ភ្នំពេញ ៖ ក្រសួងបរិស្ថាន , ក្រុមហ៊ុន VERYWORDS, និងវិទ្យាស្ថានអភិវឌ្ឍន៍បៃតងសកល (GGGI) បានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បី លើកកម្ពស់ការដាក់ពង្រាយទោចក្រយានយន្តអគ្គិសនីដែលមានគុណភាពខ្ពស់ និងប្រកបដោយចីរភាពដល់បរិស្ថាន កម្ពុជា។ ការដាក់ពង្រាយទោចក្រយានយន្តអគ្គិសនីទាំងអស់នេះ ក៏នឹងចូលរួមចំណែកដល់គោលដៅកាត់បន្ថយ ការបញ្ចេញឧស្ម័នផ្ទះកញ្ចក់របស់រាជរដ្ឋាភិបាលកម្ពុជា និងសាធារណរដ្ឋកូរ៉េផងដែរ។

VERYWORDS គឺជាក្រុមហ៊ុនផ្តល់សេវាមធ្យោបាយធ្វើដំណើរអគ្គិសនី និង ជាក្រុមហ៊ុនអព្យាក្រឹតកាបូន ហើយ នាពេលកន្លងមក ក្រុមហ៊ុននេះ បានវិនិយោគទុនជាង២លានដុល្លារ ទៅលើរោងចក្រដំឡើងទោចក្រយានយន្តអគ្គិសនី នៅខេត្តកណ្តាល ព្រមទាំងបានជួយបង្កើតឱកាសការងារបៃតងដោយផ្ទាល់ចំនួន៦០កន្លែង។ តាមរយៈ អនុស្សរណៈ នៃការយោគយល់គ្នានេះ VERYWORDS គ្រោងនឹងបរិច្ចាគទោចក្រយានយន្តអគ្គិសនី ចំនួន ៨០០០ គ្រឿងដល់មន្ត្រី រាជការកម្ពុជា ដើម្បីប្រើប្រាស់ដោយឥតគិតថ្លៃ និងឥតលក្ខខណ្ឌ។ ទន្ទឹមនឹងនេះ ក្រុមហ៊ុនក៏នឹងដំឡើងស្ថានីយ សាកថ្មយ៉ាងតិចចំនួន ២០០ ទីតាំង ដើម្បីគាំទ្រដល់ការប្រើប្រាស់ទោចក្រយានយន្តអគ្គិសនីទាំងអស់នេះផងដែរ។ ការរួមចំណែកនេះ ត្រូវបានរំពឹងថានឹងចូលរួមកាត់បន្ថយការបញ្ចេញឧស្ម័នផ្ទះកញ្ចក់ជាមធ្យមចំនួន ៥,០៤០ តោន ក្នុងមួយឆ្នាំ (យោងតាមការប៉ាន់ប្រមាណថាទោចក្រយានយន្តអគ្គិសនីមួយគ្រឿង ប្រើប្រាស់ជាមធ្យម ៤០ គីឡូម៉ែត្រ ក្នុងមួយឆ្នាំ)។ ក្នុងនោះផងដែរ ការងារបៃតងថ្មីចំនួន ១៥០ កន្លែង ក៏នឹងត្រូវបានបង្កើតឡើងផងដែរ។ បន្ថែម ពីលើការជួយកម្ពុជាឱ្យសម្រេចបាននូវគោលដៅដឹកជញ្ជូនអគ្គិសនីឱ្យបាន៧០% ដូចដែលបានចែងនៅក្នុងយុទ្ធសាស្ត្រ អភិវឌ្ឍន៍ រយៈពេលវែងប្រកបដោយអព្យាក្រឹតកាបូន អនុស្សរណៈនៃការយោគយល់គ្នានេះ ក៏ជាជំហានដ៏សំខាន់ មួយក្នុងការឆ្ពោះទៅកាន់ការអនុវត្តគម្រោងកាត់បន្ថយការបញ្ចេញឧស្ម័នផ្ទះកញ្ចក់ដែលអាចត្រូវបានទទួលស្គាល់ជា អន្តរជាតិ។

ក្រសួងបរិស្ថាននឹងជួយសម្របសម្រួល និងត្រួតពិនិត្យការផ្ទេរ ទោចក្រយានយន្តអគ្គិសនីទាំងអស់នេះ ក៏ដូចជា វាយតម្លៃគម្រោងរបស់ VERYWORDS ស្តីពី «ការកសាងហេដ្ឋារចនាសម្ព័ន្ធសាកថ្មអគ្គិសនី ដើម្បីលើកកម្ពស់ មធ្យោបាយធ្វើដំណើរអគ្គិសនី»។ បន្ថែមពីលើនេះ ក្រសួងបរិស្ថាន ក៏នឹងសហការជាមួយស្ថាប័នដៃគូ ដូចជា GGGI ដើម្បីជួយកសាងសមត្ថភាពរបស់ក្រសួងពាក់ព័ន្ធនានា ដើម្បីបង្កើនការយល់ដឹងអំពីគម្រោងកាត់បន្ថយការបញ្ចេញឧស្ម័នផ្ទះកញ្ចក់ និងដើម្បីធានាឱ្យបាននូវអនុលោមភាពស្របតាមវិធានប្រតិបត្តិសម្រាប់ការអនុវត្តមាត្រា៦ នៃ កិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុនៅកម្ពុជា ព្រមទាំងច្បាប់ បទប្បញ្ញត្តិ និងការណែនាំនានារបស់ រាជរដ្ឋាភិបាលកម្ពុជា។

នាពេលកន្លង GGGI ក៏បានផ្តល់ជំនួយបច្ចេកទេសដល់ក្រសួងបរិស្ថានកម្ពុជា ដើម្បីកសាងសមត្ថភាពរៀបចំខ្លួនសម្រាប់ ការអនុវត្តមាត្រា៦ និងសមត្ថភាពរៀបចំខ្លួនរបស់ តំណាងមកពីក្រសួង ស្ថាប័ន ពាក់ព័ន្ធនៃក្រុមការងារបច្ចេកទេស ស្តីពីការប្រែប្រួលអាកាសធាតុ និងបរិស្ថាន។

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានមានប្រសាសន៍ថា៖ គោលបំណងអាកាសធាតុដ៏ធំ របស់កម្ពុជាត្រូវបានគាំទ្រដោយដំណោះស្រាយប្រកបដោយបច្ចេកទេស និងភាពច្នៃប្រឌិត ហើយទាំងអស់នេះ មាន គោលដៅកាត់បន្ថយការបញ្ចេញឧស្ម័នផ្ទះកញ្ចក់ពីវិស័យសំខាន់ៗក្នុងប្រទេសកម្ពុជា។ អនុស្សរណៈនៃការយោគយល់ គ្នានេះ នឹងពង្រឹងការប្តេជ្ញាចិត្តរបស់យើងក្នុងការកាត់បន្ថយការបញ្ចេញឧស្ម័នផ្ទះកញ្ចក់ ក្នុងវិស័យដឹកជញ្ជូននិងធ្វើ ដំណើរ ដែលនេះគឺស្របតាមយុទ្ធសាស្រ្តចក្រាវិស័យបរិស្ថាន ២០២៣-២០២៨ របស់ក្រសួងបរិស្ថាន, ការចូលរួម ចំណែករបស់ជាតិ ដើម្បីអនុវត្តអនុសញ្ញាក្របខ័ណ្ឌសហប្រជាជាតិ ស្តីពីការប្រែប្រួលអាកាសធាតុ និង យុទ្ធសាស្ត្រ អភិវឌ្ឍន៍រយៈពេលវែងប្រកបដោយអព្យាក្រឹតកាបូន ព្រមទាំងជំរុញនូវការសម្របខ្លួនទៅនឹងការប្រើប្រាស់មធ្យោបាយ ដឹកជញ្ជូនអគ្គិសនីទូទាំងប្រទេសផងដែរ។ ឯកឧត្តមបណ្ឌិត អ៊ាង សុផល្លែត ក៏បានគូសបញ្ជាក់ផងដែរថា រាល់គម្រោង កាត់បន្ថយការបញ្ចេញឧស្ម័នផ្ទះកញ្ចក់ដែលត្រូវបានទទួលស្គាល់ជាអន្តរជាតិ នឹងត្រូវគោរពតាមវិធានប្រតិបត្តិសម្រាប់ ការអនុវត្តមាត្រា៦ នៃកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុនៅកម្ពុជា ព្រមទាំងច្បាប់ និងបទ ប្បញ្ញត្តិទាំងអស់របស់រាជរដ្ឋាភិបាលកម្ពុជា ដោយមិនប៉ះពាល់ដល់បូរណភាព និងអធិបតេយ្យភាពរបស់កម្ពុជាឡើយ។

បន្ថែមពីលើទោចក្រយានយន្តអគ្គិសនី និងស្ថានីយសាកថ្មទាំងអស់នេះ ក្រុមហ៊ុន VERYWORDS ក៏នឹងផ្តល់សេវា កម្មក្រោយពេលលក់រយៈពេលពីរឆ្នាំដោយឥតគិតថ្លៃផងដែរ។ លោក Sungwoo KIM នាយកប្រតិបត្តិនៃក្រុមហ៊ុន VERYWORDS បាននិយាយថាតាមរយៈក្របខ័ណ្ឌហិរញ្ញប្បទានកាបូនមាត្រា៦ យើងបានសម្រេចចិត្តវិនិយោគយ៉ាង ម៉ឺងម៉ាត់ក្នុងការផ្គត់ផ្គង់ទោចក្រយានយន្តអគ្គិសនីចំនួន ៨០០០ គ្រឿងដល់មន្ត្រីរាជការនៃរាជរដ្ឋាភិបាលកម្ពុជា ហើយ ដំណើរការនេះក៏ទទួលបានការគាំទ្រពីរដ្ឋាភិបាលនៃសាធារណរដ្ឋកូរ៉េផងដែរ។ ភាពជាដៃគូនេះ មិនត្រឹមតែបង្កើន សកម្មភាពកាត់បន្ថយការបំពុលខ្យល់ក្នុងប្រទេសទាំងពីរប៉ុណ្ណោះទេ ហើយថែមទាំងនឹងជំនួសទោចក្រយានយន្ត ដែល បញ្ចេញសារធាតុបំពុលខ្យល់ ជាមួយនឹងទោចក្រយានយន្តអគ្គិសនីដែលមានគុណភាពខ្ពស់ និងមិនប៉ះពាល់ដល់ បរិស្ថាននៅក្នុងប្រទេសកម្ពុជា។ កិច្ចសហប្រតិបត្តិការនេះ នឹងពន្លឿនការអភិវឌ្ឍមធ្យោបាយធ្វើដំណើរប្រកបដោយ ចីរភាព។

កញ្ញា Shomi Kim តំណាង GGGI ប្រចាំកម្ពុជា មានប្រសាសន៍ថា៖ ក្នុងនាមជាទីប្រឹក្សាដ៏គួរឱ្យទុកចិត្តរបស់រដ្ឋាភិបាល កម្ពុជា, GGGI មានមោទនភាពដែលបានគាំទ្រដល់គំនិតផ្តួចផ្តើមមួយនេះ។ កិច្ចសហការក្រោមក្របខណ្ឌមាត្រា៦ នៃកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ នឹងពន្លឿនសមិទ្ធផលនៃការកាត់បន្ថយផលប៉ះពាល់ អាកាសធាតុសកល តាមរយៈការផ្ទេរការវិនិយោគអាកាសធាតុពីប្រទេសអភិវឌ្ឍន៍ទៅកាន់ប្រទេសកំពុងអភិវឌ្ឍន៍។ ដើម្បីធានាឱ្យបាននូវសុច្ចរិតភាពបរិស្ថានកម្រិតខ្ពស់បំផុត ជាមួយនឹងយន្តការហិរញ្ញប្បទានប្រកបដោយភាពច្នៃប្រឌិត តាមរយៈការប្រើប្រាស់ច្បាប់ និងបទបញ្ញត្តិ ប្រកបដោយសុក្រិតភាពដែលផ្តល់ដោយមាត្រា៦ ខ្ញុំពិតជាមាន សេចក្តី រំភើបរីករាយដែលបានឃើញពីការអនុវត្តយ៉ាងឆាប់រហ័សក្នុងការអភិវឌ្ឍន៍ហេដ្ឋារចនាសម្ព័ន្ធ និងការដាក់ឱ្យដំណើរការ ទោចក្រយានយន្តអគ្គិសនីទាំងអស់នេះ។ ខ្ញុំសូមកោតសរសើរភាគីពាក់ព័ន្ធទាំងអស់ ក៏ដូចជារាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋកូរ៉េ ដែលអាចសហការគ្នាក្នុងការអនុវត្តគម្រោងកាត់បន្ថយការបញ្ចេញឧស្ម័នផ្ទះកញ្ចក់ ដែលមានការទទួលស្គាល់ពីអន្តរជាតិ។ ខ្ញុំក៏សូមកោតសរសើរទៅដល់ភាគី VERYWORDS ដែលជាផ្នែកនៃការ បង្កើតនិងអនុវត្តគម្រោង ដែលបានដាក់ចេញនូវដំណោះស្រាយស្របទៅនឹងតម្រូវការសង្គម និងបរិស្ថាន ដើម្បីលើក កម្ពស់វិស័យដឹកជញ្ជូនប្រកបដោយចីរភាពនៅកម្ពុជា៕