សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រដ្ឋមន្ត្រីក្រសួងទេសចរណ៍បានឱ្យដឹងថា មានភ្ញៀវទេសចរបរទេសប្រមាណ ២,៥៧ លាននាក់បានមកកម្សាន្តនៅកម្ពុជាក្នុងឆមាសទី១នៃឆ្នាំ២០២៣នេះ ដែលចំនួននេះមានការកើនឡើងពី ៤០៩ % ឬស្មើនឹង ៥០៦ ៧៦២នាក់ បើធៀបនឹងរយៈពេលដូចគ្នាកាលពីឆ្នាំមុន។
ជាមួយនឹងស្ថានភាពដ៏ល្អប្រសើរនៃវិស័យទេសចរណ៍រយៈពេល៦ខែកន្លងទៅនេះមានការព្យាករណ៍ថា កម្ពុជាអាចទទួលបានទេសចរបរទេសដល់ ៥លាននាក់នៅឆ្នាំ២០២៣ កើនឡើង១២០% ឬស្មើនឹង ២,២៧ លាននាក់ក្នុងឆ្នាំ២០២២។ ភ្ញៀវបរទេសមកកម្ពុជាត្រូវបានព្យាករថានឹងកើនឡើងដល់ ៧ លាននាក់ក្នុងឆ្នាំ២០២៥។ នេះជាការស្ទុះងើបឡើងវិញនៃវិស័យទេសចរណ៍ ដែលបានរួមចំណែកយ៉ាងសំខាន់ដល់កំណើនសេដ្ឋកិច្ចក្រោយជំងឺរាតត្បាតកូវីដ-១៩ និងត្រូវបានព្យាករថា នឹងសម្រេចបាន ៥.៦% នៅឆ្នាំ២០២៣ នេះ។ ការបើកប្រទេសចិនឡើងវិញនៅដើមឆ្នាំនេះ ក៏បានជំរុញកំណើនទេសចររបស់កម្ពុជាដែរ ដោយរំពឹងថា នឹងទាក់ទាញភ្ញៀវទេសចរចិន ពី៨០ម៉ឺននាក់ ទៅ១លាននាក់ នៅឆ្នាំ២០២៣នេះផងដែរ។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានថ្លែងឱ្យដឹងដែរថា ភ្ញៀវទេសចរបរទេសប្រមាណ ៩១០ ០០០នាក់ បានមកទស្សនាកម្ពុជាតាមផ្លូវអាកាសកើនឡើង ២៧៩ % ផ្លូវគោក ១.៦៣ លាននាក់ កើនឡើង ៥២៦ % និងផ្លូវទឹកចំនួន ៣០ ០០០ នាក់ កើនឡើង ៥៨៦% ហើយកម្ពុជាបានស្វាគមន៍ជើងហោះហើរអន្តរជាតិសរុបចំនួន ១០ ៦៣៥ នៅក្នុងឆមាសទីមួយនៃឆ្នាំនេះ។
សូមបញ្ជាក់ថា វិស័យទេសចរណ៍ត្រូវបានរាជរដ្ឋាភិបាលកម្ពុជាចាត់ទុកជាសសរស្តម្ភមួយដែលជួយដល់សេដ្ឋកិច្ចរបស់ប្រទេសកម្ពុជា រួមជាមួយនឹងវិស័យផ្សេងទៀត។ កម្ពុជាត្រូវបានគេទទួលស្គាល់ថា ជាប្រទេសដែលមានតំបន់បេតិកភណ្ឌពិភពលោកចំនួន៣ គឺឧទ្យានបុរាណវត្ថុអង្គរ ប្រាសាទព្រះវិហារ និងរមណីយដ្ឋានប្រាសាទសំបូរព្រៃគុក និងតំបន់ឆ្នេរសមុទ្រ ជាកន្លែងទេសចរណ៍ដ៏ស្រស់ស្អាត ដែលងាយទាក់ទាញទេសចរណ៍មកកំសាន្ត។
ដោយឡែករយៈពេល៦ខែដើមឆ្នាំ២០២៣ គ្រឹះស្ថានអង្គរ ដែលគ្រប់គ្រងលើការលក់សំបុត្រ ឬបណ្ណចូលទស្សនាតំបន់អង្គរបានប្រកាសថា រកចំណូលបានសរុប ១៧, ៨៧៧ ៤១៨ ដុល្លារអាមេរិក ក្នុងចំណោមភ្ញៀវទេសចរជិត៤សែននាក់។ ពោលគឺការកើនឡើងនូវចំណូលប្រមាណ ជាង ៦០០% ធៀបនឹងឆ្នាំ២០២២។ បើតាមសេចក្តីប្រកាសរបស់គ្រឹះស្ថាន បានបង្ហាញាថាសម្រាប់ខែមិថុនាកន្លងទៅ ការលក់សំបុត្រដល់ទេសចរបរទេសមានចំនួន ១ ៨១១ ៥៨៩ដុល្លារ កើនឡើងជាង២០០%។ សម្រាប់នៅតំបន់ប្រាសាទកោះកេរ ៦ខែលក់សំបុត្របានជាង ៩ម៉ឺនដុល្លារ រីឯការលក់សំបុត្រទូកនៅផែចុងឃ្នៀស ក្រុងសៀមរាប មានចំនួនជិត ៣០ម៉ឺនដុល្លារ។ ដោយឡែក ៦ខែដើមឆ្នាំ ថវិកាដែលបានឧបត្ថម្ភមូលនិធិគន្ធបុប្ផា សរុបចំនួន ៧៧១,៥៣៨ដុល្លារ។ សម្រាប់រយៈពេល៦ខែនៃឆ្នាំ២០២៣នេះ ភ្ញៀវទេសចរក្នុងស្រុកសរុបមានចំនួនប្រមាណ១១.១លាននាក់ កើនឡើងប្រមាណ ៧៥% ធៀបនឹងឆ្នាំ២០២២ ៕
Account
Security
Favourite Content