ភ្នំពេញ ៖ គ្រឹះស្ថានមីក្រូហិរញ្ញវត្ថុអម្រឹត បានសហការជាមួយមជ្ឈមណ្ឌលជាតិផ្តល់ឈាម នាព្រឹកថ្ងៃទី២១ខែកុម្ភៈ ប្រារព្ធកម្មវិធី ផ្តល់ឈាម ផ្តល់ជីវិត “បរិច្ចាគឈាមដោយស្ម័គ្រចិត្ត”នៅទីស្នាក់ការអម្រឹត ខណ្ឌទួលគោក រាជធានីភ្នំពេញ ដើម្បីជួយដល់សង្គម សង្គ្រោះជីវិតមនុស្សនិងរួមចំណែកផ្គត់ផ្គង់ឈាមឱ្យបានគ្រប់គ្រាន់សម្រាប់អ្នកជំងឺដែលកំពុងត្រូវការឈាមនៅតាមមន្ទីរពេទ្យ។

ឆ្នាំនេះជាឆ្នាំទី៣ ដែលអម្រឹតបានរៀបចំកម្មវិធីផ្តល់ឈាមស្ម័គ្រចិត្តប្រចាំឆ្នាំលើកទី០៩ ចំថ្ងៃបុណ្យ“ទិវាជាតិមាតានិងទារក”ដើម្បីគាំទ្រដល់ម្តាយនិងទារកដែលខ្វះខាតហើយនេះក៏ជាដំណើរឆ្ពោះទៅកាន់ការចូលរួមផ្តល់១.០០០ប្លោកឈាមរបស់អម្រឹតជូនមជ្ឈមណ្ឌលជាតិផ្តល់ឈាម។ ការបរិច្ចាគឈាមនេះមានការចូលរួមពីបុគ្គលិកស្នាក់កណ្តាលនិងតំបន់ភ្នំពេញទាំងអស់ជាង១៤០នាក់។

លោក ដុស ឌីន អគ្គនាយកគ្រឹះស្ថានមីក្រូហិរញ្ញវត្ថុអម្រឹត បានថ្លែងថា៖ការបរិច្ចាគឈាមនៅថ្ងៃនេះគឺជាថ្ងៃដ៏សំខាន់ដែលប្រារព្ធធ្វើឡើងចំទិវាជាតិមាតាទារកនិងកុមារ។ការបរិច្ចាគឈាមជាកាយវិការដ៏សប្បុរសល្អប្រពៃ ជួយដល់ខ្លួនឯង ជួយដល់អ្នកដទៃ និងជួយដល់សង្គម។

រហូតមកដល់ពេលនេះ បុគ្គលិកអម្រឹតបានបរិច្ចាគឈាមជាង៩០០នាក់ ហើយតាមគម្រោងនឹងបរិច្ចាគឲ្យគ្រប់មួយពាន់ប្លោកនៅឆ្នាំ២០២៥នេះ។ក្នុងចំណោមបុគ្គលិកទាំងអស់ អ្នកបរិច្ចាគឈាម៣លើកមានចំនួន១៧នាក់ អ្នកបរិច្ចាគឈាមពីរដងមានចំនួន៣៥នាក់និងអ្នកបរិច្ចាគឈាមលើកទីមួយនៅពេលនេះមាន៨៦នាក់។បុគ្គលិកចំនួន២៩នាក់របស់អម្រឹតដែលត្រូវការឈាមបានទទួលអំណោយឈាមត្រឡប់មកវិញពីមជ្ឈមណ្ឌលជាតិផ្តល់ឈាម។

លោកអគ្គនាយក បានថ្លែងអំណរគុណយ៉ាងខ្លាំងចំពោះគណៈគ្រប់គ្រង បុគ្គលិកទាំងអស់ដែលបានចូលរួមបរិច្ចាគឈាមដោយស្ម័គ្រចិត្តនិងចូលរួមយ៉ាងមុតមាំសម្រាប់ការគាំទ្រសកម្មភាព។បើមិនមានការចូលរួមនេះទេការបរិច្ចាគឈាមនេះនឹងមិនអាចកើតឡើងបានឡើយ។

លោកស្រីវេជ្ជបណ្ឌិត មើក សាមាន អនុប្រធានមជ្ឈមណ្ឌលជាតិផ្តល់ឈាម បានមានប្រសាសន៍ថា៖ ការបរិច្ចាគឈាមដោយស្ម័គ្រចិត្តរបស់អម្រឹតនេះជាលើកទី៩ដែលរហូតមកដល់ពេលនេះបានជាង៩០០ប្លោកហើយ។កម្មវិធីបរិច្ចាគឈាមលើកទី១០នឹងធ្វើនៅខេត្តកំពង់ឆ្នាំង។

លោកស្រីវេជ្ជបណ្ឌិត បានលើកឡើងថា៖ជាទៀងទាត់ អម្រឹតបាននាំមុខគេក្នុងការបរិច្ចាគឈាម។បុគ្គលិកតែងតែចូលរួមទាំងនៅភ្នំពេញនិងបណ្ដាខេត្ត ហើយនៅខែមេសាឆ្នាំ២០២៥ខាងមុខ អម្រឹតនឹងរៀបចំកម្មវិធីបរិច្ចាគឈាមជាលើកទី១០។

លោកស្រីអនុប្រធានមជ្ឈមណ្ឌលជាតិផ្តល់ឈាម បានបញ្ជាក់ថា៖« ការបរិច្ចាគរបស់អម្រឹតនេះជាការចែករំលែកក្ដីស្រឡាញ់ ជាសប្បុរសដ៏ប្រពៃនិងជាការសង្គ្រោះជីវិត ជាពិសេសជួយបំពេញស្តុកឈាមសម្រាប់ជួយសង្គ្រោះជីវិតអ្នកជំងឺនិងអ្នកវះកាត់ដែលត្រូវការឈាមចាំបាច់។ នៅថ្ងៃនេះបុគ្គលិកអម្រឹតបានចូលរួមយ៉ាងសកម្មក្នុងការបរិច្ចាគឈាមដើម្បីសង្គ្រោះជីវិត»។

លោកស្រីវេជ្ជបណ្ឌិតក៏បានលើកទឹកចិត្តឲ្យបន្តសកម្មភាពដ៏ប្រពៃនេះទៀត។ នេះជាទឹកចិត្តដ៏ធំធេងរបស់អម្រឹត ។ការបរិច្ចាគឈាមនឹងធ្វើឲ្យមានសុខភាពផ្លូវចិត្ត ផ្លូវកាយជាពិសេសសង្គ្រោះអ្នកជំងឺនិងជួយឲ្យស្តុកឈាមមានគ្រប់គ្រាន់ដើម្បីសង្គ្រោះអ្នកជំងឺ។

លោក រុំ រដ្ឋា នាយកអង្គភាពពាណិជ្ជកម្មនៃគ្រឹះស្ថានមីក្រូហិរញ្ញវត្ថុអម្រឹត បានជម្រាបឱ្យដឹងថា៖អម្រឹតបានចាប់ផ្ដើមកម្មវិធីបរិច្ចាគឈាមជាយូរមកហើយ តែនៅឆ្នាំ២០២៣ បានបង្កើតយុទ្ធនាការមួយហៅថា«ផ្តល់ឈាមដោយស្ម័គ្រចិត្ត»។ កម្មវិធីនេះធ្វើឡើងជារៀងរាល់ត្រីមាសម្តង ។

នាយកអង្គភាពពាណិជ្ជកម្ម បានលើកឡងថា៖ការបរិច្ចាគឈាមដោយស្ម័គ្រចិត្តនៅកម្ពុជានៅមានអត្រាទាបនៅឡើយ ដូច្នេះអម្រឹតមានគោលបំណងជួយទៅដល់សង្គមជាតិដើម្បីជួយសង្គ្រោះជីវិតអ្នកដែលត្រូវការឈាមចាំបាច់ បំផុសបំផុលទៅដល់សាធារណជននិងក្រុមហ៊ុនផ្សេងៗចាប់ផ្ដើមសកម្មភាពបរិច្ចាគឈាមដោយស្ម័គ្រចិត្តឲ្យបានទូលំទូលាយ។

លោកបានបន្តថា៖ នៅពេលចាប់ផ្តើមយុទ្ធនាការឆ្នាំ២០២៣ យើងមិនមានសង្ឃឹមថានឹងបានឈានទៅដល់មួយពាន់ប្លោកនោះទេ តែនៅពេលចាប់ផ្តើមសាកល្បងបានទទួលជោគជ័យនៅឆ្នាំ២០២៣និង២០២៤។មកដល់ឆ្នាំ២០២៥នេះអាចនឹងកើនឡើងទៅដល់មួយពាន់ប្លោក។ អម្រឹតគ្រោងនឹងធ្វើកម្មវិធីបរិច្ចាគឈាមនៅខែមេសាឆ្នាំ២០២៥ដែលនឹងអាចសម្រេចទៅដល់គោលដៅមួយពាន់ប្លោករបស់ខ្លួន ។

លោក រុំ រដ្ឋា បានឱ្យដឹងផងដែរថា៖ការបរិច្ចាគឈាមផ្ដល់អត្ថប្រយោជន៍ជាច្រើន អាចជួយទៅដល់ខ្លួនឯង ជួយទៅដល់អ្នកត្រូវការឈាមបន្ទាន់និងជួយទៅដល់សង្គមជាតិ។ រហូតមកដល់ពេលនេះបុគ្គលិកជាង១០ភាគរយរបស់អម្រឹតបានយកឈាមមកប្រើប្រាស់។ លោកសូមលើកទឹកចិត្ត ឲ្យមានការបរិច្ចាគឈាមដោយស្ម័គ្រចិត្តកាន់តែច្រើន។

អំពី អម្រឹត

បច្ចុប្បន្ន អម្រឹតមានមោទនភាពជាគ្រឹះស្ថានហិរញ្ញវត្ថុឈានមុខគេមួយក្នុងចំណោមគ្រឹះស្ថានហិរញ្ញវត្ថុចំនួន ១0 នៅក្នុងប្រទេសកម្ពុជាដែលផ្តល់ផលវិជ្ជមានដល់សង្គម ។ អម្រឹត បាននិងកំពុងបម្រើអតិថិជនជាង ៦00,000 នាក់ ដែលជា កសិករមានចំណូលទាប សហគ្រាសធុនតូច តូចបំផុត និងមធ្យម ។ អម្រឹតមានសាខាចំនួន១៥០ ក្នុង២៤ រាជធានី-ខេត្តទូទាំងប្រទេស និងមានបុគ្គលិកជាង ៤.៧០០នាក់ កំពុងបម្រើការងារ។

អម្រឹត គឺជាក្រុមហ៊ុនបុត្រ សម្ព័ន្ធរបស់ Bank SinoPac (ធនាគារ សាយណូផេក) គឺជាភាគទុនិកធំនៅក្នុងអម្រឹត រួមជាមួយនឹងភាគទុនិកចំនួន០២ផ្សេងទៀតដែលជា ស្ថាប័នអន្តរជាតិ មានកិត្តិនាម និងត្រូវបានទទួលស្គាល់ថាជាស្ថាប័នដែលមានភាពច្នៃប្រឌិត និងទំនួលខុសត្រូវខ្ពស់ផ្នែកសង្គម ។ ក្នុងដំណើរវិវត្តន៍ និងការរីកចម្រើនរបស់ខ្លួន អម្រឹត បន្តបំពេញបេសកកម្មក្នុងការផ្តល់សេវាហិរញ្ញវត្ថុដែលស្របតាមតម្រូវការចាំបាច់របស់អតិថិជន។