ភ្នំពេញ៖ ថ្លែងក្នុងវេទិកា «រាជរដ្ឋាភិបាល -ផ្នែកឯកជន» លើកទី១៩ កាលពីថ្ងៃទី១៣ ខែវិច្ឆិកា សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានលើកឡើងថា កម្ពុជានឹងពិនិត្យពិភាក្សាក្នុងការតភ្ជាប់ជើងហោះហើរត្រង់ពីគោលដៅទេសចរណ៍ល្បីៗមកកាន់ខេត្តសៀមរាប ដែលជាគោលដៅទេស​ច​រ​ណ៍​ដ៏ធំមួយរបស់ប្រទេសកម្ពុជា។

សម្តេចបានបន្តថា៖

«នេះជាវិធានការមួយក្នុងចំណោមវិធានការជាច្រើនទៀតរបស់រាជរដ្ឋាភិបាលកម្ពុជា សំដៅជំរុញឱ្យវិស័យទេសចរណ៍នៅក្នុងខេត្តសៀមរាបមាន​សម្ទុះងើបឡើងវិញ»។

សម្ដេចធិបតី ហ៊ុន ម៉ាណែត បានមានប្រសាសន៍ទៀតថា៖ ចំពោះការតភ្ជាប់ជើងហោះហើរដោយត្រង់ពីគោលដៅទេសចរណ៍ល្បីៗមកសៀមរាប ក្រសួងទេសចរណ៍​ត្រូវធ្វើការពិភាក្សានៅក្រោមយន្តការក្រុមប្រឹក្សាទេសចរណ៍ដាក់ចេញជាវិធានការ ដើម្បីជំរុញការតភ្ជាប់ ដោយការហោះហើរដោយត្រង់រវាងគោលដៅទេសចរណ៍ល្បីៗនៅក្នុងបណ្តាប្រទេសជិតខាងមកខេត្តសៀមរាប ដូចជាការហោះហើរដោយត្រង់រវាងភូកេត-សៀមរាប, បាលី-សៀមរាប, ដាណាំង-សៀមរាប ឬ សេប៊ូ-សៀមរាប ។

សម្ដេច ហ៊ុន ម៉ាណែត បានបញ្ជាក់ថា ៖បន្ថែមពីលើការរៀបចំផែនការសកម្មភាព និងវិធានការនានា សម្រាប់អនុវត្តកម្មវិធីពិសេស «ទស្សនាសៀមរាប ឆ្នាំ២០២៤» ក៏​នៅមានសំណូមពរផ្សេងទៀតដូចជា ការឆ្លើយតបទៅនឹងវិស័យឯកជនចំពោះគោលការណ៍មិនលើកលែងទិដ្ឋាការចំពោះភ្ញៀវទេសចរ, ការសម្អាតបទល្មើសនានា, ការបង្កើតខ្សែក្រវាត់បៃតង នៅតាមតំបន់ ទេសចរណ៍សំខាន់ៗ និងការអភិវឌ្ឍភ្នំគូលែនជាគោលដៅទេសចរណ៍ធម្មជាតិ។

ជាមួយគ្នានេះ ដោយមើលឃើញការលំបាករបស់ប្រតិបត្តិករទេសចរណ៍ក្នុងការទទួលបាននូវហិរញ្ញប្បទាន ដើម្បីយកទៅប្រើប្រាស់ ក្នុងការស្តារបើកឡើងវិញ ឬកែ​លម្អអាជីវកម្មរបស់ខ្លួន រាជរដ្ឋាភិបាលបានផ្តល់ហិរញ្ញប្បទានគិតជាទឹកប្រាក់ចំនួន ៥០ លានដុល្លារអាមេរិកដល់ប្រតិបត្តិករទេសចរណ៍នៅក្នុងខេត្តសៀមរាប។

យោងតាមលេខាធិការដ្ឋានអាកាសចរស៊ីវិល ក្នុងរយៈពេល៨ខែនៃឆ្នាំ២០២៣នេះ កម្ពុជាទទួលបានជើងហោះហើរចំនួន ៣៣​ ១៤៦ជើង កើនឡើង ១១៤% បើធៀបទៅនឹងរយៈពេលដូចគ្នានៅឆ្នាំ២០២២។ រយៈពេល៨ខែ ឆ្នាំ២០២៣នេះ កម្ពុជាទទួលបានអ្នកដំណើរតាមផ្លូវអាកាសចំនួនជាង ៣.៤លាននាក់ កើនឡើងជាង១៨០% បើធៀបនឹងរយៈពេលដូចគ្នានៅឆ្នាំ២០២២ ខណៈជើងហោះហើរចំនួន ៣៣ ១៤៦ជើង កើនឡើង ១១៤% បើធៀបនឹងរយៈពេលដូចគ្នានៅឆ្នាំ២០២២ ៕