សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងជាង ៤៩០ ដែលមានទីតាំងវិនិយោគនៅក្នុងខេត្តព្រះសីហនុ រាប់ទាំងគម្រោងដែលធ្លាប់ជាប់គាំង និងគម្រោងស្នើសុំវិនិយោគថ្មី ត្រូវបានរាជរដ្ឋាភិបាលអនុញ្ញាត និងផ្តល់ជូននូវគោលការណ៍លើកទឹកពិសេសក្រោមដើមទុនវិនិយោគសរុបប្រមាណ ៨,៤ពាន់លានដុល្លារ និងបង្កើតឱកាសការងារបានប្រមាណ ៦ម៉ឺនកន្លែង។ ទិន្នន័យទាំងនេះត្រូវបានបង្ហាញតាមរយៈរបាយការណ៍របស់ក្រុមការងារជំរុញការវិនិយោគខេត្តព្រះសីហនុ គិតចាប់ពីដើមឆ្នាំ២០២៤ ដល់ត្រឹមត្រីមាសទី២ ឆ្នាំ២០២៦។
បើតាមរបាយការណ៍ឱ្យដឹងថា នៅក្នុងចំណោមនៃគម្រោងវិនិយោគទាំងជាង៤៩០គម្រោងនេះ មានគម្រោងអគារពាក់ព័ន្ធនឹងការជាប់គាំងចំនួន ២១៦, គម្រោងមិនពាក់ព័ន្ធនឹងអគារជាប់គាំង ឬគម្រោងថ្មីចំនួន ២៣៥, គម្រោងពង្រីកចំនួន ២៥ និងគម្រោងមានស្រាប់ចំនួន១៥ គម្រោង ។
នៅក្នុងកិច្ចប្រជុំពិនិត្យគម្រោងវិនិយោគ និងធុរកិច្ចចំនួន១០ ក្រោមទុនវិនិយោគ ជាង ៧២លានដុល្លារអាមេរិក កាលពីថ្ងៃទី២២ ខែកក្កដា ឆ្នាំ ២០២៦ ឯកឧត្តមបណ្ឌិតសភាចារ្យ ហ៊ាន សាហ៊ីប ប្រធានក្រុមការងារជំរុញការវិនិយោគខេត្តព្រះសីហនុ បានបញ្ជាក់ថា នៅត្រីមាសទី១ឆ្នាំ ២០២៦ ក្រុមការងារជំរុញការវិនិយោគក្នុងខេត្តព្រះសីហនុ បានសិក្សាអំពីបរិយាកាសវិនិយោគបច្ចុប្បន្ន ពាក់ព័ន្ធនឹងស្ថានភាពពិភពលោក តំបន់ និងក្នុងស្រុក ដោយបានសាកសួរជាមួយម្ចាស់គម្រោងវិនិយោគ និងសង្កេតអំពីស្ថានភាពវិនិយោគនៅក្នុងខេត្តព្រះសីហនុ ។ ជាលទ្ធផល ម្ចាស់គម្រោងបានយល់ថា វិធានការថ្មីៗរបស់រាជរដ្ឋាភិបាល បាន និងកំពុងស្ដារទំនុកចិត្តវិនិយោគិន ជាពិសេស ក្នុងវិស័យអចលនទ្រព្យ និងទេសចរណ៍ ដែលជំរុញឱ្យមានសកម្មភាពបន្ត ខណៈសកម្មភាពវិនិយោគក្នុងវិស័យឧស្សាហកម្ម នៅតែមានសញ្ញាណល្អប្រសើរ ស្របពេលដែលក្រសួង ស្ថាប័ន ក្រុមការងារ និងរដ្ឋបាលខេត្តព្រះសីហនុ បាន និងកំពុងបន្តខិតខំសម្របសម្រួល។
ឯកឧត្តមបន្ថែមថា ៖
«វិស័យឧស្សាហកម្មក្នុងខេត្តព្រះសីហនុ មាននិន្នាការប្រើប្រាស់វត្ថុធាតុដើមពីរោងចក្រសហគ្រាសក្នុងស្រុក ដូចជា ឈើដាំក្នុងស្រុក កម្ទេចឈើ ម្សៅដំឡូងមី កៅស៊ូ និងអំបិលជាដើម ។ និន្នាការនេះ ជាកាលានុវត្តភាពបន្ថែមសម្រាប់ការវិនិយោគ ដែលទាមទារឱ្យមានការជួយសម្របសម្រួលពីក្រសួង ស្ថាប័នពាក់ព័ន្ធ ចូលរួមធ្វើកិច្ចការជាមួយគ្នា ដោះស្រាយបញ្ហាជាមួយគ្នាឱ្យកាន់តែជិតស្និទ្ធ និងប្រកបដោយតម្លាភាព ប្រសិទ្ធភាព ស្របតាមអភិក្រម ជវភាពនៃប្រព័ន្ធតួអង្គតែមួយ»។
លោក វណ្ណ ធី ភ្នាក់ងារអចលនវត្ថុមួយរូបប្រចាំខេត្តព្រះសីហនុ បានប្រាប់បណ្ដាញព័ត៌មាន AMS ឱ្យដឹងថា ជាការកត់សម្គាល់ ចាប់តាំងពីរាជរដ្ឋាភិបាល បានដាក់ឱ្យអនុវត្តន៍កម្មវិធីជំរុញការវិនិយោគខេត្តព្រះសីហនុ ឃើញថាមានគម្រោងវិនិយោគថ្មីៗ និងគម្រោងវិនិយោគដែលជាប់គាំងបានបន្តដំណើរការវិញជាបន្តបន្ទាប់ ។
លោកបន្តថា ៖
«បច្ចុប្បន្ន គម្រោងវិនិយោគថ្មីៗនៅក្នុងខេត្តព្រះសីហនុចាប់មានជាបន្តបន្ទាប់ ហើយគម្រោងដែលធ្លាប់តែជាប់គាំង ក៏មានសកម្មភាពឡើងវិញដែរ ពោលគឺចាប់តាំងពីបានដាក់ឱ្យអនុវត្តន៍នូវកម្មវិធីជំរុញការវិនិយោគរបស់រដ្ឋាភិបាល និងកំពុងរីកសាយពីតំបន់ក្រុងទៅតំបន់ជាយក្រុង ជាក់ស្ដែង ដូចជា នៅក្នុងក្រុងកំពង់សោម ស្រុកព្រៃនប់ និងស្រុកស្ទឹងហាវ ដោយវិនិយោគិនបានបង្កើតតំបន់សេដ្ឋកិច្ចពិសេស ដើម្បីទាក់ទាញ រោងចក្រឧស្សាហកម្មចូលមកបណ្ដាក់ទុនបន្ថែម ជាពិសេសមកពីប្រទេសចិន» ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា បច្ចុប្បន្ន នៅក្នុងខេត្តព្រះសីហនុ មានតំបន់សេដ្ឋកិច្ចពិសេសចំនួន ១៤ តំបន់ ដោយក្នុងនោះមាន ៧តំបន់កំពុងដំណើរការ និងទាក់ទាញបានគម្រោងវិនិយោគជាបន្តបន្ទាប់ ។ ដោយឡែក ក្នុងរយៈពេល៦ខែ ដើមឆ្នាំ២០២៦នេះ ខេត្តព្រះសីហនុក៏ទទួលបានគម្រោងវិនិយោគចុះបញ្ជីចំនួន ២៩គម្រោងផងដែរ ៕
Account
Security
Favourite Content