សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បើទោះជាកម្ពុជាកំពុងញាំញីដោយសង្គ្រាមព្រំដែនក៍ដោយ ក៏ប៉ុន្តែអត្រាអតិផរណារបស់កម្ពុជានៅក្នុងឆមាសទី ២ នឹងបន្តធ្លាក់ចុះមកនៅត្រឹម ១.៣ភាគរយ ខណៈដែលអត្រាអតិផរណានៅឆមាសទី១ ឆ្នាំ២០២៥ មានជាមធ្យម ៣.៥ ភាគរយ។ នេះបើយោងតាមរបាយការណ៍ធនាគារជាតិនៃកម្ពុជា។
គិតត្រឹមខែមិថុនា ឆ្នាំ២០២៥ នេះ អតិផរណាបានថយចុះមកត្រឹម ១.៦ភាគរយ ដែលបណ្តាលមកពីការធ្លាក់ចុះតម្លៃប្រេងឥន្ធនៈ និងការធ្លាក់ចុះនៃតម្លៃម្ហូបអាហារ។ តម្លៃប្រេងឥន្ទៈនៅក្នុងឆមាសទី១ ឆ្នាំ២០២៥ ជាមធ្យមជាង ៣ ៩០០រៀល ប៉ុណ្ណោះក្នុងមួយលីត្រ ខណៈដែលកាលពីឆ្នាំ២០២៤ ជាមធ្យមមានតម្លៃជាង ៤ ៣០០រៀលក្នុងមួយលីត្រ។
លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជា បានឱ្យដឹងថា ការធ្លាក់ចុះនៃអតិផរណាមកនៅត្រឹម ១.៣ភាគរយ នៅឆមាសទី២នេះ បានបង្ហាញថា ការឡើងថ្លៃទំនិញនៅឆមាសទី២ មានកម្រិតទាបជាងការឡើងថ្លៃទំនិញកាលពីដើមឆ្នាំ ហើយកម្រិតនៃការឡើងថ្លៃនេះទៀតសោតគឺទី១ ដោយសារសង្គ្រាមព្រំដែនរវាងកម្ពុជា-ថៃ។ ទី២. ដោយសារការព្រួយបារម្ភរបស់អ្នកប្រើប្រាស់បានកាត់បន្ថយចំណាយ ក៏ដូចជាការប្រើប្រាស់ដែលធ្វើឱ្យទំនិញលក់មិនសូវដាច់។ ទាំងនេះជាកត្តាធ្វើឱ្យអតិផរណាថយល្បឿន។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានមានប្រសាសន៍ថា អត្រាអតិផរណាដែលព្យាករណ៍ដោយធនាគារជាតិនេះ ជាអត្រាមួយល្អប្រសើរក្នុងការគ្រប់គ្រង ម៉ាក្រូសេដ្ឋកិច្ច ជាពិសេស គ្រប់គ្រងលើតម្លៃទំនិញទីផ្សារមិនឡើងថ្លៃខ្ពស់ និងមិនប៉ះពាល់ទៅដល់ការប្រកបរបរកស៊ីរបស់អាជីវករ និងប្រជាពលរដ្ឋ។
ដូច្នេះ ដើម្បីពង្រឹងការតាមដានអតិផរណា និងការឆ្លើយតបគោលនយោបាយ ធនាគារជាតិនៃកម្ពុជា បានបង្កើតក្រុមការងារបច្ចេកទេស ដើម្បីតាមដានសូចនាករតម្លៃសំខាន់ៗ ដោយបានចាប់ដៃគូជាមួយវិទ្យាស្ថានជាតិស្ថិតិនៃក្រសួងផែនការ និងក្រសួងសេដ្ឋកិច្ច និងហិរញ្ញវត្ថុ ដើម្បីកែសម្រួលកញ្ចប់អ្នកប្រើប្រាស់ដោយប្រើប្រាស់ឆ្នាំ២០១៩ ជាឆ្នាំមូលដ្ឋានថ្មី៕
Account
Security
Favourite Content