សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ ដំណាំម្ទេស ជាដំណាំមានសក្ដានុពលមួយនៅលើទីផ្សារមិនថាក្នុងស្រុក ឬនាំចេញនោះទេ ជាក់ស្ដែងកាលពីពេលថ្មីៗនេះ គេឃើញមានកសិដ្ឋាន និងចំការធំៗកំពុងរៀបចំសម្រាប់ដាំដុះ ដោយមានការផ្សព្វផ្សាយអំពីការចងក្រងជាសហគមន៍ទំនើបសម្រាប់ប្រជាកសិករនៅតំបន់ជិតៗអាចចូលរួមអនុវត្ត និងទទួលយកភាពរីករីកចម្រើនទាំងអស់គ្នា។
បើតាម ឯកឧត្តម ឃឹម ហ្វីណង់ អនុរដ្ឋលេខាធិការ និងអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា មានបងបង្អូនប្រជាកសិករជាង៥០គ្រួសារ បានចាប់អារម្មណ៍ចង់ស្នើសុំចងក្រងជាសហគមន៍កសិកម្មទំនើបសម្រាប់ដំណាំម្ទេសនៅតំបន់ជើងភ្នំគូលែន ស្រុកបន្ទាយស្រី ខេត្តសៀមរាប។ នៅទីនេះ ក៏មានកសិដ្ឋានចម្ការម្ទេសខ្នាតពាណិជ្ជកម្មមួយជាបង្គោលរួចជាស្រាប់ ដែលមានផ្ទៃដីដាំដុះចំនួន ៣០ហិកតា និងកំពុងសហការជាមួយកសិករមួយចំនួននៅក្នុងតំបន់ ដើម្បីផ្គត់ផ្គង់ម្ទេសជូនក្នុងតម្លៃ ៣០០០រៀល ក្នុងមួយគីឡូក្រាម ហើយសមត្ថភាពផ្គត់ផ្គង់ភាគច្រើនជាប្រភេទម្ទេសដៃនាង ជាមធ្យម ប្រមាណ៥០តោនក្នុងមួយខែ។
ឯកឧត្តមបានបញ្ជាក់ដែរថា តាមការវាយតម្លៃបឋម នៅតំបន់នេះមានសក្តានុពលអាចបង្កើតជាសហគមន៍កសិកម្មទំនើបសម្រាប់ដំណាំម្ទេសបាន ដោយសារមានទីផ្សារនៅរង់ចាំប្រមូលទិញច្បាស់លាស់ និងអាចធ្វើជាទម្រង់ផលិតកម្មកសិកម្មតាមកិច្ចសន្យា តែប្រហែលជាត្រូវការចំណាយពេលវេលាបន្តិចសិន ដោយសារកសិករភាគច្រើនទើបតែចាប់ផ្តើមរៀនដាំដុះម្ទេសជាលើកទីមួយនៅឡើយ។
លោក ឈឿង គីរីរត័្ន ជាម្ចាស់កសិដ្ឋានដាំម្ទេស គិរីទេស នៅតំបន់នោះស្រាប់ក៏មានមតិចូលរួមថា៖
«សម្រាប់ការបង្កើតជាសហគមន៍ទំនើបមានគុណសម្បត្តិច្រើន ពិសេសបងប្អូនកសិករអ្នកមានដីជិតៗគ្នាអាចប្រមូលផ្ដុំគ្នា ចំណេញទាំងការរៀបចំប្រព័ន្ធទឹក និងការគ្រប់គ្រង បន្ថែមពីលើនេះ ក្រសួងក៏មានសហការជាមួយដៃគូធំៗដើម្បីផ្ដល់ជាកម្ចីមានការប្រាក់ទាបសម្រាប់ធ្វើដើមទុនដើម្បីអភិវឌ្ឍទៅមុខទាំងអស់គ្នា ហើយយើងជាកសិដ្ឋានដែលបានដាំហើយ បានត្រួសត្រាយផ្លូវ មានទីផ្សារស្រាប់ទាំងក្នុង និងក្រៅស្រុក ធ្វើឱ្យការចងក្រងជាសហគមន៍កាន់តែងាយស្រួលរឿងតម្លៃផងដែរ»។
សូមបញ្ជាក់ថា ថ្វីត្បិតដំណាំម្ទេសត្រូវការចំណាយទុនវិនិយោគខ្ពស់ តែវាក៏ជាដំណាំដែលអាចលក់បានថ្លៃផងដែរ ប្រសិនបើមានកិច្ចសន្យាទុកជាមុនឱ្យបានត្រឹមត្រូវ ជាមួយនឹងថ្លៃថេរយ៉ាងហោចណាស់ចាប់ពី ៣០០០រៀលក្នុងមួយគីឡូក្រាម ឡើងទៅ។ ហេតុនេះ បងប្អូនកសិករអ្នកសៀមរាបអាចពិចារណាចងក្រងគ្នាជាសហគមន៍ដាំដំណាំម្ទេសដើម្បីផ្គត់ផ្គត់ឱ្យតម្រូវប្រើប្រាស់របស់ខេត្តខ្លួនឯងបាន ព្រោះបើតាមការប៉ាន់ស្មាន ក្នុងមួយថ្ងៃ សៀមរាបមានតម្រូវការម្ទេស ក្នុងចន្លោះពី២០-២៥តោន ដែលភាគច្រើនត្រូវបាននាំចូលមកពីខេត្តដទៃ ឬប្រទេសជិតខាងនៅឡើយ៕
Account
Security
Favourite Content