សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្នុងការផលិតជីកំប៉ុស មានវិធីសាស្ត្រច្រើនក្នុងការកែច្នៃ និងប្រើនូវវត្ថុធាតុដើមផ្សេងៗគ្នា ក្នុងនោះ សំបកស៊ុត ត្បិតជាសំណល់ផ្ទះបាយ និងត្រូវបានគេមើលរំលងក៏ពិតមែន តែវាជាវត្ថុធាតុដើមដ៏សំខាន់មួយក្នុងការផលិតជីកំប៉ុសទឹក និងមានប្រសិទ្ធភាពខ្ពស់ចំពោះការលូតលាស់របស់ដំណាំ។
ក្នុងការផលិតជីកំប៉ុសទឹកប្រភេទនេះ កសិករអាចប្រើនូវគ្រឿងផ្សំងាយៗដូចជា សំបកស៊ុតមាន់ ឬស៊ុតទា ស្កររងូ ឬស្ករអំពៅ និងទឹកដែលច្រកដបតាមបរិមាណដែលចង់បាន។ សម្រាប់បរិមាណវត្ថុធាតុដើម គេអាចប្រើសំបកពងមាន់ ៥គ្រាប់ ចំពោះទឹក ១.៥-២លីត្រ និងស្កររងូ ១ស្លាបព្រាបាយ។
ពាក់ព័ន្ធនឹងបច្ចេកទេសផលិត ដំបូងគេយកសំបកស៊ុតទៅលាងសម្អាតឱ្យស្អាត រួចហាលថ្ងៃឱ្យស្ងួតល្អ ទើបយកទៅបំបែកដោយបុក ឬកិនឱ្យទៅជាបំណែកតូចៗដើម្បីងាយស្រួលច្រកចូលដប បន្ទាប់មកយកដបទឹកដែលមានច្រកទឹកស្រាប់នោះលាយជាមួយស្កររងូ រួចបន្ថែមកម្ទេចសំបកស៊ុតដែលបានបុកខាងលើ។ បិតគ្របដបឱ្យជិត និងក្រឡុកល្បាយឱ្យសព្វចូលគ្នា ដើម្បីឱ្យវត្ថុធាតុដើមធ្វើប្រតិកម្មសព្វល្អ ហើយរក្សាទុក។
ក្នុងការរក្សាទុក គេអាចទុកដបជីទឹកបាននៅកន្លែកត្រជាក់ មានពន្លឺ ពោល គឺមិនងងឹតពេក ឬក្ដៅពេក ដោយត្រូវការរក្សាទុករយៈពេល ៣ថ្ងៃ ដោយឡែកថ្ងៃទី២ ល្បាយជីអាចនឹងមានបញ្ចេញនូវហ្គាសពីការធ្វើប្រតិកម្ម ហេតុនេះគួរមួលបង្ហើបគម្របដបឱ្យមានអុកស៊ីសែនចូលខ្លះ រួចបិតវិញ។ ក្រោយរយៈពេល ៣ថ្ងៃ គឺអាចប្រើប្រាស់បានហើយ តែបើគ្រប់អាយុល្អតែម្ដងគឺរយៈពេល ១សប្ដាហ៍។
បន្ទាប់ពីបានជីទឹកហើយ កសិករអាចអនុវត្តនូវវិធីប្រើប្រាស់ងាយៗគឺ ប្រើជីកំប៉ុសទឹក ១ស្លាបព្រាបាយជាមួយនឹងទឹក ១០-១៥លីត្រ សម្រាប់ស្រោចទៅលើដំណាំយកស្លឹក និងយកផ្កា ឬស្រោចគល់ដំណាំយកផ្លែក៏បាន។
គួរបញ្ជាក់ដែរថា ជីទឹកដែលផលិតបានមានផ្ទុកនូវសារធាតុចិញ្ចឹមខ្ពស់ ជាពិសេសកាល់ស្យូម ដែលមានក្នុងសំបកស៊ុត និងសារធាតុរ៉ែផ្សេងទៀត ដែលជួយឱ្យដំណាំមានសុខភាពល្អ មានសារធាតុចិញ្ចឹមគ្រប់គ្រាន់ ចេញផ្កាច្រើន ផ្លែធំល្អ កាត់បន្ថយជំងឺ ពិសេសអាចកែច្នៃកាកសំណល់ឱ្យទៅជាជីមានប្រយោជន៍ក្នុងវិស័យកសិកម្ម៕
Account
Security
Favourite Content