ភ្នំពេញ ៖ កាលពីប៉ុន្មានឆ្នាំមុននេះ រថយន្តដែលប្រជាពលរដ្ឋកម្ពុជាប្រើប្រាស់គឺសុទ្ធតែនាំចូលពីខាងក្រៅប្រទេសទាំងអស់ រាប់ទាំងប្រភេទរថយន្តមួយជជុះ ឬរថយន្តទឹក និងប្រភេទរថយន្តថ្មី ប៉ុន្តែដោយសារទីផ្សារកាន់តែរីកចម្រើន ក្រុមហ៊ុននាំចូលរថយន្តបានពង្រីកការវិនិយោគរបស់ខ្លួនដោយបង្កើតរោងចក្រដំឡើងនៅក្នុងប្រទេសកម្ពុជាផ្ទាល់តែម្ដង ដែលគិតមកដល់ចុងឆ្នាំ២០២២នេះ កម្ពុជាមានរោងចក្រដំឡើងរថយន្តចំនួន៨បានអនុម័តឱ្យវិនិយោគ ហើយក្នុងនោះមានរោងចក្រខ្លះកំពុងដំណើរការខ្លះ ហើយរោងចក្រខ្លះទៀតស្ថិតនៅក្នុងគម្រោងនៅឡើយ។

១.រោងចក្រដំឡើងរថយន្ត Hyundai  ៖ ជារោងចក្រដំឡើងរថយន្តដំបូងគេបង្អស់នៅក្នុងប្រទេសកម្ពុជា ដែលមានទីតាំងនៅតំបន់សេដ្ឋកិច្ចពិសេសនៃខេត្តកោះកុង ហើយរោងចក្រនេះចាប់ផ្ដើមបើកដំណើរការកាលពីអំឡុងឆ្នាំ២០១១ ។

២. រោងចក្រដំឡើងរថយន្ត Daehan ៖ រោងចក្រមួយនេះបានបើកដំណើរការកាលពីឆ្នាំ២០១៨ នៅលើទឹកដីនៃក្រុងបាវិត ខេត្តស្វាយរៀង ដោយក្នុងមួយឆ្នាំ រោងចក្រដំឡើងរថយន្តមួយនេះ មានសមត្ថភាពដំឡើងបានប្រមាណ២ម៉ឺនគ្រឿង ។

៣.ក្រុមហ៊ុន International VCV Industry Co.,Ltd ៖ ក្រុមហ៊ុនត្រូវបានក្រុមប្រឹក្សាអភិវឌ្ឍន៍កម្ពុជាចេញវិញ្ញាបនបត្រចុះបញ្ជីវិនិយោគជាផ្លូវការលើគម្រោងបង្កើតរោងចក្រផ្គុំ និងដំឡើងរថយន្ត។ រោងចក្រនេះមានទីតាងនៅភូមិទ្រុងមាន់ សង្កាត់អូរបែកក្អម ខណ្ឌសែនសុខ ភ្នំពេញ មានទុនវិនិយោគប្រមាណ៤លានដុល្លារអាមេរិក ។

៤. ក្រុមហ៊ុន RMA Cambodia ៖ ជាគម្រោងរោងចក្រដំឡើងរថយន្តម៉ាកហ្វដ នៅស្រុកក្រគរខេត្តពោធិ៍សាត់ ដែលមានទុនវិនិយោគ២១លានដុល្លារអាមេរិក ។ រោងចក្រនេះ បានដាក់ដំណើរការដំឡើងជាផ្លូវការរួចរាល់ហើយ ។

៥.ក្រុមហ៊ុន Toyota Tsusho Manufacturing (Cambodia) Co., Ltd. ៖ ជាគម្រោងបង្កើតរោងចក្រផ្គុំ និងតម្លើងរថយន្តតូយ៉ូតា ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួន ៣៦,៧លានដុល្លារអាមេរិក និងបង្កើតការងារបានចំនួនប្រមាណ ១៥០នាក់។

៦. ក្រុមហ៊ុន GTV MOTOR CO., LTD ៖ ជាគម្រោងបង្កើតរោងចក្រដំឡើងរថយន្ត ដែលមានទីតាំងវិនិយោគស្ថិតនៅអគារលេខ ៦ A និង ៦ B ផ្លូវជាតិលេ៣ ភូមិអង្រ្គង ឃុំអង្គពពេល ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ១៥,៦លានដុល្លារអាមេរិក និងអាចបង្កើតការងារបានចំនួន ៧៣៨កន្លែង បានដំណើរការកាលពីថ្ងៃទី១៧ ខែមិថុនា ឆ្នាំ២០២២

៧.ក្រុមហ៊ុន K (CAMBODIA) CO., LTD ជាក្រុមហ៊ុននាំចូលរថយន្តម៉ាក ISUZU មកកម្ពុជាក៏មានគម្រោងបង្កើតរោងចក្រផ្គុំដំឡើងរថយន្ត អ៊ីស៊ូហ្ស៊ុ (ISUZU) ដែលមានទីតាំងវិនិយោគស្ថិតនៅភូមិសង្គ្រោះជាតិ ឃុំត្រពាំងគង ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៧,៣លានដុល្លារអាមេរិក និងអាចបង្កើតការងារបានចំនួន ១៦៦កន្លែង។ ៨.ក្រុមហ៊ុន EM AUTOMOBILE CO., LTD: គម្រោងបង្កើតរោងចក្រផ្គុំដំឡើងគ្រឿងចក្ររថយន្តសណ្តោង និងរថយន្តដឹកទំនិញធុនធ្ងន់គ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ៤៨ ភូមិឈូក ឃុំជីខលើ ស្រុកស្រែអំបិល ខេត្តកោះកុង មានទុនវិនិយោគចំនួន ១៦,៣លានដុល្លារអាមេរិក និងអាចបង្កើតការងារបានចំនួន ៥១៥កន្លែង ។