សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្ថិតក្នុងអំឡុងពេលដែលប្រជាជនខ្មែរ ជាពិសេស រាជរដ្ឋាភិបាលកំពុងយកចិត្តទុកដាក់ក្នុងការគាំទ្រយ៉ាងផុសផុលទៅលើផលិតផលខ្មែរដែលផលិតក្នុងស្រុក ក្នុងន័យស្មារតីជាតិនិយមនាពេលបច្ចុប្បន្ននេះ គឺជាពេលវេលាអំណោយផលល្អសម្រាប់បណ្តាម្ចាស់អាជីវកម្មក្នុងស្រុកគ្រប់កម្រិតដើម្បីពង្រឹង និងពង្រីកទីផ្សាររបស់ខ្លួនឱ្យកាន់តែទូលំទូលាយ និងផ្តោតសំខាន់ទៅលើគុណភាព និងរសជាតិ ធ្វើជាស្នូល។
បើតាមលោក ស្រ៊ុន សោផល ជាម្ចាស់អាជីវកម្មនំអាកោក្រចេះ ស្ថិតនៅភូមិអូរឫស្សី២ សង្កាត់អូរឫស្សី ក្រុងក្រចេះ ខេត្តក្រចេះ បានមានប្រសាសន៍ប្រាប់ AMS ឱ្យដឹងថា៖ ក្នុងបរិបថនេះ វាជាឱកាសមួយដ៏ល្អសម្រាប់បងប្អូនខ្មែរដែលធ្វើអាជីវកម្ម ទាំងមានម៉ាកសញ្ញា ឬមានផលិតផលខ្លួនឯង ក្នុងការបង្ហាញ និងទាញយកការគាំទ្រពីសំណាក់អតិថិជនក្នុងស្រុក។
លោកបានបញ្ជាក់ថា ៖
«វាជាឱកាសមួយសម្រាប់បងប្អូនខ្មែរយើងដែលធ្វើអាជីវកម្ម មានប្រេន ឬមានផលិតផលខ្លួនឯង ក្នុងការទាញយកការគាំទ្រពីសំណាក់អតិថិជនក្នុងស្រុក ដោយហេតុថា ពីមុនយើងមានទំនោរទៅលើផលិតផលនាំចូលច្រើនជាង តែពេលនេះយើងមានស្មារតីជាតិនិយម និងងាកមកគាំទ្រផលិតផល និងសេវាកម្មក្នុងស្រុកកាន់តែច្រើន»។
លោកបន្ថែមថា គ្រប់បណ្តាអាជីវករ គួរយកចិត្តទុកដាក់ទៅលើគុណភាពផលិតផល មិនថា រសជាតិ ឬអនាម័យ សេវាកម្ម និងតម្លៃ ជាក់ស្ដែង ដូចជាអាជីវកម្មលក់នំអាកោរនេះផ្ទាល់គឺផ្ដោតទៅលើនំអាកោខ្ទិះ អាកោក្រាប ឬបាញ់បែវ ដែលត្រូវការវត្ថុធាតុដើមចម្បងដូចជា ដូង ស្ករ និងអង្ករ ជាដើម ដែលវត្ថុធាតុដើមទាំងនេះ លោកបានទិញទុកបម្រុង និងត្រៀមរួចរាល់ជាស្រេច ងាយស្រួលក្នុងពេលពង្រីកទីផ្សារ បង្កើនការលក់តាមរូបភាពជាក់ស្ដែង។
យ៉ាងណាក៏ដោយ លោកបញ្ជាក់ថា ការចាប់យកទីផ្សារក៏ពឹងផ្អែកសំខាន់ផងដែរទៅលើការបង្ហាញផលិតផល មិនថានៅតាមការតាំងពិព័រណ៍ ឬការបង្ហោះរូបភាព ឬវីដេអូផលិតផលនៅលើបណ្ដាញសង្គមឱ្យគេបានស្គាល់ ព្រោះសម័យនេះជាសម័យឌីជីថល ជាពិសេស ម្ចាស់អាជីវកម្មសុទ្ធតែមានទូរសព្ទដៃទំនើប អាចថត និងបង្ហោះវវីដេអូបានដោយងាយស្រួល។
គួរបញ្ជាក់ដែរថា អាជីវកម្មនំអាកោក្រចេះបានចាប់ផ្ដើមឡើងនៅចុងខែកុម្ភៈ ឆ្នាំ២០២០ ដែលជាមុខរបរបន្តពីគ្រួសារ។ ស្ថិតនៅក្នុងឱកាសជាមួយគ្នានេះដែរ លោក ស៊្រុន សោផល ក៏បានអំពាវនាវឱ្យប្រជាជនខ្មែរបន្តនូវស្មារតីជាតិនិយម គាំទ្រផលិតផលដែលផលិត និងកែច្នៃក្នុងស្រុកនេះកាន់តែខ្លាំងក្លា ដើម្បីលើកកម្ពស់សេដ្ឋកិច្ចជាតិ ក៏ដូចជាកម្រិតជីវភាពអ្នកផលិត និងអ្នកដែលេពាក់ព័ន្ធសង្វាក់ផលិតកម្ម៕
Account
Security
Favourite Content