សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជាទូទៅ ឱ្យតែរដូវកាលភ្លៀងធ្លាក់មកដល់ ប្រជាជនមួយចំនួនតែងចំណាយប្រាក់សម្រាប់ទិញអាវភ្លៀង។ ប្រភេទអាវភ្លៀងដែលប្រជាជននិយមប្រើនោះទៀតសោត ជាអាវភ្លៀងដែលស្ដើង ងាយនឹងរហែក ម្លោះហើយសម្រាប់តែប្រជាជនម្នាក់គឺអាចប្រើប្រាស់អាវភ្លៀងលើសពីមួយនៅក្នុងមួយរដូវកាល។
យោងតាមរបាយការណ៍ជំរឿនឆ្នាំ២០១៩ ប្រជាជនកម្ពុជាមានចំនួន១៦លាននាក់ រីឯអាត្រាកម្លាំងពលកម្មមានចំនួនប្រមាណជា ៨០% ដែលស្មើនឹង ១២,៨លាននាក់។ អាត្រាកម្លាំងពលកម្មនេះអាច ចាត់ទុកថាជាចំនួនប្រជាជនសកម្ម ដែលមានចំណែកធ្វើឱ្យសេដ្ឋកិច្ចមានចរន្ដ។
ក្នុងមួយឆ្នាំ បើគិតថាប្រជាជនម្នាក់ជាមធ្យមប្រើប្រាស់អាវភ្លៀងអស់ចំនួន ៤ ដែលមានតម្លៃប្រមាណជា ៨ពាន់រៀល ឬ២ដុល្លារនោះ ជារួមយើងនឹងឃើញថាក្នុងមួយឆ្នាំប្រជាជនកម្ពុជាចាយអស់ប្រាក់ ២៥,៦លានដុល្លារអាមេរិក។
ប្រសិនបើផលិតផលអាវភ្លៀងនោះ ជាផលិតផលនាំចូលទៀត មានន័យថាកម្ពុជាខាតអស់ប្រាក់ជាង ២០លាន ក្នុងមួយឆ្នាំទៅហើយ។ នេះនៅមិនទាន់គិតរួមបញ្ចូលពីការបន្សល់ទុកកាកសំណល់ប្លាស្ទីកដែលបង្កឡើងដោយការប្រើប្រាស់អាវភ្លៀងនោះផង។ ដូច្នេះ បើសិនជាប្រជាជនម្នាក់ប្រើប្រាស់អាវភ្លៀងអស់ចំនួន៤ ក្នុងមួយឆ្នាំ មានន័យថាប្រជាជនសកម្មជាង១២លាននាក់ នឹងបង្កើតសំណល់អាវភ្លៀងបានចំនួន ៤៨លានអាវទៅហើយ។
យ៉ាងណាមិញ បើយោងតាមគោលនយោបាយស្ដីពីការគ្រប់គ្រងសំណល់រឹងនៅទីប្រជុំជន (២០២០-២០៣០) បានឱ្យដឹងថា បច្ចុប្បន្នសំរាម សំណល់រឹងនៅទីប្រជុំជនមានចំនួនប្រមាណ ២ លានតោនក្នុងមួយឆ្នាំ (កាលពីឆ្នាំ២០១៩) ត្រូវបានប្រមូល និងដឹកជញ្ជូនយកទៅទុកដាក់នៅទីលានទុកដាក់សំរាម។
យោងតាមរបាយការណ៍ស្រាវជ្រាវ និងការគុណគូរខាងលើ ការប្រើប្រាស់អាវភ្លៀងជារឿងខាតបង់មួយសម្រាប់សេដ្ឋកិច្ច និងបរិស្ថាន។ ប៉ុន្តែយ៉ាងណា អាវភ្លៀងនៅតែជាតម្រូវការចាំបាច់ដែលមិនអាចកាត់ផ្ដាច់បាន។ មិនអាចកាត់ផ្ដាច់បាន ប៉ុន្តែប្រជាជនអាចចូលរួមកាត់បន្ថយការចំណាយបាន តាមរយៈការប្រើប្រាស់អាវភ្លៀងក្រាស់ៗ ដែលមានគុណភាព អាចប្រើបានច្រើនដង។ ធ្វើដូចនេះ មិនត្រឹមតែចំណេញសេដ្ឋកិច្ចនោះទេ វិធីនេះក៏អាចជួយសម្រាលបរិស្ថានពីសំណល់ផ្លាស្ទីកក្នុងទំហំដ៏ច្រើនលើសលប់មួយផងដែរ។
បើទោះជាយ៉ាងនេះក្ដី ការចូលរួមរបស់ប្រជាជននៅតែជារឿងសំខាន់ និងចាំបាច់ ព្រោះបើមិនដូច្នេះទេ កម្ពុជានឹងបន្តខាតបង់ប្រាក់ជាច្រើនលានដុល្លារក្នុងមួយឆ្នាំៗ៕
Account
Security
Favourite Content