ខ្ញី ឬភាសាបរទេសហៅថា Z​ingiber officinale ជារុក្ខជាតិម្យ៉ាងដែលមានដើមកំណើតនៅក្នុងតំបន់អាស៊ីអាគ្នេយ៍ ហើយវាត្រូវបានគេដាំនៅតាមតំបន់ត្រូពិច។ ដោយឡែកសម្រាប់នៅប្រទេសកម្ពុជាយើងក៏មានអ្នកដាំដុះច្រើននៅតាមបណ្ដាខេត្តនានាផងដែរសម្រាប់ប្រើប្រាស់តាមតម្រូវការ មិនថាការយកធ្វើជាឱសថបុរាណ និងការយកទៅធ្វើជាគ្រឿងទេសផ្សំរសជាតិម្ហូបអាហារ។

ជាចំណេះដឹង និងជាគន្លឹះក្នុងការដាំដុះដើម្បីអាចទទួលបានទិន្នផលល្អ ការដាំគឺត្រូវការទីតាំងដែលមានសីតុណ្ហភាពចន្លោះ ២៥-៣០អង្សាសេ ជាដីដែលមានសារធាតុ pH ចន្លោះពី ៥.៥-៧ ហើយប្រភេទដីដែលស័ក្ដិសមបំផុត គឺប្រភេទដីល្បាយខ្សាច់ មានសភាពធូរងាយច្រោះទឹកបានល្អ ហើយត្រូវជៀសវាងដីល្បាយខ្សាច់លាយឥដ្ឋ ឬដីជាំទឹក។

រុក្ខជាតិនេះត្រូវការពន្លឺ ដោយគេអាចដាំដុះនៅលើដីវាល និងក្រោមម្លប់ត្រឹម ២០-៣០% វាក៏ជាដំណាំដែលមានប្រព័ន្ធឫសជម្រៅ ៥០cmពីដីស្រទាប់លើ។ ខ្ញីត្រូវការទឹកដើម្បីលូតលាស់ តួយ៉ាងកត្តាធម្មជាតិ វាត្រូវការកម្រិតទឹកភ្លៀងពី ១៣០០-១៥០០mm/ ឆ្នាំ ឬគេអាចប្រើប្រាស់ប្រព័ន្ធតំណក់ទឹកជាជំនួយក្នុងការស្រោចទឹក និងដាក់ជីក៏បាន។

ក្នុងការដាំខ្ញីឱ្យទទួលបានល្អ កសិករក៏ត្រូវចេះជ្រើសរើសពូជខ្ញីដើម្បីដាំ តួយ៉ាងនៅក្នុងប្រទេសកម្ពុជាយើង ពូជខ្ញីមានជាច្រើនប្រភេទ ទាំងពូជក្នុងស្រុក និងពូជនាំចូល ប៉ុន្តែបច្ចុប្បន្ននេះគេនិយមដាំខ្ញីចិនដែលប្រើរយៈពេលខ្លីជាងខ្ញីក្នុងស្រុក ហើយអាចប្រមូលផលបានចន្លោះ ៨-១០ខែ ក្រោយពេលដាំ។ ដោយឡែក បច្ចេកទេសនៃការជ្រើសរើសមើម គឺរើសយកមើមណាដែលមានសំបករលោងចាស់ មានភ្នែកយ៉ាងហោចពីរ និងមិនមានការបំផ្លាញខូចខាតដោយសត្វល្អិត ឬជំងឺនានា។

ចំពោះការដាំនៅក្នុងទ្រង់ទ្រាយធំ អ្នកដាំគួរតែបណ្ដុះកូនមុនដាំដើម្បីឲ្យវាអាចដុះលូតលាស់បានស្មើៗគ្នា ហើយការបណ្ដុះកូន គេអាចបណ្ដុះមុនដាំរយៈពេល ១០-១៥ថ្ងៃ។ ពាក់ព័ន្ធនឹងការបណ្ដុះ ដំបូងគេត្រូវយកពូជខ្ញីទៅកាត់ប្រវែង ២.៥-៥សង់ទីម៉ែត្រ អាស្រ័យលើភ្នែករបស់វា បន្ទាប់មករៀបចំដីខ្សាច់កម្រាស់ ១៥-២០សង់ទីម៉ែត្រ ដើម្បីកប់ខ្ញីក្នុងគម្លាតពីខ្នែងមួយទៅខ្នែងមួយប្រមាណ ៣-៥សង់ទីម៉ែត្រ រួចស្រោចទឹកម្ដងក្នុងមួយថ្ងៃ ក្នុងកម្រិតសំណើម៨០-៩០ភាគរយ។

កសិករអាចដាំខ្ញីបានល្អនៅចន្លោះខែកុម្ភៈ ដល់ខែមីនា រីឯការរៀបចំដីវិញ ដោយសារខ្ញីជារុក្ខជាតិមើម គេត្រូវលើករង ឬភ្ជួរដីជាមុនសិន ហើយហាលដីនោះរយៈពេល៥-៧ថ្ងៃ។ បន្ទាប់មកបាចកំបោរបន្ថែម ក្នុងករណីដីមានជាតិអាស៊ីតខ្លាំង ហើយក្នុងកំឡុងពេលរៀបចំដីនេះដែរ គេអាចដាក់ជីទ្រាប់បាត ដូចជា P និង K ជីលាមកសត្វ ឬជីកំប៉ុស្តិ៍។

ទាក់ទងនឹងការដាំ គេអាចដាំក្នុងមួយរង ២ជួរ ក្នុងគម្លាត ៤០-៥០សង់ទីម៉ែត្រ និងមានចន្លោះគុម្ព ៣០-៤០សង់ទីម៉ែត្រផងដែរ។ បន្ទាប់មកយកខ្ញីដែលបានបណ្ដុះរួចដាក់ដាំក្នុងជម្រៅ ៥-៧សង់ទីម៉ែត្រ ដោយដាំក្នុងទម្រង់ផ្តេក ហើយយកដីលុបពីលើឱ្យបានជិតល្អ។ ក្រៅពីនេះ បន្ទាប់ពីដាំហើយគេអាចប្រើជី NPK រូបមន្ត ៧៥-៥០-៥០ ចំនួន ៤ដងផ្សេងគ្នាគឺ បំប៉នលើកទី១ រយៈពេល ៣០ថ្ងៃក្រោយដាំ បំប៉នលើកទី២ រយៈពេល ៦០ថ្ងៃក្រោយដាំ បំប៉នលើកទី៣ រយៈពេល ៩០ថ្ងៃក្រោយដាំ និងបំប៉នលើកទី៤ រយៈពេល ១២០ថ្ងៃក្រោយដាំ។

ក្នុងការប្រមូលផល ដើម្បីរក្សាទុកមើមខ្ញីបានល្អ គេត្រូវជ្រើសខ្ញីណាដែលមានសំបកចាស់ ហើយសុខភាពល្អទុកដាក់ក្នុងលក្ខខណ្ឌសីតុណ្ហភាពទាប រីឯឫសជាប់មើមគេត្រូវកាត់ចោលដោយទុកដីកំណើតដែលនៅជាប់ខ្ញី និងមិនត្រូវឱ្យវាមានសំណើមទេចៀសវាងរលួយមើម។ ក្រោយពីប្រមូលផលរួច គេត្រូវដាំដំណាំគម្របដីជាមុនសិនដូចជាដំណាំដែលមានអំបូរឬគ្រួសារខុសពីខ្ញី ទើបអាចដាំខ្ញីម្ដងទៀតបាន ដើម្បីទុកពេលឲ្យដីបន្ថែមនូវជីវជាតិ និងបង្កាប្រភេទជំងឺនៅរដូវចាស់៕