិតផល និងសេវាកម្មរបស់ខ្លួន និងស្វែងរកការគាំទ្រពីរាជរដ្ឋាភិបាល និងភាគីពាក់ព័ន្ធ ដើម្បីសម្របសម្រួលការនាំចេញ នាំចូលផលិតផលត្រចៀកកាំដោយស្របច្បាប់។
លោកស្រី ចុង ជា ទីប្រឹក្សាផ្នែកសេដ្ឋកិច្ច និងពាណិជ្ជកម្មនៃស្ថានទូចិនប្រចាំកម្ពុជា បានថ្លែងថា បច្ចុប្បន្ននាយកដ្ឋានពាក់ព័ន្ធនៃប្រទេសចិន និងកម្ពុជាកំពុងចរចាយ៉ាងសកម្មលើកិច្ចព្រមព្រៀងនាំចេញសំបុកត្រចៀកកាំកម្ពុជាទៅកាន់ប្រទេសចិន ។
លោកស្រី ចុង ជា បានមានប្រសាសន៍ថា ៖ «យើងទន្ទឹងរង់ចាំការនាំចូលសំបុកត្រចៀកកាំ ដែលមានគុណភាពខ្ពស់របស់កម្ពុជា ទៅកាន់ទីផ្សារប្រទេសចិន ខណៈដែលចិននៅតែជាដៃគូពាណិជ្ជកម្មធំបំផុតរបស់កម្ពុជា»។
បច្ចុប្បន្ន កម្ពុជាមានផ្ទះត្រចៀកកាំប្រមាណជាង ៥០០០ផ្ទះ ដោយមានកំណើនក្នុងរង្វង់១៥% ជារៀងរាល់ឆ្នាំ។ កំណើនសំណង់ផ្ទះត្រចៀកកាំនេះ បានធ្វើឱ្យមានកំណើនបរិមាណផលិតផលសំបុកត្រចៀកកាំជារៀងរាល់ឆ្នាំ ដោយជាមធ្យមមានប្រមាណ ១០០តោន ក្នុងមួយឆ្នាំ សម្រាប់ផ្គត់ផ្គង់នៅលើទីផ្សារ៕
Account
Security
Favourite Content