សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ធនាគារជាតិនៃកម្ពុជា (NBC) បានឱ្យដឹងថា ស្ថិតនៅក្រោមស្ថិរភាពម៉ាក្រូសេដ្ឋកិច្ច និងការគ្រប់គ្រងទុនបម្រុងអន្តរជាតិប្រកបដោយប្រសិទ្ធភាពបានរួមចំណែកបង្កើនទុនបម្រុងអន្តរជាតិដល់ ២២.៥ ពាន់លានដុល្លារក្នុងឆ្នាំ២០២៤ ពោលគឺកើនឡើង ១២.៦ ភាគរយធៀបនឹងឆ្នាំ២០២៣ ដែលមានត្រឹមប្រមាណ ២០ពាន់លានដុល្លារអាមេរិកប៉ុណ្ណោះ។
លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា ថ្លែងនៅក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារឆ្នាំ២០២៥ របស់ធនាគារជាតិនៃកម្ពុជា កាលពីថ្ងៃទី០៨ ខែកុម្ភៈ ឆ្នាំ២០២៥ ថា កម្រិតទុនបម្រុងអន្តរជាតិរបស់កម្ពុជា ត្រូវបានចាត់ទុកថាមានកម្រិតខ្ពស់សមស្រប ដែលស្មើនឹងប្រមាណ៧ខែ នៃការនាំចូលទំនិញ និងសេវាសម្រាប់គ្រាបន្ទាប់។
លោកជំទាវបណ្ឌិត ជា សិរី បានឱ្យដឹងទៀតថា ចំពោះប្រព័ន្ធធនាគារ និងហិរញ្ញវត្ថុនៅព្រះរាជាណាចក្រកម្ពុជា ឥណទាននៅតែបន្តកើនឡើង ប៉ុន្តែក្នុងល្បឿនយឺតជាងមុន។ ចំពោះការថមថយនេះ ដោយសារកត្តាតម្រូវការ និងផ្គត់ផ្គង់។ ចំពោះកត្តាតម្រូវការ គឺដោយសារការងើបឡើងយឺតនៃវិស័យមួយចំនួនដូចជា វិស័យសំណង់ និងអចលនទ្រព្យ ទេសចរណ៍ ការលក់ដុំ និងរាយ ដែលនាំឱ្យអតិថិជនកាត់បន្ថយការខ្ចី ហើយចំពោះកត្តាផ្គត់ផ្គង់ គឺដោយសារគ្រឹះស្ថានធនាគារ និងហិរញ្ញវត្ថុ បង្កើនការប្រុងប្រយ័ត្នក្នុងការផ្តល់ឥណទានស្ថិតក្នុងស្ថានភាពដែលសេដ្ឋកិច្ចតំបន់ និងពិភពលោកមានភាពមិនប្រាកដប្រជាខ្ពស់។
លោកជំទាវបណ្ឌិត ជា សិរី បានគូសបញ្ជាក់ថា ៖
«យ៉ាងណាមិញ ខាងផ្នែកប្រាក់បញ្ញើបានបន្តកើនឡើងល្អ ដោយមានអត្រាកំណើន១៦.៣% ជាមួយស្ថានភាពរឹងមាំនៃដើមទុន និងលទ្ធភាពបញ្ចេញសាច់ប្រាក់មានកម្រិតខ្ពស់ ដែលបង្ហាញថា ប្រព័ន្ធធនាគារមានភាពធន់ ជាមួយនឹងជំនឿទុកចិត្តរឹងមាំពីសាធារណជន»។
សូមជម្រាបថា ទុនបម្រុងអន្តរជាតិ គឺជាសាច់ប្រាក់របស់ប្រទេសមួយ និងទ្រព្យសម្បត្តិផ្សេងទៀតដែលកាន់កាប់ដោយធនាគារកណ្តាលរបស់ខ្លួន។ ទុនបំរុងទាំងនេះត្រូវបានប្រើដើម្បីមានឥទ្ធិពលលើតម្លៃរូបិយប័ណ្ណរបស់ប្រទេសមួយ បំពេញកាតព្វកិច្ចទូទាត់អន្តរជាតិ និងរក្សាទំនុកចិត្តទីផ្សារហិរញ្ញវត្ថុ។ ទុនបំរុងអន្តរជាតិក្រោមការគ្រប់គ្រងរបស់ NBC រួមមានរូបិយប័ណ្ណបរទេស មាស និង SDR (Special Drawing Right)។
តាមរបាយការណ៍របស់ធនាគារជាតិនៃកម្ពុជា បានឱ្យដឹងថា នៅឆ្នាំ២០២៣ ទុនបម្រុងអន្តរជាតិរបស់កម្ពុជា មានប្រមាណ ២០ពាន់លានដុល្លារអាមេរិកប៉ុណ្ណោះ៕
Account
Security
Favourite Content