សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សហភាពសហព័ន្ធយុវជនកម្ពុជា (ស.ស.យ.ក.) ដោយមានកិច្ចសហការគាំទ្រពីក្រសួង-ស្ថាប័ន សភាពាណិជ្ជកម្មកម្ពុជា និងសមាគមពាក់ព័ន្ធ បានរៀបចំពិព័រណ៍ផលិតផលខ្មែរ ក្រោមប្រធានបទ «ខ្មែរធ្វើបាន៖ ចូលរួមជំរុញ គាំទ្រផលិតផលក្នុងស្រុក» ដែលនឹងប្រព្រឹត្តទៅរយៈពេល ៣ ថ្ងៃផ្តើមពីរសៀលថ្ងៃទី២៦ ដល់ថ្ងៃទី២៨ ខែកញ្ញា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ(អគារG-H-I-J-K-L)។
ក្រុមហ៊ុន សហគ្រាស ចំនួន១២៥ នឹងបង្ហាញផលិតផលក្នុងស្រុកយ៉ាងសម្បូរបែបជូនមហាជនទស្សនា និងសម្រាប់ជាវយកទៅប្រើប្រាស់ចំនួន ២៨៣ស្តង់។ ក្រៅពីនេះពិព័រណ៍ក៏នឹងមានកម្មវិធីអមជាច្រើនផ្សេងទៀត រួមមានកិច្ចពិភាក្សា ការប្រគុំតន្រ្តី ការបង្ហាញបសុសត្វ និងការចាប់រង្វាន់ផ្សងសំណាងដ៏ច្រើនសន្ធឹកសន្ធាប់ផងដែរ។
ឯកឧត្តម សុខ សប្បាយណា សមាជិកគណៈអចិន្រ្តៃយ៍សហភាពសហព័ន្ធយុវជនកម្ពុជា (ស.ស.យ.ក.) និងជាប្រធានក្រុមការងារប្រតិបត្តិកម្មវិធីពិព័រណ៍ផលិតផលខ្មែរ បានលើកឡើងថា៖ ពិព័រណ៍នេះមានគោលបំណងជំរុញ និងគាំទ្រផលិតផលក្នុងស្រុក បង្ហាញពីស្មារតីរួបរួមរបស់ប្រជាជាតិក្នុងការលើកស្ទួយកិត្យានុភាព និងចូលរួមអភិវឌ្ឍសេដ្ឋកិច្ចជាតិ។
លោកបានបញ្ជាក់ថា ៖
«អនុភាពសេដ្ឋកិច្ចជាតិនឹងកើនឡើងនៅពេលយើងខិតខំបង្កបង្កើនផល ផលិត កែច្នៃ និងពង្រីកទីផ្សារ ធ្វើឱ្យទំនិញក្នុងស្រុកបានដល់ដៃប្រជាពលរដ្ឋ និងធ្វើការនាំចេញ ហើយគ្រប់ភាគីពាក់ព័ន្ធចូលរួមគាំទ្រ និងផ្សព្វផ្សាយ។ អនាគតសេដ្ឋកិច្ចជាតិនឹងទទួលបានជោគជ័យ អាស្រ័យដោយស្មារតីរួបរួមគ្នារបស់ប្រជាជាតិខ្មែរ។ អ្វីដែលសំខាន់មូលដ្ឋានគ្រឹះដើម្បីឧត្តមភាពជាតិ គឺជាប្រធានបទសំខាន់មួយក្នុងចំណោមប្រធានបទសំខាន់ដទៃទៀតដែលនឹងត្រូវលើកយកមកពិភាក្សា ចែករំលែកដោយវាគ្មិនជាបញ្ញវន្តជាច្រើនរូបនៅក្នុងកម្មវិធីពិព័រណ៍ផលិតផលខ្មែរ ក្រោមប្រធានបទ ខ្មែរធ្វើបាន៖ ចូលរួម ជំរុញ គាំទ្រផលិតផលក្នុងស្រុក»។
លោកបានបញ្ជាក់ឱ្យដឹងទៀតថា នៅពេលដែលពលរដ្ឋខ្មែរជ្រើសរើសប្រើប្រាស់ផលិតផលក្នុងស្រុកមានន័យថា បាន និងកំពុងជួយបង្កើនការងារនៅក្នុងស្រុក និងជំរុញសេដ្ឋកិច្ចជាតិឲ្យរីកចម្រើន ក៏ដូចជាកំពុងរួមចំណែកក្នុងការរក្សាគុណភាព និងភាពច្នៃប្រឌិតស្តង់ដារខ្មែរ ដែលកំពុងបង្ហាញពីមោទនភាពក្នុងការគាំទ្រសិល្បៈ ផលិតផលវប្បធម៌ និងបេតិកភណ្ឌខ្មែរ៕
Account
Security
Favourite Content