សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាទូទៅ តែងមានការភាន់ច្រឡំមកលើគ្រឹះស្ថានធនាគារ និងហិរញ្ញវត្ថុ ដោយពលរដ្ឋមួយចំនួនលើកឡើងថា គ្រឹះស្ថានធនាគារ ឬគ្រឹះស្ថានមីក្រូហិរញ្ញវត្ថុបានបង្ខំឱ្យពួកគាត់លក់ទ្រព្យដើម្បីយកលុយមកសងស្ថាប័នធនាគារ ឬមីក្រូហិរញ្ញវត្ថុវិញ ប៉ុន្តែបើតាមមន្ត្រីជាន់ខ្ពស់នៃសមាគមធនាគារនៅកម្ពុជាបានអះអាងថា គ្មានគ្រឹះស្ថានណាមួយមានសិទ្ធិបង្ខំឱ្យអតិថិជនលក់ទ្រព្យធានាដើម្បីយកលុយមកសងធនាគារ ឬមីក្រូហិរញ្ញវត្ថុនោះទេ ។
បើតាមលោក សុខ ចាន់ នាយកផ្នែកទំនាក់ទំនងនៃសមាគមធនាគារនៅកម្ពុជាបានថ្លែងប្រាប់បណ្ដាញព័ត៌មាន AMS នៅថ្ងៃទី១២ ខែសីហា ២០២៦ បានឱ្យដឹងថា គោលដៅតែមួយគត់របស់គ្រឹះស្ថានធនាគារ និងមីក្រូហិរញ្ញវត្ថុ ដែលផ្ដល់កម្ចីទៅកាន់អតិថិជនគឺចង់ឱ្យអតិថិជនរីកចម្រើន នៅពេលដែលអតិថិជនមានជីវភាពរីកចម្រើន នោះធនាគារ ឬមីក្រូហិរញ្ញវត្ថុដែលផ្ដល់កម្ចីទៅកាន់អតិថិជនក៏ទទួលបានការសងត្រឡប់ពីអតិថិជនមកវិញ ប៉ុន្តែក្នុងករណីអតិថិជនទទួលកម្ចីទៅប្រើប្រាស់ ប៉ុន្តែបែរជាខាតដោយប្រការណាមួយ ហើយមិនមានលទ្ធភាពសងត្រលប់ គ្រឹះស្ថានហិរញ្ញវត្ថុដែលផ្ដល់កម្ចីមិនមានសិទ្ធិក្នុងការបង្ខំឱ្យអតិថិជនលក់ទ្រព្យធានាដើម្បីសងត្រលប់ឡើយ ។
លោកបន្តថា នៅពេលអតិថិជនយកកម្ចីទៅប្រើប្រាស់បែរជាបរាជ័យ គ្រឹះស្ថានធនាគារ ឬមីក្រូហិរញ្ញវត្ថុតែងរកដំណោះស្រាយ សម្របសម្រួលដើម្បីឱ្យភាពប្រសើរឡើងវិញ ។ ក្នុងករណីឥណទាននោះខូច ដោយសារតែអតិថិជនអស់លទ្ធភាពសងត្រលប់មកកាន់ធនាគារវិញ គ្រឹះស្ថានផ្ដល់កម្ចីអាចប្រើប្រាស់យន្តការច្បាប់ដើម្បីដោះស្រាយ ដោយអាចប្ដឹងឡើងទៅតុលាការ ដើម្បីស្នើឱ្យច្បាប់ជួយដោះស្រាយ ។ ក្នុងករណីនេះ អាចធ្វើទៅបានក្រោយពេលមានការសម្របសម្រួល និងដោះស្រាយតាមនីតិវិធីនានាអស់លទ្ធភាពហើយនៅតែមិនអាចទៅរួច ។
លោកថា ៖
« បើសិនជាមានករណីបង្ខំឱ្យអតិថិជនលក់ទ្រព្យដើម្បីសងត្រលប់មកកាន់ធនាគារ ហើយបើសមាគមបានរកឃើញ និងមានភស្តុតាងបញ្ជាក់ថាគ្រឹះស្ថាននោះពិតជាបានបង្ខំឱ្យអតិថិជនលក់ទ្រព្យសងមកវិញមែន នោះខាងសមាគមនឹងមិនលើកលែងទេ ព្រោះក្នុងវិស័យធនាគារ និងហិរញ្ញវត្ថុ មានក្រមប្រតិបត្តិដែលបានចែងរួមគ្នា» ។
ដោយឡែក លោក កាំង តុងងី ប្រធាននាយកដ្ឋានទំនាក់ទំនងរបស់សមាគមមីក្រូហិរញ្ញវត្ថុកម្ពុជា និងជាអ្នកនាំពាក្យ បានមានប្រសាសន៍ថា ជាទូទៅ មុននឹងផ្ដល់កម្ចីទៅអតិថិជនរូបណាម្នាក់ គ្រឹះស្ថានធនាគារ ឬមីក្រូហិរញ្ញវត្ថុ តែងតែវាយតម្លៃទៅលើអត្តចរិត ទៅលើទ្រព្យធានា និងទៅលើលក្ខខណ្ឌនានា ដើម្បីធានាបានថា កម្ចីដែលអតិថិជនយកទៅប្រើប្រាស់ចំគោលដៅ និងរីកចម្រើន ។ លើសពីនេះដែរ មុននឹងផ្ដល់កម្ចី គ្រឹះស្ថានក៏បានពន្យល់ទៅអតិថិជនពីលក្ខខណ្ឌ និងកាតព្វកិច្ចរបស់អតិថិជនក្នុងការសងត្រលប់មកកាន់គ្រឹះស្ថានវិញ ហើយលក្ខខណ្ឌទាំងនេះ មិនត្រឹមតែពន្យល់ផ្ទាល់មាត់ទេ តែក៏បានដាក់ចូលទៅក្នុងកិច្ចសន្យាកម្ចី ដើម្បីឱ្យអតិថិជន ក៏ដូចជាគ្រឹះស្ថានមានឯកសារច្បាស់លាស់មួយផ្ទៀងផ្ទាត់បន្ថែមនៅពេលក្រោយ ។
លោកបន្តថា ៖
«ការប្រើប្រាស់កម្ចីទាំងអស់មិនប្រាកដថាជោគជ័យ១០០ភាគរយនោះទេ ក្នុងករណីមានបញ្ហាណាមួយ ជាទូទៅគ្រឹះស្ថាននីមួយៗក៏មានយន្តការដើម្បីកាត់បន្ថយបញ្ហា ឬក៏ដោះស្រាយបញ្ហាទាំងនោះដែរ តែក៏ទាមទារឱ្យមានការចូលរួមពីអតិថិជន ដើម្បីរួមគ្នារកដំណោះស្រាយ» ។
យោងតាមសេចក្ដីថ្លែងការណ៍រួមរបស់សមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជា នៅថ្ងៃទី១២ ខែសីហា ឆ្នាំ២០២៦ បានឱ្យដឹងថា សមាគមទាំងពីរបន្តយកចិត្តទុកដាក់តាមដានយ៉ាងហ្មត់ចត់ចំពោះ ការពិនិត្យ និងដោះស្រាយបណ្ដឹង ប្រកបដោយគោលការណ៍យុត្តិធម៌ តម្លាភាព ទាន់ពេលវេលា និងរក្សាការសម្ងាត់ស្របតាមច្បាប់ និងបទប្បញ្ញត្តិជាធរមាន ។ លើសពីនេះ សមាគមទាំងពីរ ក៏បានបន្តប្ដេជ្ញាចិត្តអនុវត្តស្របតាមច្បាប់ និងបទប្បញ្ញត្តិជាធរមាន ព្រមទាំងសហការជាមួយភាគីពាក់ព័ន្ធ ដើម្បីពង្រឹងការផ្ដល់សេវាហិរញ្ញវត្ថុប្រកបដោយការទទួលខុសត្រូវ កិច្ចការពារអតិថិជន ការដោះស្រាយបណ្ដឹង និងការអប់រំផ្នែកហិរញ្ញវត្ថុ ។ សមាគមទាំងពីរ នៅតែបន្តកិច្ចសន្ទនាប្រកបដោយការស្ថាបនាជាមួយភាគីពាក់ព័ន្ធទាំងអស់ ដើម្បីសម្រេចបានដំណោះស្រាយជាក់ស្ដែង កិច្ចការពារអតិថិជន និងពង្រឹងទំនុកចិត្តសាធារណជនមកលើប្រព័ន្ធធនាគារ ៕
Account
Security
Favourite Content