សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលបានកំណត់យកខេត្តព្រះសីហនុជាគោលដៅ និងជំរុញការវិនិយោគ ដើម្បីកែប្រែខេត្តមួយនេះឱ្យក្លាយជាមជ្ឈមណ្ឌលពាណិជ្ជកម្មឡូជីស្ទីក និងទេសចរណ៍ ដោយបានរៀបចំនូវគម្រោងប្លង់មេរួចរាល់ និងត្រៀមប្រកាសនៅឆ្នាំ២០២៥ខាងមុខនេះ ។ នៅក្នុងផែនការមេអភិវឌ្ឍន៍ខេត្តព្រះសីហនុ រយៈពេល១៥ឆ្នាំ រាជរដ្ឋាភិបាលរំពឹងថានឹងទទួលបានទុនវិនិយោគប្រមាណ២០ពាន់លានដុល្លារអាមេរិក ។
បើតាមឯកឧត្តម ជា កុកហុង ប្រធានលេខាធិការដ្ឋានផែនការមេអភិវឌ្ឍខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង និងអភិវឌ្ឍបណ្តាខេត្តជាប់ឆ្នេរសមុទ្រកម្ពុជា ជារបៀងសេដ្ឋកិច្ចពហុបំណង និងប្រទាក់ក្រឡា បានមានប្រសាសន៍ឱ្យដឹងថា ផែនការមេអភិវឌ្ឍន៍ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណងនេះ ជាគម្រោងវិនិយោគដ៏ធំរបស់រាជរដ្ឋាភិបាល ដែលបានគិតគូរគ្រប់ជ្រុងជ្រោយក្នុងការអភិវឌ្ឍខេត្តព្រះសីហនុទៅជាមជ្ឈមណ្ឌលពាណិជ្ជកម្មឡូជីស្ទីក និងជាតំបន់ទេសចរណ៍ដ៏ល្បីល្បាញនៅក្នុងតំបន់អាស៊ានក្នុងរយៈពេល១៥ ។ គម្រោងនេះ នឹងអាចទាក់ទាញវិនិយោគិនពីវិស័យឯកជន និងដៃគូអភិវឌ្ឍន៍បានជាង២០ពាន់លានដុល្លារអាមេរិក ហើយនឹងធ្វើឱ្យចំណូលផលិតផលក្នុងស្រុកសរុបក្នុងខេត្តព្រះសីហនុ ដែលសំដៅលើចំណូលជាមធ្យមរបស់ពលរដ្ឋក្នុងខេត្តនេះកើនឡើងបន្ថែមទៀត តាមរយៈការទទួលបានឱកាសការងារធ្វើ ជាមួយនឹងប្រាក់កម្រៃខ្ពស់ជាងមុន និងទទួលបានជំនាញបន្ថែមពីការវិនិយោគទាំងនោះ ។
ឯកឧត្តមបន្តថា នៅក្នុងផែនការមេអភិវឌ្ឍន៍ខេត្តព្រះសីហនុនេះ នឹងរៀបចំបែងចែកតំបន់ទៅតាមសក្ដានុពលភាពសេដ្ឋកិច្ចដែលមាននៅក្នុងខេត្ត ដូចជាតំបន់ឡូជីស្ទីក ឧស្សាហកម្ម ពាណិជ្ជកម្ម តំបន់ទេសចរណ៍ពិសិដ្ឋ និងតំបន់ហិរញ្ញវត្ថុជាដើម ។ ការបែងចែកតំបន់នេះ មានសារសំខាន់ណាស់ ដើម្បីទាក់ទាញ និងសម្រួលដល់ការវិនិយោគ ជាក់ស្ដែងតាមបទពិសោធន៍នៅទីក្រុងធំៗលើពិភពលោកនេះ ក៏មានការបែងចែកតំបន់ដូចគ្នានេះដែរ ។ នៅក្នុងការបែងចែកតំបន់ក្នុងខេត្តព្រះសីហនុ នឹងរៀបចំហេដ្ឋារចនាសម្ព័ន្ធឆ្អឹងខ្នង បន្ទាប់មកនឹងរៀបចំឱ្យមានគោលនយោបាយពិសេសទៅតាមតំបន់នីមួយៗ ដូចជាការលើកទឹកចិត្តពន្ធ ការលើកទឹកចិត្តជាការសម្របសម្រួលអនុលោមភាព ការផ្ដល់សេវាច្រកចេញចូលតែមួយរហ័សទាន់ចិត្ត និងការសម្រួលពាណិជ្ជកម្មជាដើម ។
ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ក៏បានថ្លែងនៅក្នុងវេទិកាវិនិយោគក្នុងខេត្តព្រះសីហនុកាលពីពេលថ្មីៗនេះឱ្យដឹងផងដែរថា ខេត្តព្រះសីហនុ ជាខេត្តមានសក្ដានុពលធំធេង ហើយពេលនេះ គឺជាឱកាសដ៏មានតម្លៃសម្រាប់ស្វែងយល់ពីសក្ដានុពលវិនិយោគ និងចក្ខុវិស័យរបស់រាជរដ្ឋាភិបាលក្នុងការប្រែក្លាយខេត្តព្រះសីហនុ ទៅជាមជ្ឈមណ្ឌលវិនិយោគ និងការអភិវឌ្ឍដ៏រស់រវើកមួយក្នុងក្របខ័ណ្ឌអាស៊ាន ។
ឯកឧត្តមបន្តថា ខេត្តព្រះសីហនុ មានការរីកចម្រើនយ៉ាងឆាប់រហ័សលើវិស័យហេដ្ឋារចនាសម្ព័ន្ធ និងបច្ចេកវិទ្យាជឿនលឿន ព្រមទាំងមានការលើកកម្ពស់ការអភិវឌ្ឍប្រកបដោយចីរភាព ដើម្បីបង្កើតបរិយាកាសអំណោយផលសម្រាប់ការធ្វើអាជីវកម្ម និងការវិនិយោគ ។
លោកឧកញ៉ា អ៊ឹង ឆហៀង អគ្គនាយកនៃក្រុមហ៊ុន Huale Steel ដែលបោះទីតាំងវិនិយោគនៅក្នុងតំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ បានមានប្រសាសន៍ថា តាមរយៈការលើកទឹកចិត្តរបស់រាជរដ្ឋាភិបាលសម្រាប់ការវិនិយោគនៅក្នុងខេត្តព្រះសីហនុ ធ្វើឱ្យក្រុមហ៊ុនមានឱកាសក្នុងការបណ្ដាក់ទុនវិនិយោគ និងពង្រីកការវិនិយោគបន្ថែមទៀតនៅក្នុងខេត្តព្រះសីហនុ ។ តាមរយៈការវិនិយោគរបស់ក្រុមហ៊ុននៅក្នុងខេត្តព្រះសីហនុនាពេលនេះ បានផ្ដល់ឱកាសការងារដល់កម្មករ និយោជិតជាបណ្តើរៗនៅជំហានដំបូង ហើយនៅក្នុងជំហានទី២ នឹងបង្កើនឱកាសការងារប្រមាណ៤០០០នាក់នៅពេលបន្ទាប់៕
Account
Security
Favourite Content