ស្របតាមកិច្ចខិតខំរបស់រាជរដ្ឋាភិបាលកម្ពុជា តាមរយៈក្រសួងកសិកម្ម រុក្ខាប្រមាញ់ និងនេសាទ ជាសេនាធិការ ជំរុញ និងអភិវឌ្ឍវិស័យកសិកម្ម ដើម្បីអាចធានាបាននូវសុវត្ថិភាពស្បៀង ជាពិសេសលើកកម្ពស់កម្រិតជីវភាពរបស់ប្រជាកសិករនោះ បច្ចុប្បន្ននេះគេសង្កេតឃើញថា កសិករហាក់មានគំនិតថ្មីៗច្រើន ទាំងបច្ចេកដាំដុះ និងការកែច្នៃ។ ជាក់ស្ដែង កសិករមួយរូបរស់នៅស្រុកគីរីវង្ស ខេត្តតាកែវ បានកែច្នៃដីស្រែដែលធ្វើស្រូវមិនសូវទទួលបានផលនោះ ទៅដាំដំណាំត្រកួនទឹក ដែលងាយស្រួលដាំ ចំណាយទុនតិច អាចប្រមូលផលបានយូរ ដែលយ៉ាងហោចណាស់អាចបេះលក់បានជាង ១០ម៉ឺនរៀលក្នុងមួយថ្ងៃ។  

លោក ឯក សារ៉ា ដែលជាកសិករកែប្រែដីស្រែទៅដាំត្រកួនទឹករូបនេះបានប្រាប់ឱ្យដឹងថា ៖

«ខ្ញុំបានដាំត្រកួនទឹករយៈពេល ២ឆ្នាំហើយ ក្រោយពេលធ្វើស្រែតែមិនសូវបានផល។ ពូជត្រកួនទឹកនេះខ្ញុំយកមកពីប្រទេសជិតខាង ប៉ុន្តែមានតម្រូវការទីផ្សារក្នុងស្រុកល្អ ដោយក្នុងមួយថ្ងៃខ្ញុំអាចបេះបានជាង ១០០ដុំ ហើយក្នុងមួយដុំ មានប្រមាណ៤០-៥០ដើម លក់ក្នុងតម្លៃ ១៥០០រៀល ឬរដូវខ្លះអាចលក់បានដល់ទៅជាង ២០០០រៀលក្នុងមួយដុំក៏មាន»។

លោកបន្តថា  ត្រកួននេះតាំងពីដាំមកមិនទាន់ចាល់ទីផ្សារនៅឡើយទេ ជាក់ស្ដែង បច្ចុប្បន្ននេះ មានម៉ូយមកយកដល់ផ្ទះមួយថ្ងៃបីដង ពោលគឺម៉ោង ៧ព្រឹកម្ដង ម៉ោង ៣រសៀល និងម៉ោង ៧យប់ម្ដងទៀត។ ការដាំត្រកួនេះ គឺដាំតែម្ដងអាចបេះបានដល់ទៅ ៥-៦ខែ ប្រសិនបើមានពេលទំនេរ គេអាចដើរបោចដើមចាស់ៗចេញដើម្បីឱ្យត្រកួនលូតដើមថ្មីៗបន្តទៀត ឬក្នុងករណីដែលមានដើមចាស់ៗច្រើននឹងធ្វើឱ្យត្រកួនមានដើមខ្លី ថ្នាំងញឹក និងដើមរឹង ឱ្យផលមិនសូវល្អនោះទេ ដែលកសិករក៏អាចបង្ហូរទឹកចេញ ទុកដីឱ្យស្ងួត ប្រមាណ ១០ថ្ងៃរហូតធ្វើឱ្យដើមត្រកួនរលួយអស់ ទើបរៀបចំដីដាំសារជាថ្មីម្ដងទៀត។  ​  

ពាក់ព័ន្ធនឹងដំណើរការដាំវិញ កសិកររូបនេះបានរៀបរាប់ថា ៖

«ដំបូងយើងត្រូវព្យួរសម្អាតដីឱ្យស្អាតជាមុនសិន រាស់បំបែក និងសើយដីឱ្យសព្វល្អ រួចបូមទឹកពន្លិចស្រែជម្រៅ ១តឹក រយៈពេល ២ថ្ងៃ ដើម្បីឱ្យដីបែកល្អទើបអាចកាត់ពូជមកដាក់ដាំបាន ន្ទាប់ពីដាំហើយរយៈពេល ១០ថ្ងៃ យើងត្រូវបង្ហូរ ឬបូមទឹកនេះចេញដើម្បីឱ្យត្រកួនចាប់ជើង។ ក្នុងកំឡុងពេលនេះ គេអាចបន្ថែមជីសដើម្បីបំប៉នដើមឱ្យកាន់តែល្អ ទើបបូមទឹកចូលវិញធ្វើឱ្យត្រកួនមានទាំងទឹក និងសារធាតុចិញ្ចឹមបន្ថែម លុះរយៈពេល ៣សប្ដាហ៍គេអាចប្រមូលផលបានហើយ»។

លោកបញ្ជាក់ដែរថា ចំពោះការប្រមូលផលលើកដំបូង កសិករគួរប្រើកន្ត្រៃដើម្បីកាត់ដើម ចៀសវាងបេះដោយដៃ ឬទាញកន្ត្រាក់ដែលអាចធ្វើឱ្យសណ្ដកឫស ហើយត្រកួនអាចឡើងពណ៌ក្រហម។ បន្ទាប់ពីរយៈពេល ៤សប្ដាហ៍ គេអាចប្រមូលផលត្រកួនវិលជុំបានស្ទើររាល់ថ្ងៃ ព្រោះនៅពេលកាត់ប្រមូលផលម្ដង វានឹងដុះមកជាបន្តបន្ទាប់កើនឡើង ៣-៤ដង រហូតបេះ ឬកាត់ស្ទើរមិនទាន់។ នេះជាអ្វីដែលកសិករខាងលើបានបញ្ជាក់ប្រាប់។  

សម្រាប់អ្នកដែលចង់ដាំពូជត្រកួនទឹក​ អាចសាកល្បងបានដោយគ្រាន់តែចំណាយតិចតូចទៅលើការទិញគ្រាប់ពូជ និងការរៀបចំដី ដោយការទុកចន្លោះរងដាំត្រកួនកាន់តែធំ គឺអាចឱ្យវាបោះដៃ និងលូតលាស់បានដើមល្អ ដោយជាទូទៅគេអាចដាំគម្លាតប្រមាណ ១.៥-២ម៉ែត្រ ពីមួយរងទៅមួយរង។ ​

ចុងក្រោយ លោក សារ៉ា បានផ្ដាំផ្ញើទៅដល់បងប្អូនប្រជាកសិករមួយចំនួនដែលធ្វើស្រែមិនសូវទទួលបានផលល្អនោះ អាចពិចារណា និងងាកមករកការកែប្រែដីស្រែមកដាំដំណាំ ឬដាំត្រកួនដូចជារូបលោក ដែលយ៉ាងហោចណាស់អាចរកចំណូលបានប្រចាំថ្ងៃជាង១០ម៉ឺនរៀល ឬច្រើនជាងនេះ ហើយមិនសូវចំណាយកម្លាំងនោះទេ៕