ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបន្ដអំពាវនាវឱ្យប្រជាពលរដ្ឋកម្ពុជាទាំងអស់ចូលរួមគាំទ្រការប្រកួតកីឡាអាស៊ានប៉ារ៉ាហ្គេមលើកទី១២ឱ្យបានផុលផុសដូចការប្រកួតកីឡាស៊ីហ្គេម ស្របពេលការធ្វើជាម្ចាស់ផ្ទះនៃការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ កាន់ខិតជិតចូលមកដល់ហើយនោះ។

ក្នុងឱកាសអញ្ជើញសម្ពោធដាក់ឱ្យប្រើប្រាស់ស្ពានឆ្លងទន្លេបាសាក និងស្ពានអាកាសឫស្សីកែវនៅព្រឹកថ្ងៃទី៣១ ខែឧសភា ឆ្នាំ២០២៣ សម្ដេចតេជោ ហ៊ុន សែន បានអះអាងថា ទាំងផ្ទាំងទស្សនីយភាពនៃការសម្ដែង និងការបាញ់កាំជ្រួចនៅក្នុងព្រឹត្តិការណ៍ប្រកាសបើក និងបិទការប្រកួតកីឡាអាស៊ានប៉ារ៉ាហ្គេមលើកទី១២ មានភាពអស្ចារ្យដូចគ្នានៅក្នុងការរៀបចំពិធីបើក និងបិទការប្រកួតកីឡាស៊ីហ្គេមលើកទី៣២ដែរ។

សម្ដេចតេជោ ហ៊ុនសែន នាយករដ្ឋមន្ដ្រីនៃព្រះរាជាណាចក្រកម្ពុជា ដែលមានពិការភាពបាត់បង់កែវភ្នែកម្ខាងព្រោះតែភ្លើងសង្គ្រាមនោះ បានចាត់ទុកថា ការចូលរួមរបស់បងប្អូនប្រជាពលរដ្ឋ ដើម្បីគាំទ្រការប្រកួតកីឡាជនពិការនោះ គឺជាការលើកទឹកចិត្តដ៏ធំធេងសម្រាប់ជនមានពិការភាព។

សម្ដេចតេជោបានអះអាងថា ៖

“ពិការគ្រាន់តែពិការរាងកាយប៉ុណ្ណោះ មិនពិការផ្លូវចិត្តនោះទេ ដូច្នេះសង្ឃឹមថា ប្រជាពលរដ្ឋទាំងអស់នឹងចូលរួមគាំទ្រ។ ការចូលរួមគាំទ្រនេះ ក៏ជាផ្នែកមួយនៃការជំរុញទំនាក់ទំនងរវាងប្រជាជន និងប្រជាជនក្នុងក្របខ័ណ្ឌអាស៊ាន ហើយក៏ជាផ្នែកមួយនៃការធ្វើសមាហរណកម្មអាស៊ានផងដែរ។”

សម្ដេចតេជោ ហ៊ុន សែន បានមានប្រសាសន៍បន្តថា ៖

“សល់តែប៉ុន្មានថ្ងៃទៀតទេ អាស៊ានប៉ារ៉ាហ្គេមនឹងមកដល់ ខ្ញុំសូមឲ្យបងប្អូនប្រជាពលរដ្ឋទាំងអស់យកចិត្តទុកដាក់គាំទ្រកីឡាពិការ ដែលជាការលើកទឹកចិត្តដ៏ធំមួយសម្រាប់ពិការភាព  ការបើក និងបិទ។ យើងធ្វើមិនឱ្យចាញ់ស៊ីហ្គេមទេ ទាំងការបាញ់កាំជ្រួច លើកទឹកចិត្តជនពិការរបស់យើង យើងលើកទឹកចិត្តជនពិការនៅក្នុងក្របខ័ណ្ឌអាស៊ាន ដើម្បីឱ្យពួកគេប្រឹងប្រែងឡើង។”

រហូតមកទល់ពេលនេះ មានប្រតិភូកីឡាមកពីបណ្ដាប្រទេសដែលត្រូវចូលរួមប្រកួតកីឡាអាស៊ានប៉ារ៉ាហ្គេមមួយចំនួនបានធ្វើដំណើរមកដល់ប្រទេសកម្ពុជាហើយ ដោយក្នុងនោះរួមមាន ហ្វីលីពីន ឥណ្ឌូនេស៊ី (មកដល់ថ្ងៃនេះ ដោយប្រើប្រាស់យន្ដហោះពិសេសចំនួន២គ្រឿង) ដែលកាតព្វកិច្ចរបស់កម្ពុជាក្នុងនាមជាម្ចាស់ផ្ទះ ត្រូវតែទទួលភ្ញៀវឱ្យបានល្អបំផុត។ នេះបើតាមសម្ដេចតេជោបានបញ្ជាក់។

សម្ដេចតេជោ ហ៊ុន សែន បានផ្ដាំផ្ញើឱ្យអ្នកដែលពាក់ព័ន្ធក្នុងការរៀបចំត្រូវខិតខំប្រឹងប្រែងអនុវត្តឱ្យបានល្អ ព្រោះថាឆ្លងកាត់ភាពជោគជ័យល្អឥតខ្ចោះនៃការធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២ ដែលទើបបញ្ចប់នាពេលកន្លងទៅថ្មីៗនេះ ខណៈប្រជាពលរដ្ឋក៏ត្រូវចូលរួមដូចគ្នាផងដែរ ពិសេសសុំការយោគយល់ការបញ្ចៀសចរាចរណ៍សម្រាប់គណៈប្រតិភូកីឡាបណ្ដាប្រទេសនានា។

សម្ដេចតេជោ ហ៊ុន សែន បានបន្ថែមទៀតថា ចំពោះថវិកាដែលចំណាយលើការរៀបចំចំនួន១១៨លានដុល្លារ ទាំងស៊ីហ្គេម និងអាស៊ានប៉ារ៉ាហ្គេម គឺគ្រប់គ្រាន់ ប៉ុន្ដែបើត្រូវការបន្ថែមទៀត ដើម្បីការរៀបចំ សម្ដេចក៏ហ៊ានចំណាយផងដែរ។ សម្ដេចតេជោនៅតែបន្ដណែនាំឱ្យអភិបាលរាជធានី-ខេត្ត ត្រូវរៀបចំការបញ្ចាំងស្លាយសម្រាប់ប្រជាពលរដ្ឋទស្សនានៅតាមទីសាធារណៈផងដែរ គ្រាដែលពហុកីឡដ្ឋានមរកតតេជោ អាចផ្ទុកអ្នកគាំទ្រចូលរួមទស្សនាដោយផ្ទាល់បានត្រឹមតែជាង៦ម៉ឺននាក់ប៉ុណ្ណោះ ដូច្នេះសម្ដេចជឿជាក់ថា នឹងមានប្រជាពលរដ្ឋជាច្រើនទៀតចង់ទស្សនាដោយផ្ទាល់ ដូច្នេះដើម្បីសម្រួលការងារនេះមានតែងបញ្ចាំងស្លាយផ្សាយបន្ដផ្ទាល់ប៉ុណ្ណោះ​។

សូមបញ្ជាក់ថា ការប្រកួតកីឡាអាស៊ានប៉ារ៉ាហ្គេម លើកទី១២ នៅកម្ពុជា គឺមានកីឡា ១៣ប្រភេទ និងកីឡាបង្ហាញ ១ប្រភេទ (មិនគិតមេដាយក្នុងតារាងមេដាយ) ដែលសរុបវិញ្ញាសាប្រកួតទាំងអស់ គឺមាន ៤២៩វិញ្ញាសា ត្រូវបានដាក់ប្រកួតរួមមានកីឡាអត្តពលកម្មជនពិការ, ហែលទឹកជនពិការ, បាល់បោះរទេះ, បាល់ទះអង្គុយ, វាយកូនឃ្លីលើតុជនពិការ, វាយសីជនពិការ, បាល់ទាត់ជនពិការភ្នែក, បាល់ទាត់ចលករខួរក្បាល, បាល់បោះជនពិការ, លើកទម្ងន់ជនពិការ, យូដូជនពិការ, បូស្យា និងកីឡាអុក ។ រីឯកីឡាបង្ហាញ គឺកីឡាអេឡិចត្រូនិកច(E-Sports)។ ចំពោះវិញ្ញាសាមួយភាគធំនឹងត្រូវប្រកួតនៅទីលាននៃពហុកីឡដ្ឋានជាតិ​មរតកតេជោ, ពហុកីឡ​ដ្ឋានជាតិអូឡាំពិក, មជ្ឈមណ្ឌលជាតិនៃជនពិការតេជោសែន, សាកល​វិទ្យា​ល័យភូមិន្ទភ្នំពេញ, សហភាពសហព័ន្ធយុវជនកម្ពុជា(ស.ស.យ.ក) រាជធានីភ្នំពេញ និង​ណាហ្គា​វើលដ៍២ សម្រាប់ប្រភេទកីឡាអេឡិចត្រូនិក។

សូមបញ្ជាក់ថា គិតត្រឹមថ្ងៃទី០១ ខែមិថុនា ឆ្នាំ២០២៣នេះ នៅសល់តែ២ថ្ងៃទៀតប៉ុណ្ណោះ នៃព្រឹត្តិការណ៍អាស៊ានប៉ារ៉ាហ្គេមលើកទី១២ នឹងត្រូវធ្វើឡើងចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ នឹងឈានដល់ព្រឹត្តិ​ការណ៍អាស៊ានប៉ារ៉ាហ្គេមលើកទី១២ (12th ASEAN Para Games) ដែលកម្ពុជាធ្វើជាម្ចាស់ផ្ទះ ក្នុងឆ្នាំ២០២៣នេះ៕