THACO AGRI គឺជាសមាជិកនៃសម្ព័ន្ធក្រុមហ៊ុន​ THACO ដែលបានបង្កើតឡើងក្នុងឆ្នាំ២០១៩។ បន្ទាប់ពីប្រតិបត្តិការរយៈពេល៥ ឆ្នាំ THACO AGRI បានបង្កើតតំបន់ផលិតកម្មកសិកម្មចម្រុះ មានទ្រង់ទ្រាយធំ ដែលក្នុងនោះប្រមូលផ្តុំទៅលើការដាំដុះចេក ​ម្នាស់ និង​ដំណាំហូបផ្លែផ្សេងទៀត (ស្វាយ ក្រូចថ្លុង ធុរេន) រួមផ្សំនឹងការចិញ្ចឹមគោ លើផ្ទៃដីសរុបជិត  ៤០ ០០០ ហិកតាក្នុងប្រទេសកម្ពុជា។

ដោយកំណត់យុទ្ធសាស្ត្រវិនិយោគសម្រាប់ការអភិវឌ្ឍន៍កសិកម្មប្រកបដោយនិរន្តរភាព THACO AGRI បានកសាង​ប្រព័ន្ធហេដ្ឋារចនាសម្ព័ន្ធជាសង្វាក់បិទជិត និងទំនើបនៅប្រទេសកម្ពុជា រួមមានតំបន់ផលិតកម្ម រោងចក្រកែច្នៃ រោងចក្រចេក ឃ្លាំងត្រជាក់សម្រាប់រក្សាផ្ទុកផ្លែឈើ ការដឹកជញ្ជូនតាមប្រព័ន្ធ និងនាំចេញ កសិដ្ឋានចិញ្ចឹមសត្វ ​ប្រព័ន្ធធារាសាស្រ្ត បណ្តាញអគ្គិសនី លំនៅឋានកម្មករ ផ្សារទំនើប​… ប្រព័ន្ធទាំងនេះមិនត្រឹមតែបំពេញតម្រូវការផលិតកម្មប៉ុណ្ណោះទេ ​ថែមទាំងបង្កើតឱ្យមានជីវភាពរស់នៅ និងបរិយាកាសការងារប្រកបដោយស្ថិរភាពសម្រាប់កម្មករជាង ១៤ ០០០ នាក់ ដែលក្នុងនោះ កម្មករកម្ពុជាជាង ១២ ០០០ នាក់ផងដែរ។

ឈរនៅខាងមុខផ្ទះមួយជួរធំទូលាយ មានប្រព័ន្ធទឹកស្អាត និងភ្លើងមិនគិតថ្លៃ អ្នកនាង ហង្ស វិជ្ជាការ អាយុ ២៤ឆ្នាំ ជាកម្មការិនីរោងចក្រចេក របស់ក្រុមហ៊ុន THACO AGRI នៅស្រុកស្នូល ខេត្តក្រចេះ បាននិយាយថា៖

«ខ្ញុំធ្វើការនៅទីនេះបាន៥ ឆ្នាំមកហើយ ដោយក្រុមហ៊ុនផ្តល់អត្ថប្រយោជន៍ជាច្រើនដល់បុគ្គលិក ដូចជា ៖ ការស្នាក់នៅ រៀបចំអាហារ ៣ ពេល/ថ្ងៃ ប្រើប្រាស់ភ្លើង និងទឹកដោយឥតគិតថ្លៃ។ ម្ហូប​នេះ​មាន​រសជាតិ​ឆ្ងាញ់ និង​បរិបូរណ៍»។

គ្រួសារទាំងមូលរបស់អ្នកនាង ហង្ស វិជ្ជាកា រួមមានតាំងពីប្តី ឪពុកម្តាយ និងបងប្អូននៅខេត្តសៀមរាប សុទ្ធតែបានផ្លាស់មក​ធ្វើការនៅទីនេះ។ ពីមុនជីវិតរបស់ពួកគាត់នៅខេត្តសៀមរាបជួបការលំបាកជាច្រើន ប៉ុន្តែចាប់តាំងពីមានឱកាសមកធ្វើការនៅទីនេះ ជីវភាពរស់នៅគ្រួសាររបស់អ្នកបានផ្លាស់ប្តូរច្រើន។ ​

អ្នកនាងបានបញ្ជាក់ថា ៖

«តាំង​ពី​មក​ធ្វើ​ការ​នៅ​ទី​នេះ ជីវភាពរស់នៅរបស់​ខ្ញុំ​កាន់​តែ​ប្រសើរឡើង។ ខ្ញុំ​ទទួល​បាន​ប្រាក់​ខែ​ជាង ២៥០ ដុល្លារ​ក្នុង​មួយ​ខែ ប្តី​ខ្ញុំ​បានប្រាក់ខែ​ជិត ៣០០ ដុល្លារ​ក្នុង​មួយ​ខែ។​ ពួក​ខ្ញុំមិន​ចាំបាច់​ចំណាយ​លើ​ការ​ស្នាក់​នៅ ថ្លៃ​ភ្លើង ឬ​ទឹក​ទេ ដូច្នេះ​ ប្រាក់​ខែ​ដែល​នៅ​សល់​អាច​រ៉ាប់រង​ការ​ចំណាយ​រស់​នៅ​របស់ពួក​ខ្ញុំ។ ពួក​ខ្ញុំអាច​ទិញ​ម៉ូតូ​បាន​ដោយ​មិន​មាន​ការ​លំបាក»។

លោក ជា សេងឃុន កម្មករ​នៅកសិដ្ឋាន​ចិញ្ចឹម​គោនៃតំបន់​ពហុកម្មកូនមុំ ក្រុមហ៊ុន THACO AGRI ក្នុង​ខេត្ត​រតនគិរី បាន​ប្រាប់ឱ្យដឹងថា ៖ ចំណូល​នៅ​ទី​នេះ​គឺ​សមរម្យ​ណាស់។ ម៉ោងធ្វើការ ៨ ម៉ោង ហើយមានរបបសម្រាកតាមច្បាប់កម្ពុជា។ ប្រសិនបើអ្នកធ្វើការថែមម៉ោង អ្នកនោះនឹងទទួលបានប្រាក់បន្ថែម។

លោកបានបន្តថា ៖

«ចំណូល​បច្ចុប្បន្ន​របស់​ខ្ញុំ​ និងគ្រួសារ​គឺ​ជាង​២​លាន​រៀល​ក្នុង​មួយ​ខែ។ ក្រោយ​មក​ធ្វើ​ការ​នៅ​ទី​នេះ ជីវភាព​គ្រួសារ​ក៏​ប្រសើរ​ឡើង។ មុន​មក​ធ្វើ​ការ​នៅ​ទី​នេះ​ការ​ងារ​របស់​ពួក​ខ្ញុំមិនមាន​ស្ថិរភាព​ទេ»។

លោកបានបង្ហាញអារម្មណ៍សប្បាយរីករាយពេលបានធ្វើការនៅក្រុមហ៊ុននេះ ហើយដោយ​សារក្រុមហ៊ុនមួយនេះ លោកអាចមានលទ្ធភាពសងបំណុលពីមុនទាំងអស់ ហើយថែមទាំងទិញម៉ូតូទៀតផង។

លោក Phan Ba ​​Cuong អគ្គនាយករងនៃតំបន់​ពហុកម្មកូនមុំ ​ ក្រុមហ៊ុន THACO AGRI មានប្រសាសន៍ថា៖  ក្រុមហ៊ុនតែងតែយកចិត្តទុកដាក់លើគោលនយោបាយសម្រាប់កម្មករពេលធ្វើការ នៅក្រុមហ៊ុន កម្មករបានចុះកិច្ចសន្យាការងារ បង់ថ្លៃធានារ៉ាប់រង និងទទួលការបណ្តុះបណ្តាលវិជ្ជាជីវៈ។ ក្រៅពីគោរពតាមច្បាប់ការងាររបស់កម្ពុជា ក្រុមហ៊ុនក៏ផ្តល់កន្លែងស្នាក់នៅដោយឥតគិតថ្លៃ និងរៀបចំអាហារ ៣ពេលក្នុងមួយថ្ងៃសម្រាប់កម្មករ ហើយអគ្គិសនី និងទឹកអនុញ្ញាតឱ្យប្រើប្រាស់ដោយឥតគិតថ្លៃ​។ ក្រុមហ៊ុនមានបន្ទប់សុខាភិបាល​នៅតាមកសិដ្ធាននីមួយៗ​ និងមានការពិនិត្យសុខភាពប្រចាំឆ្នាំ។ ក្រុមហ៊ុនក៏បានបើកថ្នាក់បឋមសិក្សាចំនួន ២២ ថ្នាក់ តាមកម្មវិធីអប់រំរបស់ក្រសួងអប់រំកម្ពុជា សំរាប់កូនចៅរបស់កម្មករ​ជាង ៨០០នាក់ ។ ទន្ទឹមនឹងនោះ បានសាងសង់សួនសម្រាប់កុមារ ផ្តល់ជូនសម្លៀកបំពាក់ សៀវភៅ សម្ភារៈសិក្សា ដល់កុមារ ហើយក្រៅពីនោះ ក្រុមហ៊ុនក៏បានបើកផ្សារទំនើប​ដោយមានទំនិញសំខាន់ៗជាង​១០០០មុខ ដើម្បីបំពេញតម្រូវការទិញទំនិញរបស់កម្មករនៅទីនេះ។  

លោក Phan Ba ​​Cuong បាន​បន្ថែម​ថា ៖

«នៅ​ក្នុងតំបន់ពហុកម្មកូនមុំ ​​បច្ចុប្បន្ន​មាន​កម្មករ​ខ្មែរ​ជាង​ ៦ ៣០០​នាក់ ហើយ​នៅ​ពេល​ខាង​មុខ​ក្រុមហ៊ុន​នឹង​បន្ត​ពង្រីក​ទំហំ​ផលិតកម្ម ដែល​ធ្វើ​ឱ្យ​តម្រូវការ​ជ្រើសរើស​កម្មករ​មាន​ចំនួន​ច្រើន​។ តាមគម្រោង នៅចុងឆ្នាំ២០២៤ ក្រុមហ៊ុននឹងជ្រើសរើសកម្មករជាង ៣០០០នាក់បន្ថែមទៀត ដើម្បីបម្រើលើវិស័យមួយចំនួនដូចជា៖ បច្ចេកទេសដាំដុះ ចិញ្ចឹមសត្វ ជួសជុលគ្រឿងចក្រ… ក្រុមហ៊ុននឹងសម្របសម្រួលជាមួយក្រសួងការងារ និងមជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគិរី ដើម្បីជ្រើសរើសកម្មករ ក៏ដូចជាបង្កើតវគ្គបណ្តុះបណ្តាលទាក់ទងនឹងបច្ចេកទេសកសិកម្ម និងបសុសត្វនៅក្រុមហ៊ុន»។

លោក នូ ថេ អភិបាលស្រុកលំផាត់បានមានប្រសាសន៍ថា៖ ក្រុមហ៊ុនបាន​រួមចំណែកក្នុងការកាត់បន្ថយភាពក្រីក្រនៅក្នុងតំបន់​។ នៅក្នុងស្រុកលំផាត់តែមួយ បច្ចុប្បន្ននេះមានមនុស្សប្រមាណ ៣០០០នាក់កំពុងធ្វើការឱ្យក្រុមហ៊ុន THACO AGRI និងកម្មកររាប់ពាន់នាក់ផ្សេងទៀតមកពីខេត្ត-ក្រុងជាច្រើនទូទាំងប្រទេសកម្ពុជាក៏មកធ្វើការនៅទីនេះដែរ។

លោកសង្កត់ធ្ងន់ថា៖

«វត្តមានរបស់ THACO AGRI នៅស្រុកលំផាត់ បាននាំមកនូវផលប្រយោជន៍សេដ្ឋកិច្ចយ៉ាងច្រើនដល់មូលដ្ឋាន ផ្តល់ការងារជាច្រើន ជួយកាត់បន្ថយការធ្វើចំណាកស្រុក និងលើកកម្ពស់ជីវភាពរស់នៅរបស់ប្រជាពលរដ្ឋ»។

ក្នុងដំណើរបំពេញទស្សនកិច្ចការងារនៅ THACO AGRI នាពេលថ្មីៗនេះ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងគណៈប្រតិភូបានសម្តែងនូវក្តីរីករាយ និងចាប់អារម្មណ៍ាយ៉ាងខ្លាំងចំពោះលទ្ធផលដែល ​THACO AGRI សម្រេចបាន។ ឯកឧត្តម នាយឧត្តមសេនីយ៍ បានមានប្រសាសន៍ថា មូលដ្ឋានសម្រាប់ការសាងសង់ និងអភិវឌ្ឍន៍ប្រកបដោយចីរភាព គឺផ្អែកលើកត្តាមូលដ្ឋានចំនួន ៧ គឺអាហារ ការស្នាក់នៅ ការសម្រាក សុខភាព ការសិក្សា ការធ្វើដំណើរ និងការកម្សាន្ត។ គម្រោងកសិកម្មខ្នាតធំរបស់ THACO AGRI មិនត្រឹមតែធ្វើអោយប្រសើរឡើងនូវផលិតភាពកសិកម្មប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ដល់ការអភិវឌ្ឍន៍សេដ្ឋកិច្ចសង្គមក្នុងស្រុកផងដែរ៕