ភ្នំពេញ ៖ ចំណតផែកុងតឺន័រថ្មីរបស់កំពង់ផែស្វយ័តក្រុងព្រះសីហនុ មានតួនាទីយ៉ាងសំខាន់រួមចំណែកគាំទ្រដល់ភាពរីកចម្រើន និងការអភិវឌ្ឍរបស់ប្រទេសជាតិតាម​រយៈការកើនឡើងគួរឱ្យកត់សម្គាល់នូវបរិមាណទំនិញឆ្លងកាត់នៅក្នុងកំពង់ផែនេះ ដែលធ្វើឱ្យប្រាក់ចំណូលរបស់កំពង់ផែ ក៏ដូចជាប្រាក់ចំណូលរបស់ជាតិមានការ​កើន​ឡើងជាលំដាប់។

ពិធីបើកការដ្ឋានសាងសង់ចំណតផែកុងតឺន័រទឹកជ្រៅថ្មីជំហានទី១នៅកំពង់ផែស្វយ័តក្រុងព្រះសីហនុ និងប្រគល់ទទួលគ្រឿងចក្រលើកដាក់ទំនិញ និងកុងតឺ​ន័រច​ល័​ត​​នៅ​គែមផែ ក្រោមក្របខ័ណ្ឌសហប្រតិបត្តិការពីរដ្ឋាភិបាលជប៉ុនគ្រោងនឹងប្រព្រឹត្តទៅនៅថ្ងៃសុក្រ ទី២២ ខែធ្នូ ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់របស់ សម្តេចម​ហា​បវរ​ធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

ទាក់ទងនឹងគម្រោងនេះ លោកជំទាវ កុយ សុដានី រដ្ឋលេខាធិការប្រចាំការក្រសួងសាធារណការ និងដឹកជញ្ជូន និងជាប្រធានគណៈកម្មការ នាថ្ងៃទី១៤ ខែធ្នូ ឆ្នាំ២០២៣ បានអញ្ជើញ​ដឹកនាំកិច្ចប្រជុំគណៈកម្មការសម្រាប់រៀបចំពិធីបើកការដ្ឋានសាងសង់ចំណតផែកុងតឺន័រទឹកជ្រៅថ្មីជំហានទី១នៅកំពង់ផែស្វយ័តក្រុងព្រះសីហនុ ដោយកិច្ចប្រជុំនេះធ្វើឡើងក្នុង​គោលបំណងពិនិត្យវឌ្ឍនភាពការងាររបស់គណៈកម្មការ និងអនុគណៈកម្មការនីមួយៗ ព្រមទាំងពិនិត្យមើលការងារផ្សេងៗដែលនៅ​សេសសល់។

ចំណតផែកុងតឺន័រថ្មី-ជំហានទី១៖ មានប្រវែង ៣៥០ម៉ែត្រ ជម្រៅទឹក ១៤,៥ម៉ែត្រគ្រោងនឹងបញ្ចប់នៅឆ្នាំ២០២៦ (គម្រោងសាងសង់ចំនួន ៣៦ខែ)មានសមត្ថភាព​អាចអនុ​ញ្ញាត​ឱ្យនាវាកុងតឺន័រមានទម្ងន់ផ្ទុក ៦០ ០០០DWT (ឬស្មើនឹង ៤ ០០០TEUs) ដែលមានផ្លូវដឹកជញ្ជូននៅក្នុងតំបន់អាស៊ីប៉ាស៊ីហ្វិក ទៅមកកំពង់ផែស្វយ័តក្រុងព្រះសីហនុ ហើយនឹងបង្កើនសមត្ថភាពកំពង់ផែបន្ថែមប្រមាណ ៤៥០.០០០TEUs/១ឆ្នាំ។

ចំណែកចំណតផែកុងតឺន័រទឹកជ្រៅថ្មី-ជំហានទី២៖ មានប្រវែង ៤០០ម៉ែត្រ ជម្រៅទឹក ១៦,៥ម៉ែត្រ គ្រោងនឹងបញ្ចប់​នៅឆ្នាំ២០២៨ (គម្រោងសាងសង់ចំនួន ៣៦ខែ) មានសមត្ថ​ភាព​អាចអនុញ្ញាតឱ្យនាវាកុងតឺន័រមានទម្ងន់ផ្ទុក ១២០ ០០០DWT (ឬស្មើនឹង១០ ០០០TEUs) ដែលមានផ្លូវដឹកជញ្ជូននៅក្នុងតំបន់សមុទ្រឥណ្ឌា និងប៉ាស៊ីហ្វិក ទៅមកកំពង់ផែ​ស្វយ័តក្រុងព្រះសីហនុ ហើយនឹងបង្កើនសមត្ថភាពកំពង់ផែបន្ថែមប្រមាណ៥៧០.០០០TEUs/១ឆ្នាំ។ចំណតផែកុងតឺន័រទឹកជ្រៅថ្មី-ជំហានទី៣៖ មានប្រវែង ៤៣០ម៉ែត្រ ជម្រៅ ទឹក ១៧,៥ម៉ែត្រ គ្រោងនឹងបញ្ចប់​នៅឆ្នាំ២០២៩ (គម្រោងសាងសង់ចំនួន ៤២ខែ) មានសមត្ថភាពអាចអនុញ្ញាតឱ្យនាវាកុងតឺន័រមានទម្ងន់ផ្ទុក ១៦០ ០០០ DWT (ឬស្មើ​នឹង ១៥ ០០០TEUs) ដែលមានផ្លូវដឹកជញ្ជូនក្នុងតំបន់អឺរ៉ុប និងអាមេរិក ទៅមកកំពង់ផែស្វយ័ត​ក្រុងព្រះសីហនុ ហើយនឹងបង្កើនសមត្ថភាពកំពង់ផែបន្ថែមប្រមាណ ៦១៧.០០០ TEUs/១ឆ្នាំ។

នៅពេលដែលគម្រោងទាំង៣ជំហាននេះសម្រេចបានតាមការគ្រោងទុក គឺនឹងជួយឱ្យវិស័យដឹកជញ្ជូននៅកម្ពុជាកាន់តែល្អប្រសើរ ជាពិសេសធានាដល់ការចូល​ចត​នាវាកុងតឺន័រ​ខ្នាត​ធំៗ ប្រចាំតំបន់អាស៊ី-ប៉ាស៊ីហ្វិក និងឆ្លើយតបទៅនឹងការកើនឡើងនៃបរិមាណកុងតឺន័រ ឆ្លងកាត់កំពង់ផែមួយនេះក្នុងពេលបច្ចុប្បន្ននិងទៅអនាគត ។

ក្នុងពិធីជួបសំណេះសំណាលជាមួយបងប្អូនកម្មករ និយោជិតជាង ១ ៥០០០នាក់ មកពីបណ្តារោងចក្រ សហគ្រាសក្នុងតំបន់សេដ្ឋកិច្ចពិសេស ខេមបូឌា ចេជាង ហ្គ័រជី ខេត្តព្រះសីហនុ នាខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឱ្យដឹងថា កំពង់ផែទឹកជ្រៅថ្មីជំហានទី១ នឹងត្រូវបុកគ្រឹះសាងសង់ជាផ្លូវការនៅមុនដំណាច់​ឆ្នាំ​២០២៣​នេះ ដើម្បីធានាដល់ការចូលចតនាវាកុងតឺន័រខ្នាតធំៗ ឆ្លើយតបទៅនឹងការកើនឡើងនៃបរិមាណកុងតឺន័រ ឆ្លងកាត់ កំពង់ផែមួយនេះ ក្នុងពេលបច្ចុប្បន្ន និងនា​ពេលអនាគត។ រាជរដ្ឋាភិបាល កំពុងកែប្រែឃ្លាំងដាក់ទំនិញបន្ថែម និងត្រៀមបុកគ្រឹះក្នុងការសាងសង់ពង្រីកកំពង់ផែទឹកជ្រៅថ្មីមួយបន្ថែមទៀតនៅខេត្តព្រះសីហនុ ដើម្បី​អាចឱ្យនាវាកុងតឺ​ន័រ​ខ្នាតធំៗអាចចូលចតបាន។

សម្តេចធិបតី ហ៊ុន ម៉ាណែត បានបន្តថា ការបុកគ្រឹះសាងសង់កំពង់ផែទឹកជ្រៅថ្មីនេះ ដោយសារតែបច្ចុប្បន្ននេះ កំពង់ផែខេត្តព្រះសីហនុមានជម្រៅទឹកត្រឹមតែ៩ម៉ែត្រកន្លះ ដូច្នេះរាល់ទំនិញដែលត្រូវចូលមកកម្ពុជាតាមរយៈកប៉ាល់ដែលនាំចូលមកត្រឹមតែ១៨ភាគរយនៃទំនិញដែលធ្វើឲ្យតម្លៃដឹកជញ្ជូនខ្ពស់។

សម្តេចធិបតី បានបញ្ជាក់ថា បើកំពង់ផែទឹកជ្រៅថ្មីជំហានទី១ បានសាងសង់រួចរាល់នោះ អាចធ្វើឱ្យកប៉ាល់ដឹកកុងតឺន័រចូលមកបាន៩៣ភាគរយ ខណៈនៅសល់៧​ភាគ​រយ​តែប៉ុណ្ណោះ ដូច្នេះវានឹងជួយកាត់បន្ថយតម្លៃនៃការដឹកជញ្ជូន ដែលមួយកុងតឺន័រប្រមាណ ៤០០ ទៅ ៥០០ដុល្លារអាមេរិក មកត្រឹម ២០០ដុល្លារ អាមេរិក ក្នុងមួយកុង​តឺន័រ​។ បន្ថែមពីនោះទៀត បើកំពង់ផែទឹកជ្រៅថ្មី អភិវឌ្ឍបន្ថែមជំហានទី២ ឬជំហាន ទី៣បន្ថែមទៀតនោះ ដូច្នេះរាល់កប៉ាល់ទាំងអស់ អាចចូលមកកម្ពុជាបាន ដែលនឹង​ជួយ​បង្កើតការងារកាន់តែច្រើនជំរុញសេដ្ឋកិច្ចកាន់តែខ្លាំងបន្ថែមទៀត៕