ម៉ារ៉ុក ៖ កម្ពុជាបានបង្ហាញការប្តេជ្ញាចិត្តក្នុងការពង្រឹងកិច្ចសហការជាមួយមូលនិធិរូបិយវត្ថុអន្តរជាតិ (IMF) និងធនាគារពិភពលោក (WB) ឱ្យកាន់តែរឹងមាំ សម្រាប់គាំទ្រការអភិវឌ្ឍសេដ្ឋកិច្ច និងសង្គមកម្ពុជា ខណៈស្ថាប័នហិរញ្ញវត្ថុអន្តរជាតិទាំងពីរនេះបានដើរតួនាទីយ៉ាងសំខាន់ក្នុងការជួយដល់ការអភិវឌ្ឍសេដ្ឋកិច្ច និងសង្គមកម្ពុជា ជាពិសេសផ្តល់អនុសាសន៍លើគោលនយោបាយសេដ្ឋកិច្ច និងហិរញ្ញវត្ថុ។

លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានដឹកនាំគណៈប្រតិភូចូលរួមក្នុងមហាសន្និបាតពេញអង្គប្រចាំឆ្នាំ២០២៣ របស់មូលនិធិរូបិយវត្ថុអន្តរជាតិ (IMF) និងធនាគារពិភពលោក (WB) ដែលត្រូវបានរៀបចំឡើងចាប់ពីថ្ងៃទី៩-១៥ ខែតុលា ឆ្នាំ២០២៣ នៅទីក្រុងម៉ារ៉ាកិច ប្រទេសម៉ារ៉ុក។

ធនាគារជាតិនៃកម្ពុជាបានឱ្យដឹងថា ការចូលរួមនេះបង្ហាញពីការប្តេជ្ញាចិត្តរបស់កម្ពុជាក្នុងការពង្រឹងកិច្ចសហការរវាងកម្ពុជា IMF និង WB ឱ្យកាន់តែរឹងមាំសម្រាប់គាំទ្រការអភិវឌ្ឍសេដ្ឋកិច្ច និងសង្គមកម្ពុជា ក៏ដូចជាផ្តល់ឱកាសក្នុងការពង្រឹងកិច្ចសហប្រតិបត្តិការទ្វេភាគី និងពហុភាគីជាមួយប្រទេសជាសមាជិកដទៃថែមទៀតផងដែរ។

មហាសន្និបាតឆ្នាំនេះ មានការចូលរួមជាចម្បងពីសំណាក់ទេសាភិបាលធនាគារកណ្តាល និងរដ្ឋមន្ត្រីហិរញ្ញវត្ថុ ដែលជាតំណាងប្រទេសសមាជិកនៅក្រុមប្រឹក្សាទេសាភិបាលនៃស្ថាប័នអន្តរជាតិទាំងពីរ។ គោលបំណងចម្បងមហាសន្និបាទនេះ គឺដើម្បីផ្សព្វផ្សាយពីវឌ្ឍនភាពការងារ និងទស្សនវិស័យរបស់ IMF និង WB ដែលបង្ហាញពីលទ្ធភាពនៃការជួយពង្រឹងបន្ថែមទៀតក្នុងការអភិវឌ្ឍសេដ្ឋកិច្ចប្រទេសជាសមាជិក។

ទន្ទឹមនេះ វេទិកាពាក់ព័ន្ធនានាក៏ត្រូវបានរៀបចំផងដែរ ដើម្បីផ្តល់ជាវេទិកាពិភាក្សាពីស្ថានភាព និងបញ្ហាប្រឈមនៃសេដ្ឋកិច្ចពិភពលោក និងតំបន់។ ប្រធានបទចម្បងៗដែលបាន និងកំពុងយកចិត្តទុកដាក់ពី IMF និង WB រួមមាន ការលុបបំបាត់ភាពក្រីក្របំផុតនៅលើពិភពលោក វិសមភាពចំណូល ការអភិវឌ្ឍនិងហិរញ្ញប្បទានបៃតង បញ្ហាអាកាសធាតុ ការអនុវត្តនយោបាយរូបិយវត្ថុវិត្ថារកម្ម ឌីជីថលូបនីយកម្ម ជាដើម។

គួរកត់សម្គាល់ថា កន្លងមក IMF និង WB បានដើរតួនាទីយ៉ាងសំខាន់ក្នុងការជួយដល់ការអភិវឌ្ឍសេដ្ឋកិច្ចនិងសង្គមកម្ពុជា តាមរយៈការផ្តល់ជំនួយបច្ចេកទេស ហិរញ្ញប្បទាន អាហារូបករណ៍ក្នុងការអភិវឌ្ឍធនធានមនុស្ស តាមដាននិងការវាយតម្លៃសេដ្ឋកិច្ច និងការផ្តល់អនុសាសន៍លើគោលនយោបាយសេដ្ឋកិច្ចនិងហិរញ្ញវត្ថុ ជាដើម។ ទន្ទឹមនេះ កម្ពុជាជាប្រទេសក្នុងតំបន់អាស៊ីប៉ាស៊ីហ្វិក ដែលទទួលបានអត្ថប្រយោជន៍ក្នុងរូបភាពជាជំនួយបច្ចេកទេសច្រើនជាងគេពី IMF ផងដែរ។

ឆ្លៀតក្នុងឱកាសនោះ លោកជំទាវបណ្ឌិតទេសាភិបាល បានជួបពិភាក្សាការងារទ្វេភាគីជាមួយភាគីពាក់ព័ន្ធនានា ជាពិសេស កិច្ចប្រជុំទ្វេភាគីជាមួយធនាគារកណ្តាលម៉ារ៉ុក ដែលលោកជំទាវ និងឯកឧត្តម Abdellatif Jouahri ទេសាភិបាល ធនាគារកណ្តាលម៉ារ៉ុក បានឯកភាពគ្នាក្នុងការពង្រឹងកិច្ចសហប្រតិបត្តិការលើបច្ចេកវិទ្យាហិរញ្ញវត្ថុ ដែលក្នុងនោះមានប្រព័ន្ធទូទាត់ និងរូបិយប័ណ្ណឌីជីថល ជាដើម។

ស្របពេលជាមួយគ្នានេះ លោកជំទាវបណ្ឌិតក៏បានជួបប្រជុំទ្វេភាគីជាមួយឯកឧត្តម Perry Warjiyo ទេសាភិបាលធនាគារកណ្តាលឥណ្ឌូណេស៊ី ដើម្បីពិភាក្សាពីចុះអនុស្សរណៈយោគយល់ សំដៅពង្រឹងកិច្ចសហប្រតិបត្តិការទ្វេភាគីថែមទៀត ជាពិសេសលើការតភ្ជាប់ប្រព័ន្ធទូទាត់អេឡិចត្រូនិកឆ្លងដែន ដែលនឹងសម្រួលដល់ទេសចរណ៍ ការធ្វើពាណិជ្ជកម្ម និងការវិនិយោគក្នុងប្រទេសទាំងពីរ។ ភាគីទាំងពីរក៏យល់ព្រមលើកកម្ពស់ការផ្លាស់ប្តូរបទពិសោធន៍លើការអនុវត្តនយោបាយរូបិយវត្ថុ ការងារស្ថិតិ និងប្រតិបត្តិការរបស់សាខាធនាគារកណ្តាលតាមបណ្តារាជធានី-ខេត្ត៕