ភ្នំពេញ៖ ធនាគារ ជីប ម៉ុង ដែលជាធនាគារក្នុងស្រុកដ៏ធំមួយវិនិយោគដោយកូនខ្មែរនិងក្រុមហ៊ុននាំចេញអង្ករធំជាងគេរបស់កម្ពុជា អេមរុរ៉ាយស៍ (Amru Rice Cambodia Co., Ltd) បានចុះហត្ថលេខាលើកិច្ចសហការស្តីពី “ភាពជាដៃគូយុទ្ធសាស្ត្រហិរញ្ញប្បទាន ដើម្បីជំរុញផលិតកម្មស្រូវអង្កររនៅកម្ពុជា និងបង្កើនការនាំចេញទៅកាន់ទីផ្សារអន្តរជាតិឱ្យកាន់តែច្រើនថែមទៀត។ គោលបំណងនៃពិធីចុះហត្ថលេខាលើកិច្ចសហការនេះគឺដើម្បីជួយដល់កសិករខ្មែរនិងគាំទ្រកសិកម្មស្រូវអង្ករនៅកម្ពុជា តាមរយៈការផ្តល់កម្ចីរបស់ធនាគារជីប ម៉ុង ទៅដល់សហគមន៍កសិករ ប្រជាកសិករ ម្ចាស់អាជីវកម្មខ្នាតតូចនិងមធ្យម ដែលស្ថិតនៅក្រោមបណ្តាញរបស់ក្រុមហ៊ុន អេមរុរ៉ាយស៍ ។ កិច្ចព្រមព្រៀងនេះនឹងជួយអភិវឌ្ឍវិស័យកសិកម្មនិងហិរញ្ញវត្ថុដល់កសិករនៅកម្ពុជា។

ការសម្រេចបាននូវភាពជាដៃគូយុទ្ធសាស្រ្តហិរញ្ញប្បទាន បានត្រូវធ្វើឡើងរវាងអ្នកឧកញ៉ា លាង ម៉េង អគ្គនាយកធនាគារជីប ម៉ុង និង លោកឧកញ៉ា សុង សារ៉ន អគ្គនាយកក្រុមហ៊ុនអេមរុរ៉ាយស៍ នារសៀលថ្ងៃទី២៤ ខែមិថុនា នៅទីស្នាក់ការកណ្តាល​ធនាគារ ជីប ម៉ុង អគារ ជីប ម៉ុង ថៅវើរ មហាវិថីសហព័ន្ធរុស្សី រាជធានីភ្នំពេញ ។

អ្នកឧកញ៉ា លាង ម៉េង បានថ្លែងថា៖

«កិច្ចព្រមព្រៀងនេះ ជាឆ្នាំងបាយរួមទាំងអស់គ្នារវាង ធនាគារជីបម៉ុង ក្រុមហ៊ុនអេមរុរ៉ាយស៍ និងសហគមន៍កសិករ។ កិច្ចសហការនេះប្រៀបដូចជាយុទ្ធសាស្ត្ររួមគ្នា ជាសាច់ ជាឈាមនិងរាងកាយ បើខ្វះកិច្ចសហការគ្នាទាំងបីភាគីនឹងមិនទទួលបានជោគជ័យនោះទេ។ ធនាគារជីប ម៉ុងនឹងផ្ដល់អត្ថប្រយោជន៍ច្រើនដល់ប្រជាកសិករ ដូចជា ការផ្តល់ហិរញ្ញប្បទាន ដែលមានអត្រាការប្រាក់សមរម្យ លឿន រហ័ស ងាយស្រួល និងនៅកៀកប្រជាកសិករ។ ទោះជាធនាគារជីបម៉ុង មិនទាន់មានសាខាគ្រប់ រាជធានីខេត្តក៏ដោយ ធនាគារបានបញ្ជូនមន្រ្តីឥណទាន និងបុគ្គលិករបស់ខ្លួនទៅកៀកនឹងប្រជាជនគ្រប់ខេត្ត ក្រុង ដើម្បីផ្តល់ភាពងាយស្រួល»។

អ្នកឧកញ៉ា លាង ម៉េង បានបញ្ជាក់ថា៖

« ធនាគារជីប ម៉ុង មិនសម្លឹងឃើញការយកចំណេញពីប្រជាកសិករនោះទេ ។ ធនាគារ ជីបម៉ុងចង់បានត្រឹមតែរួចដើមប៉ុណ្ណោះ ហើយចង់ឲ្យប្រជាកសិករមានការរីកចម្រើន។ កិច្ចសហការនេះ ជាជំហានសំខាន់ក្នុងការជំរុញការនាំចេញអង្ករខ្មែរឱ្យមានប្រសិទ្ធភាព និងគុណភាពប្រកួតប្រជែងជាមួយតម្លៃក្នុងទីផ្សារអន្តរជាតិ»។

គួរជម្រាបថា៖ធនាគារ ជីប ម៉ុង មានគ្រឹះរឹងមាំ ដោយដើរតាមគន្លងជោគជ័យរបស់ ជីប ម៉ុង គ្រុប តាំងពីឆ្នាំ១៩៨២ និងជាដៃគូដែលផ្តល់នូវទំនុកចិត្តខ្ពស់ បង្កើតដោយសហគ្រិនខ្មែរ១០០ភាគរយ។ ចក្ខុវិស័យរបស់ ធនាគារ ជីប ម៉ុង គឺធ្វើយ៉ាងណាផ្តល់នូវដំណោះស្រាយហិរញ្ញវត្ថុប្រកបដោយប្រសិទ្ធភាព និងប្រសិទ្ធផល ជាពិសេសផ្តល់សេវាធនាគារកាន់កៀកជិតអតិថិជន។

ឧកញ៉ា សុង​ សារ៉ន បានមានប្រសាសន៍ថា៖ តាមរយៈការសម្រេចបាននូវ MoU នេះ កសិករដែលដាំដុះស្រូវផ្គត់ផ្គង់ដល់ក្រុមហ៊ុន Amru Riceនឹងទទួលបានហិរញ្ញប្បទាន ពីធនាគារ ជីប ម៉ុង ដើម្បីពង្រីកកសិកម្មនិង និងបង្កើនផលិតកម្ម។

លោកឧកញ៉ា បានបញ្ជាក់ថា៖

«សម្រាប់ជំហានបន្ទាប់ខាងធនាគារនឹងចុះទៅជួបជាមួយប្រជាកសិករតាមបណ្តាខេត្តនានា ដោយផ្ទាល់តែម្តងដើម្បីប្រមូលព័ត៌មាន ដឹងអំពីតម្រូវការផ្សេងដើម្បីរៀបចំឥណទានជូនពួកគាត់។ យើងត្រូវរួមគ្នា វិស័យកសិកម្មនឹងរឹងមាំ។ ការបង្កើតជាដៃគូយុទ្ធសាស្ត្រនេះនឹងជួយជំរុញផលិតកម្ម ផលិតស្រូវអង្ករជាងហុកសិបសហគមន៍ ដែលបច្ចុប្បន្នផលិតក្នុងបរិមាណជាងប្រាំមួយម៉ឺនតោន»។

លោកឧកញ៉ា បានឱ្យដឹងថា៖ អេមរុរ៉ាយស៍ មានសមាជិកជាងហុកសិបសហគមន៍ ប្រសិនបើការចាប់ដៃគូជាមួយធនាគារជីបម៉ុងបានទទួលជោគជ័យនោះសមាជិកស្រូវអង្ករផ្សេងទៀត នឹងបន្តកិច្ចសហការបន្ថែម។ អេមរូរ៉ាយស៍មានម៉ាស៊ីនកិនស្រូវចំនួនបួន នៅខេត្តបាត់ដំបង កំពង់ធំ មណ្ឌលគិរីនិង នៅភ្នំពេញ ដើម្បីគាំទ្រប្រជាកសិករជិតពីរម៉ឺនគ្រួសារក្នុងប្រទេសកម្ពុជា ហើយមានសហគមន៍ដាំស្រូវសរីរាង្គ ជាច្រើន។

បើយោងតាមសហព័ន្ធស្រូវអង្ករកម្ពុជា (CRF)  ក្នុងរយៈពេល៥ខែនៃឆ្នាំ២០២៥ កម្ពុជាបាននាំចេញអង្ករបានចំនួន ៣៤៤ ១៩៩តោន ដែលគិតជាទឹកប្រាក់ជាង២៥២លានដុល្លារអាមេរិកទៅកាន់ទីផ្សារចំនួន៦៣នៅជុំវិញពិភពលោក ៕ ដោយៈញ៉ែម សុផល