សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ធនាគារកណ្តាលនៅជុំវិញពិភពលោកកំពុងកែប្រែយុទ្ធសាស្ត្របម្រុងរូបិយប័ណ្ណបរទេសរបស់ខ្លួនជាបណ្តើរៗ ដោយកាត់បន្ថយការចាក់គ្រឹះលើប័ណ្ណបំណុលរដ្ឋាភិបាលអាមេរិក (U.S. Treasury bonds)ហើយងាកមកទិញមាសសុទ្ធជំនួសវិញ ដែលនេះជាការផ្លាស់ប្តូរទម្រង់រចនាសម្ព័ន្ធយ៉ាងសំខាន់ក្នុងការរក្សាទ្រព្យសម្បត្តិជាតិ និងមិនធ្លាប់មានក្នុងរយៈពេលជិត១០០ឆ្នាំកន្លងមកនេះ។
ក្នុងរយៈពេល ៤ ឆ្នាំចុងក្រោយនេះ ធនាគារកណ្តាលតាមបណ្តាប្រទេសជឿនលឿនមួយចំនួនបានទិញមាសជាមធ្យម ១០០០ តោនក្នុងមួយឆ្នាំ ដែលជាការកើនឡើងយ៉ាងខ្លាំងបើធៀបនឹងមធ្យមភាគ ៥០០ តោនក្នុងមួយឆ្នាំនាអំឡុងមួយទសវត្សរ៍មុន។ ការបង្កើនល្បឿននៃការសន្សំមាសយ៉ាងកំហុកនេះ បានកើតឡើងនៅក្នុងបរិបទនៃភាពមិនច្បាស់លាស់ផ្នែកភូមិសាស្ត្រនយោបាយ និងសេដ្ឋកិច្ច ដែលកំពុងបាំងស្រមោលលើទស្សនវិស័យរបស់អ្នកគ្រប់គ្រងទុនបម្រុងជាតិ។ នេះជាតួលេខដែលបានស្រាវជ្រាវដោយ World Gold Council កាលពីអំឡុងខែកុម្ភៈដល់ខែឧសភាកន្លងមក។
ជាការកត់សម្គាល់ អស់រយៈពេលជាង ៧០ ឆ្នាំមកហើយ ប័ណ្ណបំណុលរដ្ឋាភិបាលអាមេរិកបានដើរតួជាទ្រព្យសម្បត្តិបម្រុងដ៏ចម្បង និងស្វ័យប្រវត្តិសម្រាប់រដ្ឋាភិបាលបរទេសទាំងឡាយលើពិភពលោក។ យ៉ាងណាក៏ដោយ យន្តការដេញថ្លៃទិញបំណុលអាមេរិកដោយស្វ័យប្រវត្តិនេះកំពុងតែមានភាពទន់ខ្សោយទៅៗ ហើយធនាគារកណ្តាលនានាកំពុងផ្តល់អាទិភាពខ្លាំងលើការសន្សំមាសដុំវិញ ខណៈដែលទណ្ឌកម្មហិរញ្ញវត្ថុ និងវិធានការរឹតបន្តឹងច្បាប់បាន និងកំពុងកែប្រែទម្រង់នៃលំហូរទុនសកល។
កត្តាជំរុញដ៏សំខាន់នៃការផ្លាស់ប្តូរនេះ គឺកើតឡើងក្រោយការប្រែក្លាយទណ្ឌកម្មហិរញ្ញវត្ថុទៅជាឧបករណ៍នយោបាយការបរទេសហួសហេតុ ជាពិសេសដោយរដ្ឋាភិបាលក្រុងវ៉ាស៊ិនតោន។ ការអនុវត្តទណ្ឌកម្មពាណិជ្ជកម្ម ការបង្កកគណនី និងការរឹបអូសទ្រព្យសម្បត្តិធំៗប្រឆាំងនឹងប្រទេសមួយចំនួន ដូចជា រុស្ស៊ី អ៊ីរ៉ង់ និងវេណេស៊ុយអេឡា ជាដើម បានធ្វើឱ្យទាំងប្រទេសគូប្រជែងយុទ្ធសាស្ត្រ និងប្រទេសសម្ព័ន្ធមិត្តរបស់អាមេរិក ចាប់ផ្តើមបាត់បង់ទំនុកចិត្ត និងវាយតម្លៃឡើងវិញអំពីការពឹងផ្អែកលើប្រព័ន្ធហិរញ្ញវត្ថុដែលគ្រប់គ្រងដោយប្រាក់ដុល្លារអាមេរិក។
ជាទូទៅ នៅពេលដែលទណ្ឌកម្មហិរញ្ញវត្ថុអន្តរជាតិឈានដល់កម្រិតរាប់ពាន់លានដុល្លារ ហានិភ័យនយោបាយការបរទេសនឹងតភ្ជាប់ដោយផ្ទាល់ទៅនឹងការគ្រប់គ្រងទ្រព្យសម្បត្តិបម្រុងរបស់ជាតិ។ ហានិភ័យនៃការបង្កកទ្រព្យសម្បត្តិ បានបង្ខំឱ្យក្រសួងហិរញ្ញវត្ថុនៃប្រទេសមួយចំនួនស្វែងរកជម្រើសផ្សេងទៀតដែលមិនអាចរងផលប៉ះពាល់ដោយទណ្ឌកម្ម និងគ្មានការគ្រប់គ្រងកណ្តាល ដើម្បីរក្សាតម្លៃទ្រព្យសម្បត្តិរយៈពេលវែង។ ការផ្លាស់ប្តូរនេះបានបង្កើតជារបត់ដ៏លំបាកមួយសម្រាប់អ្នករៀបចំគោលនយោបាយសកល។ ការរឹតបន្តឹងទណ្ឌកម្មលើប្រព័ន្ធប្រាក់ដុល្លារកាន់តែខ្លាំង អាចបង្កើនល្បឿននៃការជម្លៀសដើមទុនចេញពីគ្រឹះស្ថានហិរញ្ញវត្ថុបស្ចិមប្រទេស ខណៈដែលការអនុវត្តធូររលុងពេក នឹងធ្វើឱ្យប្រសិទ្ធភាពនៃទណ្ឌកម្មក្នុងនាមជាឧបករណ៍ការទូតថយចុះ។ ការដាក់កំហិតហិរញ្ញវត្ថុដោយឯកតោភាគី បានបង្កើតសម្ពាធជាប្រព័ន្ធដែលជំរុញឱ្យបណ្តាប្រទេសមួយចំនួនស្វែងរក និងបង្កើតផ្លូវទូទាត់ទុនផ្សេងៗជំនួសវិញ។
ជារួម ក្រៅពីមាសដែលជាទុនបម្រុងសុវត្ថិភាព នៅមានជម្រើសដទៃទៀតដែលបណ្តាធនាគារកណ្តាលចាប់យកមកប្រើជំនួសប្រាក់ដុល្លារ រួមមានដូចជា រូបិយប័ណ្ណបម្រុងសំខាន់ជាលុយអឺរ៉ូ យ័ន យេន ផោន, ការទូទាត់ជារូបិយប័ណ្ណក្នុងស្រុក, ទំនិញយុទ្ធសាស្ត្រមានទាំងប្រេង ឬលោហៈ និងរូបិយប័ណ្ណឌីជីថល CBDC/Crypto ផងដែរ៕
Account
Security
Favourite Content