ពោធិ៍សាត់ ៖ ល្ហុងហូឡែន ជាពូជល្ហុងមួយប្រភេទដែលគេនិយមដាំនៅក្នុងខេត្តពោធិ៍សាត់ ហើយវាក៏ជាប្រភេទដំណាំហូបផ្លែម្យ៉ាងដែលមនុស្សភាគច្រើននិយមទទួលទាន ជាពិសេសពូជល្ហុងនេះងាយស្រួលដាំ សាច់ក្រាស់ល្អ មានរសជាតិផ្អែមឆ្ងាញ់ និងមានទីផ្សារល្អ។

បើតាម លោក យន់ សារិន ជាម្ចាស់អាជីវកម្មកសិផលខ្មែរ ដែលជាអាជីវកម្មសហគមន៍នៅខេត្តពោធិ៍សាត់ បានមានប្រសាសន៍ថា ៖

«ខែនេះជាដើមរដូវប្រមូលផលល្ហុងហូឡែន យើងកំពុងមមាញឹកប្រមូលទិញផ្លែល្ហុង និងលក់បន្តទៅឱ្យអតិថិជនគ្រប់ខេត្តក្រុង ហើយដំណាំល្ហុងនេះគឺងាយស្រួលដាំ ឱ្យផលពេញមួយឆ្នាំ ឱ្យតែយើងមើលថែបានដិតដល់»។

លោកបន្តថា ល្ហុងប្រភេទ ហូឡែន នេះអាចប្រមូលផលជាមធ្យមបានចន្លោះពី ៣០០-៥០០គីឡូក្រាមក្នុងមួយថ្ងៃ និងលក់ទៅកាន់ទីផ្សារគ្រប់ខេត្ត ប៉ុន្តែតំបន់ដែលពេញនិយមគឺ នៅរាជធានីភ្នំពេញ ខេត្តសៀមរាប និងព្រះសីហនុ ដែលអតិថិជនទិញយកទៅលក់បន្តនៅតាមម៉ាត់ឆ្នេរ តាមផ្សារកសិផលធម្មជាតិ និងតាមហាងលក់ផ្លែឈើស្រស់ ឬកិនជាភេសជ្ជៈផងដែរ។

ចំណែក តម្លៃល្ហុងអាចលក់រាយចន្លោះពី ៥ ០០០ – ៦ ០០០រៀល ក្នុងមួយគីឡូក្រាម ឯការបោះដុំអាចលក់បានប្រមាណ ២ ៥០០ – ៣ ០០០រៀល ក្នុងមួយគីឡូក្រាម ឬអាចប្រែប្រួលទៅតាមស្តង់ដាររបស់ផ្លែល្ហុងរួមមាន លេខ១ និងលេខ២ ក៏ដូចជាប្រែប្រួលទៅតាមតម្រូវការទីផ្សារផ្ទាល់តែម្ដង ហើយល្ហុងហូឡែននេះមានការគាំទ្រច្រើនដោយសារវាជាល្ហុងធម្មជាតិ មានរស់ជាឆ្ងាញ់ ផ្អែមដិត សាច់តាន់ក្រាស់ល្អ។ នេះអ្វីដែលម្ចាស់អាជីវកម្មខាងលើបានលើកឡើង។

លោក យន់ សារិន បានបន្តទៀតថា ចំពោះតំបន់ដែលប្រមូលផលល្ហុង គឺនៅស្រុកភ្នំក្រវាញ និងស្រុកវាលវែង តែស្រុកដែលជាគោលដៅធំជាងគេគឺនៅស្រុកវាលវែង ដោយប្រមូលទិញពីកសិករជាង ១០គ្រួសារ បន្ទាប់ពីលោកបានផ្ដល់បច្ចេកទេសដាំដុះដល់កសិករយ។

យ៉ាងណាមិញ លោកក៏បានបញ្ជាក់ផងដែរថា អាជីវកម្មនេះក៏ជួបបញ្ហាប្រឈមភាគច្រើនដែរ ដោយសារតែបញ្ហាដឹកជញ្ជូន ខ្វះបច្ចេកទេសក្នុងការវេចខ្ចប់ធ្វើឱ្យល្ហុងឆាប់ជាំ ដាច់សាច់ ខូចខាតផ្លែល្ហុង ធ្វើឱ្យពិបាកលក់៕