សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងដំណើរទស្សនកិច្ចរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានៅក្នុងប្រទេសបារាំង សម្ដេចបានជួបជាមួយថ្នាក់ដឹកនាំក្រុមហ៊ុនរបស់បារាំងជាច្រើន ហើយនៅក្នុងជំនួបទាំងនោះ ក្រុមហ៊ុនរបស់បារាំងជាច្រើនបានបង្ហាញការចាប់អារម្មណ៍លើការវិនិយោគរបស់ខ្លួននៅក្នុងប្រទេសកម្ពុជាដោយសម្លឹងមើលឃើញពីសក្ដានុពល និងសុទិដ្ឋិនិយមចំពោះភាពរីកចម្រើនរបស់កម្ពុជា។
នៅក្នុងជំនួបជាមួយសម្ដេចធិបតី ហ៊ុន ម៉ាណែត ក្រុមហ៊ុនអគ្គិសនីរបស់ប្រទេសបារាំង EDF បានបង្ហាញបំណងចង់មកវិនិយោគវិស័យថាមពលនៅក្នុងប្រទេសកម្ពុជា ខណៈដែលបច្ចុប្បន្នក្រុមហ៊ុនមួយនេះបាន និងកំពុងវិនិយោគលើវិស័យវារីអគ្គិសនីនៅប្រទេសឡាវ។ ក្រៅពីក្រុមហ៊ុនអគ្គិសនីរបស់ប្រទេសបារាំងដ៏ធំមួយនេះ ក៏មានក្រុមហ៊ុនជាច្រើនទៀតដែលចង់មកបណ្ដាក់ទុនវិនិយោគនៅក្នុងប្រទេសកម្ពុជាដូចជាសម្ព័ន្ធនិយោជកហ្វ្រង់កូហ្វូន APF ដែលមានក្រុមហ៊ុនជាច្រើននៅក្នុងសម្ព័ន្ធក៏បានជម្រាបជូនសម្ដេចធិបតីថា ពួកគេនឹងផ្សព្វផ្សាយពីសក្ដានុពលវិនិយោគរបស់ប្រទេសកម្ពុជាទៅកាន់ក្រុមហ៊ុនដែលស្ថិតនៅក្រោមសម្ព័ន្ធរបស់ខ្លួន ដើម្បីឱ្យពួកគេចាប់អារម្មណ៍ និងចូលបណ្ដាក់ទុនវិនិយោគនៅក្នុងប្រទេសកម្ពុជា ស្របនឹងរាជរដ្ឋាភិបាលប្រទេសកម្ពុជាបានផ្ដល់លក្ខខណ្ឌងាយស្រួលជាច្រើនដល់វិនិយោគិនបរទេស ដែលចង់បណ្ដាក់ទុនធ្វើអាជីវកម្មនៅក្នុងប្រទេសកម្ពុជា។
ដោយឡែក ក្រុមហ៊ុនថាមពលមួយទៀតរបស់បារាំង TotalEnergies ក៏បានបង្ហាញពីបំណងចង់បណ្ដាក់ទុនវិនិយោគលើថាមពលកកើតឡើងវិញនៅក្នុងប្រទេសកម្ពុជាផងដែរ ដោយលោក Patrict POUYANNE ដែលជាប្រធាន និងជានាយកប្រតិបត្តិក្រុមហ៊ុន TotalEnergies បានជម្រាបជូនសម្ដេចធិបតី ហ៊ុន ម៉ាណែត នាយករដ្ឋមន្ត្រីពីគម្រោងនៃការពង្រីកការវិនិយោគរបស់ខ្លួនបន្ថែមទៀតនៅក្នុងប្រទេសកម្ពុជា។
លោកបានមានប្រសាសន៍ថា ក្រុមហ៊ុន TotalEnergies គឺជាក្រុមហ៊ុនមានកិត្តិនាមល្បីល្បាញលើវិស័យប្រេង និងឧស្ម័ននៅព្រះរាជាណាចក្រកម្ពុជា ហើយក្រៅពីវិស័យនេះ ក្រុមហ៊ុនក៏មានអាជីវកម្មលើវិស័យថាមពល និងអគ្គិសនីដែរ ។ បច្ចុប្បន្ននេះ ក្រុមហ៊ុនកំពុងស្វែងឱកាសវិនិយោគលើវិស័យថាមពលកកើតឡើងវិញនៅប្រទេសសិង្ហបុរី ហើយជោគជ័យនៃគម្រោងនេះនឹងជំរុញដល់ការវិនិយោគលើថាមពលកកើតឡើងវិញនៅក្នុងប្រទេសកម្ពុជា ដែលនឹងធ្វើឱ្យកម្ពុជាកាន់តែមានជម្រើសប្រភពថាពលបន្ថែម ។
នៅក្នុងជំនួបជាមួយក្រុមហ៊ុនទាំងនោះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានស្វាគមន៍ដល់ក្រុមហ៊ុនបារាំងទាំងនោះ ដោយបង្ហាញពីសក្ដនានុពល និងច្បាប់វិនិយោគថ្មីរបស់កម្ពុជាដែលនឹងជួយដល់វិនិយោគិនប្រទេសបារាំង ក៏ដូចជាប្រទេសផ្សេងទៀតក្នុងការស្វែងរកប្រាក់ចំណូល និងឱកាសពង្រីកអាជីវកម្មរបស់ពួកគេ ។
ជាមួយនឹងការទទួលបានចំណាប់អារម្មណ៍ពីសំណាក់បណ្តាក្រុមហ៊ុន និងវិនិយោគិនបារាំងយ៉ាងច្រើននេះ អ្នកជំនាញនៃវិស័យអចលនទ្រព្យនៅក្នុងប្រទេសកម្ពុជា បានបង្ហាញពីសុទិដ្ឋិនិយមចំពោះដំណើរទស្សនកិច្ចរបស់ប្រមុខថ្នាក់ដឹកនាំទៅកាន់ប្រទេសបារាំង ក៏ដូចជាប្រទេសជាដៃគូ ដោយរំពឹងថានឹងអាចទាក់ទាញវិនិយោគិនពីប្រទេសទាំងនោះចូលមកប្រទេសកម្ពុជាបានកាន់តែច្រើន ហើយសម្រាប់អ្នកវិនិយោគក្នុងប្រទេសកម្ពុជាក៏ត្រូវត្រៀមលក្ខណៈសម្បត្តិដើម្បីរង់ចាំការស្វាគមន៍អ្នកវិនិយោគទាំងនោះផងដែរ ៕
Account
Security
Favourite Content