ការ៉េមឆា គឺជាបង្អែមមួយមុខដែលមានដើមកំណើតចេញពីប្រទេសថៃ។ បង្អែមប្រភេទនេះមានភាពល្បីល្បាញ និងមានការនិយមចូលចិត្តច្រើនពីអតិថិជន ដោយសារតែដំណើរការនៃការធ្វើមានភាពទាក់ទាញ និងមានការតុបតែងបានស្អាត។
ការ៉េមឆា កើតចេញពីការយកផ្លែឈើស្រស់ៗទៅលាយជាមួយទឹកដោះគោស្រស់ និងគ្រឿងផ្សំផ្សេងទៀត រួចចិញ្ច្រាំវាឱ្យចូលគ្នានៅលើបន្ទះដែកមួយ ឆាទៅឆាមក ដោយមានចំហាយហ្គាសត្រជាក់ពីក្រោមបន្ទះដែកផងនោះ មួយសម្ទុះក្រោយមក ផ្លែឈើដែលបានចិញ្ច្រាំនោះនឹងកកលើបន្ទះដែក។ បន្ទាប់ពីនោះហើយ គេក៏គាស់ការ៉េមឆាឱ្យរមូចូលគ្នា រួចក៏ចាប់ដាក់ក្នុងចានក្រដាស់ជាការស្រេច។
ដោយឡែកនៅឯខេត្តសៀមរាប ដែលជាខេត្តទេសចរណ៍ឯណោះវិញ ការ៉េមឆាបានក្លាយជារបរមួយដែលអ្នករស់នៅក្នុងតំបន់ចាប់ជាអាជីព ហើយមុខរបរមួយនេះច្បាស់ណាស់ថានឹងត្រូវលក់ក្នុងតំបន់មានចរន្ដទេសចរណ៍ខ្លាំង គឺតំបន់ផាប់ស្រ្ទីត (Pub Street) ដោយសារតែតំបន់នេះមានភាពអ៊ូអរនៅពេលយប់ ការលក់ដូរក៏ត្រូវធ្វើឡើងនៅពេលយប់ដូចគ្នា។
អ្នកស្រី អ៊ុក ចាន់វល័ក្ខណ៍ ដែលជាអាជីវករលក់ការ៉េមឆាបានឱ្យដឹងថា អ្នកស្រីចាប់ផ្ដើមរៀបចំបើកលក់តាំងពីម៉ោង៣រសៀល ព្រោះម៉ោងនេះជាម៉ោងដែលចាប់ផ្ដើមមានមនុស្សដើរច្រើន រហូតដល់ម៉ោង ១២យប់ ទើបអ្នកស្រីបិទតូប និងម៉ាស៊ីនការ៉េមរបស់ខ្លួន ហើយត្រឡប់ទៅផ្ទះវិញ ជាមួយនឹងការរកបានចំណូលចន្លោះពី ២០ម៉ឺនរៀល ទៅដល់ ៦០ម៉ឺនរៀល ក្នុងមួយយប់ ដោយចំណូលទាំងនេះគឺអាស្រ័យលើរដូវកាលមានភ្ញៀវ និងខ្សត់ភ្ញៀវ។
អ្នកស្រី អ៊ុក ចាន់វល័ក្ខណ៍ បានលើកឡើងថា ៖
“ដោយសារខ្ញុំលក់នេះពឹងផ្អែកលើភ្ញៀវពីក្រៅច្រើន អីចឹងហើយបើខែសម្បូរភ្ញៀវ ខ្ញុំអាចរកបានដល់ ៦០ម៉ឺន តែបើខែដែលភ្ញៀវជាប់ធ្វើការ មិនចេញដើរកម្សាន្ដ មួយយប់បានត្រឹម ២០ម៉ឺនអីហ្នឹង ប៉ុន្តែជាទូទៅអាចលក់បានជាង៤០ម៉ឺនរៀល។ មុខរបរនេះ ខ្ញុំចាប់ផ្ដើមលក់តាំងពីឆ្នាំ ២០១៤ មកម៉្លេះ ដែលវាជាមុខរបរស្នូលក្នុងការរកចំណូលចូលគ្រួសារ”
អ្នកស្រីបានបញ្ជាក់ថា ៖
“មុខរបរលក់ការ៉េមឆានេះ វាងាយស្រួលម្យ៉ាងដែរ ដោយសារតែយើងមិនចាំបាច់ហត់ត្រូវក្រោកពីព្រឹក ធ្វើគ្រឿងផ្សំទុកដូចបង្ហែមផ្សេងៗនោះទេ និយាយទៅគឺទិញតែគ្រឿងស្រាប់ៗ ហើយធ្វើលក់ជូនភ្ញៀវភ្លាមៗតែម្ដង។ គ្រឿងរបស់ការ៉េមឆា ភាគច្រើនមិនមានលក់តាមផ្សារធម្មតានោះទេ ពោលគឺមានលក់តែតាមផ្សារទំនើប ឬម៉ាត ដូច្នេះតម្លៃរបស់វាក៏ថ្លៃ ដែលនាំឱ្យការចំណាយថ្លៃដើមខ្ពស់”
យ៉ាងណាក៏ដោយ បើទោះជាការចំណាយលើថ្លៃដើមច្រើនបន្តិច ប៉ុន្តែអ្នកស្រីនៅតែអាចទទួលបានប្រាក់ចំណេញពីការលក់បានសមរម្យដែរ ពោលគែអាចចំណេញប្រមាណជា៤០ភាគរយនៃថ្លៃដើម ហើយសម្រាប់ឱកាសបុណ្យចូលឆ្នាំខ្មែរខាងមុខនេះ អ្នកស្រីរំពឹងថា នឹងអាចលក់ដាច់បានច្រើន ព្រោះមានអ្នកមកលេខខេត្តសៀមរាបច្រើននាក់៕